د چارشنبې پر ورځ د شمالي ایرلینډ په بریډي کرکټ لوبغالي کې د افغانستان او ایرلینډ کرکټ ملي لوبډلو ترمنځ لومړۍ یوورځنۍ سیالي له توپ غورځولو پرته؛ د پرله‌پسې باران او د لوبغالي د نامناسبو شرایطو له کبله لغوه شوه.

ټاکل شوې، چې لوبه د سیمې پر وخت د سهار پر ۱۰:۴۵ (د کابل پر وخت د غرمې پر ۱:۳۰) پیل شي؛ خو د پرله‌پسې باران له کبله د پچې اچونې مراسم هم ترسره نه‌شول.

د لوبې چارواکو د سیالۍ پیل وځنډاوه او د غرمې شاوخوا ۱۲ بجې یې د لوبغالي وضعیت وارزاوه؛ خو په پای کې یې د غرمې پر ۱۲:۲۷ د لوبې د لغوه کېدا پرېکړه وکړه.

د دې لوبې لغوه کېدا دواړو لوبډلو ته د پېنځه یوورځنۍ سیالیو د لړۍ په پیل کې د اغېز ښودلو فرصت له منځه یووړ. دا سیالۍ د ایرلینډ د نوي روزونکي، ګري ویلسن تر مشرۍ لاندې د دې لوبډلې د نوي پړاو پیل هم بلل کېږي.

ټاکل شوې، چې دواړه لوبډلې د جمعې پر ورځ یو ځل بیا د بریډي کرکټ لوبغالي په دوه‌یمه یوورځنۍ سیالۍ کې سره مخامخ شي او د دې لړۍ پاتې درې لوبې به د بلفاسټ ښار په سټورمونټ کرکټ لوبغالي کې ترسره شي.

د افغانستان او ایرلینډ د یوورځنۍ سیالیو دا لړۍ د افغانستان پر کچه پر ژوندۍ بڼه د آریانا ټلوېزیون له لارې خپرېږي.

یو افغان وګړی، چې په یونان کې د یوې سکاټلینډۍ مرستندویې د وژنې پر تور نیول شوی؛ د آتن محکمې ته حاضر شوی دی.

۲۶ کلن شریف احمدزی، چې د افغانستان سوک‌وهونکی هم دی؛ نن سهار د آتن د لومړنۍ محکمې د څارنوالۍ دفتر ته ولېږدول شو.

د سکاټلینډۍ وګړې الیزابټ جین راس جسد د جولای پر اته‌لسمه د آتن د یوه پرېښودل شوي کور په یوه بکس کې موندل شوی و.

د محکمې غونډه د تړلو دروازو تر شا ترسره شوې او تورن ته د محکمې له‌خوا مدافع وکیل وټاکل شو. ټاکل شوې، چې هغه د نورو اورېدنو لپاره د پنجشنبې پر ورځ بیا محکمې ته حاضر شي.

احمدزی د عمدي وژنې، غلا او د وسلو اړوند سرغړونو پر تور نیول شوی دی.

د یونان پولیسو ویلي، تورن لومړی د وسلو د ناقانونه ساتلو پر تور نیول شوی و؛ خو وروسته څارنوالۍ پرې د عمدي وژنې او غلا تورونه هم ولګول.

څېړونکي ادعا کوي، چې نوموړي د راس له مړینې وروسته د هغې د بانکي کارتونو پر کارولو له بانکي حسابونو څخه له ۱۰ زره یورو ډېرې پیسې ایستلې دي.

پولیسو ویلي، تورن منلې، چې د راس جسد یې لېږدولی؛ خو د هغې وژنه ردوي.

د پولیسو د څرګندونو له مخې، څېړونکو هغه مهال تورن وپېژاند، چې د هغې پرېښودل شوې ودانۍ شاوخوا د څار کمرې وکتل شوې؛ هغه ودانۍ، چې د راس جسد په کې دننه په یوه بکس کې موندل شوی و.

چارواکي همداراز ادعا کوي، چې د راس له مړینې وروسته تورن د هغې له ګرځنده ټیلیفون څخه د هغې ملګرو او د کورنۍ غړیو ته پیغامونه لېږلي او وروسته یې ټیلیفون بند کړی دی.

یوناني رسنیو هم راپور ورکړی، چې تورن وروسته بل ټیلیفون اخیستی او په آتن کې یې د راس ملګرو، د خپلې مېرمنې په ګډون ته د یوه ناپېژانده«جهادي» پر نوم پیغامونه استولي او په ناسم ډول یې د راس د مړینې مسوولیت د هغې د مذهب له کبله منلی دی.

د سیمه‌ییزو راپورونو له مخې، د تورن مېرمن هغه مهال شکمنه شوه، چې مېړه یې کور ته ستون نه‌شو، او وروسته یې د هغه د ټیلیفون له لارې هغه اپارتمان وموند، چې راس له ترورکېدا مخکې په کې اوسېده.

د دې پېښې په اړه څېړنې اوس هم روانې دي.

د افغانستان د سولې په چارو کې د امریکا پخواني استازي زلمي خلیلزاد د عمران خان د زنداني کېدو د درېیمې کلیزې پر مناسبت په یوه پیغام کې ویلي؛ اصلي پوښتنه دا ده، چې آیا د نوموړي زنداني کېدا پاکستان ته ګټه رسولې او که نه؟

خلیلزاد د چارشنبې پر ورځ په ایکس‌پاڼه کې لیکلي، پاکستان د بهرني سیاست په ځینو برخو کې بریاوې لرلې دي؛ خو پوښتنه یې کړې:« آیا خلک او خپله پاکستان نن د درې کاله مخکې پر پرتله ښه وضعیت لري؟»

د نوموړي د څرګندونو له مخې، د دې پوښتنې ځواب«پر څرګنده منفي» دی.

هغه زیاته کړې، د پاکستان اقتصاد په ټینګ وضعیت کې نه‌دی او حکومت یې د بېړنۍ مالي مرستې په لټه کې دی.

خلیلزاد ویلي، بلوچستان د بشپړ بغاوت پړاو ته داخل شوی، د پاکستان تر ادارې لاندې کشمیر له تاوتریخوالي سره مخ دی او خیبر پښتونخوا هم ورته وضعیت لري.

خلیلزاد زیاته کړې، د بهرني سیاست په برخه کې هم ناکامۍ لیدل کېږي او د پاکستان اړیکې له افغانستان او هند سره خرابې شوې دي.

هغه ټینګار کړی، چې د پاکستان عمومي وضعیت«بحراني» دی او دغه هېواد «بیا سمون» ته اړتیا لري؛ هغه څه، چې پر خبره یې کورنۍ پخلاینه او کورنی جوړجاړی هم رانغاړي.