د ډاکټر اشرف غني احمدزي ټاکنیزه ډله وایي، چې د ولسمشر حامد کرزي حکومت تر اوسه مشروعیت لري او ښاغلی کرزی کولای شي د ناټو په جوړېدونکې سرمشریزه کې چې ټاکل شوې د راتلونکې میلادي میاشتې په څلورمه نېټه په بریتانیا کې جوړه شي، له افغانستان استازیتوب وکړي.

ټاکل شوې د ناټو سرمشریزه د راتلونکې میلادي میاشتې په لومړیو کې د افغانستان په اړه خپله وروستۍ ناسته تر سره کړي.

خو ټاکنیزو لانجو او اوږد ټاکنیز بهیر ته په پام سره لا نه ده معلومه، چې دغې سرمشریزه کې به د افغانستان استازیتوب څوک کوي.

د اشرف غني احمدزي ټاکنیزه ډله وایي، که ټاکنیزه لانجه تر دغې ناستې پای ته ونه رسېږي، ولسمشر کرزی کولای شي، د افغانستان استازیتوب وکړي.

خو د عبدالله عبدالله ټاکنیزه ډله وایي، باید ژر د ټاکنو وروستۍ پایلې اعلام شي، او نوی ولسمشر دې ناسته کې ګډون وکړي.

د دغې ټاکنیزې ډلې غړي ټینګار کوي، چې که د ناټو له سرمشریزې مخکې د ټاکنو برخلیک روښانه نه شي، په دغې سرمشریزه کې به د افغانستان د استازي د حضور په اړه له سیال ټیم سره تفاهم وشي.

بلخوا د ولسي جرګې غړی قیس حسن او پوځي کارپوه عتیق الله امرخېل په دې باور دي، چې په دې سرمشریزه کې به د ولسمشر کرزي حضور ننګونکی وي.

دوی باوري دي، چې د ښاغلي کرزي حکومت پای ته رسېدلی.

دوی همدارنګه وایي، که دغې سرمشریزه کې د افغانستان استازی ګډون ونه کړي، خپل منځي نښتې به پېل او ټول بهرني ځواکونه له افغانستان ووځي.

بلخوا ولسمشرۍ ماڼۍ هم ټینګار کوي، چې باید د ټاکنو پایله ژر اعلام شي څو د دغې سرمشریزې له پېل مخکې افغانستان نوی ولسمشر ولري.

خلک هم غواړي، چې د ټاکنو پایله ژر معلومه شي څو پوه شي، چې نوی مشر یې څوک دی.

دوی وایي، په کار ده د ناټو له سرمشریزې مخکې دا کیسه پای ته ورسېږي.

ولسمشر حامد کرزي له کورنیو او نړیوالو فشارونو سره سره دې ته غاړه کې نه ښوده، چې له واشنګټن سره امنیتي او دفاعي سند لاسلیک کړي.

دې چارې لوېدیځ هېوادونه په تېره بیا امریکا سخته ناراضه کړه. د ناټو سرمنشي ټینګار کوي، چې که نوی افغان ولسمشر دا سند ژر لاسلیک نه کړي، دوی به له افغانستان څخه په راتلونکو میاشتو کې ټول ځواکونه وباسي.