سیمه ییز خبرونه
د پاکستان له زندانونو آزاد شوي ۳۰۰ افغانان هېواد ته راستانه شول
د پاکستان له زندانونو څخه له خوشي کېدو وروسته درې سوه افغانان د یکشنبې پر شپه شاوخوا لس بجې د کندهار ولایت سپین بولدک ولسوالۍ ته ورسېدل.
د ۵۲۴ خوشي شویو بندیانو څخه ۳۰۰ کسان یې، چې ۱۷۷ يې نرينه او پاتې نور يي ښځې او ماشومان دي؛ د کندهار ولایت سپین بولدک ولسوالۍ ته رسېدلي دي.
په اسلام آباد کي د افغانستان سفارت او د کراچۍ د کونسلګرۍ له هلو ځلو وروسته د شنبې پر ورځ د مرغومي ۱۷ د کراچۍ له زندانونو د ۵۴ میرمنو او ۹۷ ماشومانو په ګډون ۵۲۴ افغانان راخوشې شوي دي.
د کندهار سیمه ییزو چارواکو له دوی سره وکتل، لازمې آسانتیاوې یې ورته برابرې کړې او وایي، چې د دوشنبې پر سهار به بېرته خپلو کورونو ته ستانه شي.
د والي د رسنیو دفتر د څرګندونو له مخې؛ هغه افغانان، چې د پاکستان له اړوند زندانونو خوشې شوي دي ډېرې دردوونکې کیسې یې په زړونو کې دي او د پاکستانيو چارواکو لخوا د ترسره شویو ناوړه چلندونو په اړه یې خبرې کړې دي.
د چارواکو د څرګندونو له مخې؛ په ورته وخت کې افغانان د اسلامي امارت له مشرانو مننه کوي، چې د دوی د خلاصون لپاره یې کار کړی.
دوی هېواد ته له راستنیدونېدو سره سم له روغتیایی، خوراکي او ترانسپورتي آسانتیاوو برخمن شوي دي.
د پاکستان حکومت تېر کال خبرداری ورکړی و؛ هغه افغانان، چې د اعتبار وړ ویزې نلري باید د ۲۰۲۲ کال تر پایه له پاکستان څخه ووځي.
سیمه ییز خبرونه
یو هندي پیلوټ د جیټ الوتکې له نسکورېدو روغ ووت
د سې شنبې پر ورځ ( د کب دوهویشتمه) د هند هوايي ځواک تجاس نومې جیټ الوتکه د راجستان ایالت د جیسلمیر اړوند سیمې ته نږدې د روزنیزې الوتنې پر مهال نسکوره شوه.
د هند هوايي ځواک د څرګندونو له مخې؛ د الوتکې پیلوټ له غورځېدو وروسته ژوندی پاتې شو.
تجاس یو سپک سوپرسونیک جنګي الوتکه ده، چې د هند لخوا جوړه شوې او د هند هوایي ځواک او سمندري ځواکونه یې کاروي.
دې جیټ الوتکې په لومړي ځل په ۲۰۰۱ ز. کال کې الوتنه وکړه او په ۲۰۱۶ کې په بشپړه توګه د ماموریت لپاره وکارول شوه.
دا لومړی ځل ندی، چې دا ډول الوتکه نسکوریږي؛ په ۲۰۱۵ کې، تجاس الوتکه د روزنیزې الوتنې پر مهال وغورځېده، چې دوه پیلوټانو په کې خپل خوږ ژوند له لاسه ورکړ.
د هند هوايي ځواک څرګنده کړې، چې د وروستۍ الوتکې د لوېدو د علت په اړه به هر اړخیزه څېړنه وکړي.
سیمه ییز خبرونه
د پاکستان د مالیې پخوانی وزیر اسحاق ډار د بهرنیو چارو وزیر شو
د پاکستان مالیې پخوانی وزیر اسحاق ډار د دوشنبې پر ورځ په داسې حال کې د بهرنیو چارو د وزیر په توګه وګمارل شو، چې مخ پر زیاتېدونکي اقتصادي او امنیتي ننګونې به د پاکستان د بهرنۍ پالیسۍ لومړیتوب وي.
۷۳ کلن ډار یو محاسب او تجربه لرونکی سیاستوال او د پاکستان مسلم لیګ نواز غړی دی.
نوموړی د دغه ګوند د مشر نواز شریف نږدې خپل او د هغه یو له نږدې سلاکارانو څخه هم دی او څلور ځله یې د مالیې د وزیر په توګه کار کړی دی.
اسحاق ډار رویټرز ته ویلي: اقتصادي ډیپلوماسۍ په رښتیا هم د وخت اړتیا ده؛ خو د ډار سیاسي متحدینو تل د هغه د مالي واک په بهیر کې د اقتصاد پر اداره کولو نیوکې کړي دي.
د نوموړي د ۱۶ میاشتني کار په بهیر کې ۳۸ سلنه انفلاسیون و او د سود کچه ۲۲ سلنې ته لوړه شوې وه، چې پړه یې تر ډېره د نړیوال وجهي صندوق د پالیسو پر اړتیاوو اچول کیږي.
ډار له خپلو کړنو دفاع کړې او څرګندوي، چې هغه باید د پیسو د نړیوال صندوق پروګرام ته د لاسرسي له لارې د حکومت د پورونو د نه ورکولو لپاره سخت ګامونه پورته کړي؛ ځکه، چې عمران خان د دندې له پرېښودو څو ورځې مخکې له منځه یوړل، خو دا تور عمران خان ردوي.
سیمه ییز خبرونه
اصف علي زرداري بیا د پاکستان ولسمشر شو
د پاکستان پخوانی ولسمشر اصف علي زرداري د شنبې پر ورځ د پارلمان او ایالتونو په رای اچونه کې د واکمن ائتلاف پر ملاتړ بیاځلې ټاکنې وګټلې.
په پاکستان کې د ولسمشر رول تر ډېره حده تشریفاتي دی؛ خو زرداري د پخلاینې د مشر په توګه پېژندل کیږي او کولی شي د حکومت له ائتلافي ملګرو سره اجماع ته ورسیږي او د مات شوي اقتصاد د ثبات په لار کې د نړیوال وجهي صندوق د هوکړې په ترلاسه کولو کې مرسته وکړي.
زرداري به د ولسمشرۍ ترڅنګ د هېواد د وسلهوالو ځواکونو عالی قومندان هم وي، چې د حکومتونو په جوړولو یا ماتولو کې پراخ رول لوبوي.
د قضائیه قوې رییس عامر فاروق نوموړی پر ژوندۍ بڼه په ټلویزیوني خپرونه کې ګټونکی اعلان کړ.
د پارلمان د یوې اعلامیې له مخې؛ زرداري ۴۱۱ رایې ترلاسه کړي او ملتپاله مشر محمود خان اڅکزي ته یې، چې ۱۸۱ رایې اخیستې وې؛ مات ورکړه.
ولسمشر د ولسي جرګې او مشرانو جرګې او څلورو ایالتي اسمبلیو د رایو له لارې ټاکل کېږي.
اصف علي زرداري د پخوانۍ لومړۍ وزيرې بېنظير بوټو مړه دی، چې د ۲۰۰۷ کال په ډسمبر کې د خپلې میرمنې له وژل کېدو وروسته سياسي دریځ ترلاسه کړ او د پيپلز ګوند واک يې د خپلې خوښې له مخې څرګند کړ. بېنظیر بوټو په یو ځانګرګي برید کې وژل شوې ده.
زرداري په ۲۰۰۸ کې ولسمشر شو او تر ۲۰۱۳ پورې یې دنده ترسره کړه. دا هغه پېر و، چې امریکایي ځانګړو ځواکونو د ده تر چتر لاندې په ۲۰۱۱ کې اسامه بن لادن وموند او وواژه.
د زرداري ستره لاسته راوړنه د خپلې لومړۍ دورې په اوږدو کې د واک د غیرمرکزي کولو او د پخوانیو پوځي مشرانو لهخوا د ولسمشریزو واکونو د مخنیوي لپاره د نوي قانوني او سیاسي چوکاټ د تصویب لپاره نادره سیاسي اجماع رامنځته کول ول.
د رویټرز د څرګندونو له مخې؛ د ۱۹۹۰ لسیزې له پیل څخه تر ۲۰۰۴ پورې هغه د فساد په تورونو کې ۱۱ کاله زندان تېر کړ، چې هیڅکله پرې ثابت نهشول، خو هغه او د هغه ګوند یې د پوځ پر ملاتړ سیاسي قرباني بولي. دا هغه تور دی، چې پوځ یې ردوي.
-
لوبی5 days ago
راشدخان د ایرلینډ پروړاندې د ۲۰ آوریزو نړیوالو سیالیو لوبډلمشر شو
-
تازه خبرونه2 days ago
د هند د یوه پوهنتون په لیلیه کې پر لمونځ کوونکیو برید شوی
-
تازه خبرونه1 day ago
په نوي تعلیمي کال کې دې د نجونو ښوونځي او پوهنتونونه پرانیستل شي – حامد کرزی
-
تازه خبرونه5 days ago
د افغانستان امانت صندوق تر اوسه ۲۷۰ میلیون ډالر ګټه کړې – انوارحق احدي
-
نړۍ2 days ago
د آیسلینډ اورشېندنې یو ځل بیا سرراپورته کړ
-
تازه خبرونه2 days ago
په بدخشان کې د سرو زرو کان د نړېدو له کبله دوه کارګر مړه شوي
-
نړۍ1 day ago
شمالي کوریا یو بالسټیک توغندی وتوغاوه
-
تازه خبرونه2 days ago
خبریالان د ملت او نظام د وصل استازي دي-ذبیح الله مجاهد