Connect with us

تازه خبرونه

د نري رنځ ناروغي هر کال له ۱۵ څخه تر ۱۷ زره افغانان وژني

خپور شوی

د

(Last Updated On: لړم ۲, ۱۴۰۱)

د افغانستان د عامې روغتیا وزارت په ډاګه کړې، چې نری رنځ په نړۍ کې د لس وژونکیو ناروغیو په ډله کې راځي، چې هر کال په افغانستان کې له ۱۵ څخه تر ۱۷ زره کسان وژني.

 د دغې ناروغۍ د نړیوالې ورځې په مناسبت په جوړوشویو مراسمو کې د ملي وحدت حکومت اجرائیه ريیس عبدالله عبدالله وویل؛ مونږ په سیاسي مسایلو کې دومره ژور ښکېل شوي یو، چې د خلکو د روغتیا او ژوند مهم مسایل مو هیر شوي دي.

د حکومت اجرائیه رييس عبدالله عبدالله زیاتوي: مشري یوازې دا نه ده، چې د سیاست پيچلي او له ټیټو او ژورو ډک ډګر ته ورننوځو، بلکې مونږ اړ یو، چې د افغانستان د خلکو اصلي ستونزو ته هم پاملرنه ولرو.

د عامې روغتیا وزارت مسوولینو ويلي، چې دوی له نري رنځ ناروغۍ سره مبارزه پیل کړې؛ خو په یوازې سر نه شي کولی نری رنځ له منځه یوسي.

د عامې روغتیا وزیر فیروزالدین فیروز وایي: نري رنځ ناروغۍ ته پاملرنه د دې وزارت یو لومړیتوب دی. له دې ناروغۍ سره مبارزه یوازې زمونږ کار هم ندی؛ ځکه، چې له فقر او بېوزلۍ سره د دې ناروغۍ تړاو د څو وزارتونو ګډ کار او مبارزه غواړي. 

نړیوال مرستندویان افغان چارواکو ته ډاډ ورکوي، چې د نري رنځ د ناروغۍ په مخنیوي کې به خپلې همکارۍ روانې ساتي.

د ملګرو ملتونو د پرمختیايي ادارې استازی ناپیلون تهفاور وایي: د ملګرو ملتونو پرمختیايي اداره ژمنه ده، چې له افغان دولت سره یو ځای کار وکړي او د دغې ټولنیزې ستونزې د مخنیوي لپاره ظرفیتونه لوړ او روغتیایي خدمتونو ته مساوي لاسرسی برابر شي.

توبر کلوز یا نری رنځ یوه ساري ناروغي ده، چې د ټوخي او پرنجي له کبله روغو کسانو ته لیږدول کیږي. دا، چې څومره کسان په افغانستان کې پر نري رنځ اخته دي، پوره شمېر یې نشته؛ خو مسوولین وایي، چې هر کال د نري رنځ له کبله تر اووه لس زره  کسان ژوند له لاسه ورکوي.

خبریاله: لیدا نیازۍ

تازه خبرونه

چين مولوي عبدالکبیر ته په ټرانس – هیماليا ناسته کې د ګډون بلنه ورکړه

Published

on

(Last Updated On: غویی ۲۷, ۱۴۰۳)

په کابل کې د چین سفیر ژاو شینګ د چارشنبې پر ورځ (  د غویی شپږویشتمه ) د ریاست الوزراء له سیاسي مرستیال مولوي عبدالکبید سره په کتنه کې هغه ته بلنه ورکړه، چې په ټرانس – هیمالیا فورم په غونډه کې ګډون وکړي.

په دې کتنه کې لومړی د چین سفیر له اسلامي امارت سره د خپل هېواد پر همکاریو ټینګار څرګند کړ او څرګندوي، چې د دواړو لوریو همکاري او متقابلې اړیکې د ستونزو په حل کې مرسته کولی شي.

ژاو شينګ ویلي؛ د چين ولسي جمهوريت په نړيوالو غونډو او په ځانګړي توګه د امنيت شورا په غونډو کې د اسلامي امارت د دريځ ملاتړ کوي او له اسلامي امارت سره خپلو همکاريو ته ژمن دی.

د افغانستان اسلامي امارت سیاسي مرستیال مولوي عبدالکبیر له افغانستان سره په بېلابېلو برخو کې د چین د خلکو جمهوریت له همکاریو مننه کړې او وایي، چې اسلامي امارت د یوه مسوول حکومت په توګه امنیت او ثبات ته ژمن دی او هڅه کوي، چې د سیمه‌ییزو مسایلو، ثبات او پرمختګ په برخه کې فعال رول ولوبوي.

نوموړي د افغانستان په اړه په نړیوالو غونډو کې د چین همکاري او د اسلامي امارت له دریځ څخه د بیجینګ ملاتړ د افغانستان د خلکو په ګټه وباله او څرګندوي، چې د چین همکاري کولی شي په هېواد کې مثبت بدلونونه او اقتصادي وده رامنځته کړي.

Continue Reading

تازه خبرونه

د تورخم لار لنډمهاله تړل کیږي

Published

on

(Last Updated On: غویی ۲۷, ۱۴۰۳)

د تورخم کمیشنر عبدالجبار حکمت ويلي؛ د تورخم لار به د پاکستان له لوري د ۳ ورځو لپاره د ناروغانو او مسافرو د تګ راتګ پر مخ تړلې وي.

عبدالجبار حکمت ویلي، چې دغه لار به د جمعې له ورځې ( د غویی اتویشتمه) څخه تر یکشنبې ( د غویی دېرشمه ) پورې د ناروغانو او مسافرو پر مخ تړلې وي.

هغه زياته کړې، چې دغه سوداګريزه لار به ٢٤ ساعته پرانيستې وي او د بار‌وړونکیو موټرو تګ راتګ او د سوداګريزو توکو لېږد رالېږد به روان وي.

حکمت زياته کړې، چې د ناروغانو او مسافرو پر مخ د دې لارې د بندېدو لامل له پخوانۍ ودانۍ څخه نوې ودانۍ ته د پاکستان د سرحدي دفترونو لېږدول دي.

Continue Reading

تازه خبرونه

د سولې په چارو کې د ملګرو ملتونو د عمومي منشي مرستیال کابل ته راغلی

Published

on

(Last Updated On: غویی ۲۶, ۱۴۰۳)

د سولې په چارو کې د ملګرو ملتونو د عمومي منشي مرستیال ژان پیر لاکروا به د دوه ورځني سفر په بهیر کې له جګړې څخه د پاتې چاودیدونکیو توکو د خطرونو په اړه د پوهاوي پر لوړولو راوڅرخیږي.

د سولې په چارو کې د ملګرو ملتونو د عمومي منشي مرستیال ژان پیر لاکروا له یوه پلاوي سره کابل ته راغلی دی.

د ملګرو ملتونو د ویاند مرستیال فرحان له دې مخکې په یوه خبري غونډه کې ویلي وه، چې ین پییر لاکروا  به افغانستان ته په خپل سفر کې د چاودېدونکیو توکو د اغېزو په اړه د اسلامي امارت له چارواکو سره خبرې وکړي.

په دغه سفر کې له نوموړي سره د ملګرو ملتونو د ماین پاکۍ د څانګې مشره هم مل ده.

هغه  زیاته کړې، چې لاکروا به د مې تر اووه‌لسمې پورې په کابل کې وي او په دې سفر کې به د ملګرو ملتونو د ماین پاکۍ د څانګې مشره ایلین کوهن هم ورسره مل وي.

د ملګرو ملتونو دغه چارواکي ویلي، چې د افغانستان خلک د ماینونو له خطر سره مخ دي او د ۲۰۲۳ کال له جنورۍ څخه د ۲۰۲۴ کال تر مارچ پورې په افغانستان کې د ۸۲۱ چاودېدونکیو توکو د وژل شویو ۸۱ سلنه ماشومان ول.

تر اوسه اسلامي امارت په دې اړه جزئیات ندي ورکړي.

د سولې په چارو کې د ملګرو ملتونو د عمومي منشي مرستیال په داسې حال کې افغانستان ته سفر کوي، چې ټاکل شوې د روان کال په جون میاشت کې د افغانستان په اړه په دوحه کې درېیمه غونډه جوړه شي.

دا په داسې حال کې ده، چې د ملګرو ملتونو د څرګندونو پر بنسټ، له دې مخکې د سولې په چارو کې د ملګرو ملتونو د عمومي منشي مرستیال قطر ته د سفر پر مهال د دغه هېواد له چارواکو سره د سولې د ټینګښت او د ستونزو په اړه خبرې کړې وې.

Continue Reading

Trending

Copyright © 2022 Ariana News. All rights reserved!