د پاکستان لومړي وزیر په اسلام آباد کې د لویدیځو هېوادونو د سفیرانو پر هغې غوښتنې، چې په اوکراین کې د روسیې کړنې وغندي نیوکه کړې او څرګندوي؛ آیا تاسې پاکستان ته د غلام فکر کړی؟

د رویټرز د راپور له مخې؛ په پاکستان کې د ۲۲ ډیپلوماټیکو ماموریتونو مشرانو په شمول د اروپايي اتحادیې استازیو د مارچ پر لومړۍ نېټه یو ګډ لیک خپور کړ او په کې له پاکستان څخه وغوښتل شول، چې پر اوکراین د روسیې برید وغندي.

د پاکستان لومړي وزیر عمران خان په یوه سیاسي غونډه کې د دغو سفیرانو د څرګندونو په غبرګون کې  څرګنده کړې؛ تاسې زمونږ په اړه څه فکر کوئ آیا مونږ ستاسې غلامان یوو او هغه څه کوو، چې تاسې یې وایئ؟

هغه د ملګرو ملتونو په عمومي اسمبلۍ کې له رای ورکولو ډډه کړې. په داسې حال کې، چې د امریکا متحدینو پر اوکراین د روسيې د يرغل له کبله سخته نيوکه کړې ده.

عمران خان ویلي: زه غواړم د اروپايي اتحادیې له سفیرانو وپوښتم، چې آیا تاسې هند ته هم دا ډول لیک لیکلی دی؟!

عمران خان زیاته کړې؛ هند، چې د پاکستان سیال دی هم د ملګرو ملتونو په عمومي اسمبلۍ کې رای اچونه نده کړې.

عمران خان وایي، چې اروپایي هېوادونو په کشمېر کې د هند د اقداماتو له کبله نیوکه نده کړې.

کشمیر یوه غرنۍ سیمه ده، چې پاکستان او هند تر اوسه پرې دوه جنګونه کړي دي.

نوموړی څرګندوي، پاکستان؛ ځکه ډېر زیانمن شوی، چې په کشمیر کې یې پر جګړو سربېره په افغانستان کې یې د ناټو د لویدیځو غړیو ملاتړ کړی، خو اوس د مننې پر ځای پرې نیوکې کېږي.

عمران خان او د هغه حکومت د فبرورۍ په وروستیو کې له هغې وروسته نومیالی شو، چې مسکو ته یې په داسې حال کې سفر وکړ او د روسیې له ولسمشر پوتین سره یې ولیدل، چې خپلو ځواکونو ته یې پر اوکراین د یرغل سپارښتنه وکړه.

نوړموړي په دې اړه ویلي؛ مونږ له روسیې سره ملګري یوو او مونږ له امریکا سره ملګري یو، مونږ له چین او اروپا سره ملګري یوو، مونږ په کوم تړون کې نه یوو. پاکستان به بې طرفه پاتې شي او له هغو کسانو سره به کار وکړي، چې په اوکراین کې د جګړې د پای ته رسولو لپاره کار کوي.

د جمعې پر ورځ، د پاکستان د بهرنیو چارو وزارت یوه ویاند ویلي وه، چې دا د نورو هېوادونو د سفیرانو لپاره عادي ډیپلوماټیک عمل ندی، چې له پرانیستې لیک سره راشي او مونږ ( ګواښونه) وکړي.

د مارچ پر لومړۍ نېټه په اسلام باد کې د اروپايي هېوادونو ۲۲ استازيو په یوه لیک کې له پاکستان غوښتي وه، چې پر اوکراین د روسيې یرغل وغندي او د روسيې خلاف تړون ته مثبته رایه ورکړي.