په افغانستان کې د ملګرو ملتونو مرستندویه پلاوي (یوناما) د بشري حقونو د وضعیت په اړه په خپل تازه راپور کې ویلي، چې د ۲۰۲۵ کال په وروستیو درې میاشتو کې د افغان حکومت ۱۴ پخواني ځواکونه وژل شوي دي.

یوناما زیاته کړې؛ دغه راز د خپلسرو نیولو او بندیانولو ۲۸ پېښې او د پخواني افغان حکومت له چارواکو او ځواکونو سره د ځورونې او بد چلند لږ تر لږه اووه قضیې ثبت شوې دي.

د راپور له مخې: د پخواني حکومت هغه چارواکي او ځواکونه، چې په دې وروستیو کې له ایران او پاکستان څخه افغانستان ته راستانه شوي؛ د هغو کسانو په ډله کې ول، چې د غیرقانوني وژنو، خپلسرو نیولو او ځورونو سره مخ شوي دي.

په راپور کې د ښځو پر کار او حرکت بندیزونو، اعدامونو، دُرو وهلو او د انټرنیټ او مخابراتي خدماتو بندولو ته هم نغوته( اشاره ) شوې ده.

د کورنیو چارو وزارت ویلي، چې د مخدره توکو پر وړاندې د مبارزې د دفتر د مشر حسیب الله احمدي پر مشرۍ یو اته کسیز پلاوی د انډونیزیا پلازمینې جاکارتا ته روان شو.

په دې پلاوي کې د مخدره توکو پر وړاندې د مبارزې د مرستیالۍ یو شمېر رییسان او همدارنګه د عامې روغتیا وزارت چارواکي دي.

دا سفر په کابل کې د ملګرو ملتونو د مخدره توکو او جرمونو د دفتر پر رسمي بلنه او د جاپان پر مالي ملاتړ ترسره کیږي.

د کورنیو چارو وزارت د څرګندونو له مخې؛ پلاوی به په هغه غونډه کې ګډون وکړي، چې موخه یې د مخدره توکو پر وړاندې مبارزه او د روږدو کسانو د درملنې په اړه د همکارۍ پیاوړتیا ده.