د آلمان کورنیو چارو وزارت ټینګار کړی، چې په دې هېواد کې د افغانستان د ډیپلوماټیکو استازولیو د هڅو دوام د افغان وګړو د ایستلو د بهیر لپاره اړینې دي؛ ځکه همدا استازولۍ اړین سفري اسناد صادروي.

یاد وزارت دویچه‌وله خبري رسنۍ ته ویلي؛ د نړیوال عرفي حقوقو له مخې د افغانستان واکمن چارواکي اړ دي هغه افغان وګړي ومني، چې له جرمني څخه ایستل کېږي.

دا په داسې حال کې ده، چې برلین د افغان کډوالو د ایستلو د بهیر د پراخولو هڅې کوي.

د جرمني د کورنیو چارو وزیر، الکسانډر ډوبرینډت، وړاندیز کړی، چې هره میاشت افغانستان ته د ایستل کېدونکو کسانو د لېږد لپاره درې چارټر الوتنې ترسره شي او ترڅنګ یې انفرادي ایستل هم د سوداګریزو الوتنو له لارې دوام ومومي.

که څه هم جرمني اسلامي امارت پر رسمیت نه‌پېژني، خو دا مهال په برلین کې د افغانستان سفارت او په بن ښار کې د افغانستان کونسلګري دواړه د اسلامي امارت د استازو له‌خوا اداره کېږي.

د دویچه‌وله د راپور له مخې؛ د جرمني حکومت تائید کړې، چې ټاکل شوې د اسلامي امارت څلور نور ډیپلوماټان هم دغه هېواد ته ولاړ شي.

د هېواد دفاع وزیر محمد یعقوب مجاهد د بدخشان ولایت شمال ختیځو سرحدي سیمو ته د سفر پر مهال له سرحدي ځواکونو او پوستو څخه لیدنه کړې ده.

د دفاع وزارت د خبرپاڼې له مخې؛ محمد یعقوب مجاهد په خپل سفر کې د بدخشان ولایت له کران او منجان، زیباک، واخان او پامیر ولسوالیو څخه لیدنه وکړه.

د خبرپاڼې له مخې؛ د هېواد دفاع وزیر د افغانستان له هغو مهمو سټراټیژیکو سرحدي سیمو څخه هم لیدنه کړې، چې له چین، تاجکستان او ډیورنډ کرښې سره نښتي دي.

محمد یعقوب مجاهد د سفر پر مهال د سرحدي ځواکونو فعالیتونه او چمتووالی وارزاوه، د هغوی له هڅو یې ستاینه وکړه او وایي، چې د هېواد د ځمکني بشپړتیا، ملي حاکمیت او سرحدونو ساتنه د ټولو امنیتي او دفاعي ځواکونو ګډ مسوولیت دی.

ویل کیږي، چې د سرحدي ځواکونو د وړتیاوو د لوړولو، لازمې همغږۍ او د اړینو آسانتیاوو د برابرولو لپاره به نورې هڅې هم تر سره شي.

د هرات والي نور احمد اسلام‌جار د ټاپي پروژې له مشر او د ترکمنستان د کونسلګرۍ له مرستیال بګنج عبدالله‌یوف سره د ټاپي پروژې د پرمختګ او د افغانستان او ترکمنستان ترمنځ د اقتصادي همکاریو د پراختیا په اړه خبرې کړې دي.

د هرات ولایت د خبرپاڼې له مخې، په دې کتنه کې، چې په هرات کې د بهرنیو چارو وزارت د استازولۍ د رییس په حضور کې ترسره شوې؛ دواړو لوریو د ټاپي پروژې د چارو پر چټکتیا او د دواړو هېوادونو ترمنځ د اقتصادي همکاریو پر پیاوړتیا ټینګار وکړ.

د هرات والي همداراز د افغانستان د تورغنډۍ او د ترکمنستان د سرحدآباد په سیمو کې د افغان ـ ترکمن ګډ نندارتون د جوړېدا وړاندیز وکړ او څرګندوي؛ دا نندارتون کولی شي د سوداګریزو اړیکو د پراختیا، د کورنیو تولیداتو د پېژندلو او د دواړو هېوادونو ترمنځ د اقتصادي همکاریو د پراختیا لپاره مناسب فرصت برابر کړي.

دغه راز بګنج عبدالله‌یوف د ټاپي پروژې د چارو په پرمختګ کې د هرات د سیمه‌ییزو چارواکو له همکاریو مننه کړې او څرګندوي، چې دغو همکاریو د دې مهمې پروژې د چارو په چټکتیا کې اغېزناک رول لوبولی دی.

هغه د ګډ نندارتون له وړاندیز هرکلی کړی او زیاته وي؛ دا طرحه به د ترکمنستان له اړوند چارواکو سره شریکه شي، چې له ارزونې وروسته یې د عملي کېدا په اړه پرېکړه وشي.

د کتنې په پای کې دواړو لوریو د ګډو همکاریو پر دوام، د اقتصادي اړیکو پراختیا او د افغانستان او ترکمنستان ترمنځ د ګډو پروژو د ښه پلي کېدو لپاره د لازمو آسانتیاوو برابرولو ټینګار کړی دی.