له بنديانو سره دې قانوني چلند تر سره شي- حامد كرزى

افغان ولسمشر حامد كرزي عدلي او قضايي بنسټونو ته دستور وركړى، چې له بنديانو سره دې قانوني چلند وشي.

ولسمشر په دغه فرمان كې سترې محكمې، لويې څارنوالۍ ، د ملي امنيت عمومي رياست، عدليې وزارت او كورنيو چارو وزارت ته شپږ مياشتې وخت وركړى، چې د هغو بنديانو دوسيو ته دې لاسرسى ومومي، چې د خپل برخليك د ټاكل كيدو په تمه دي او د څېړنو پرمهال دې بنديان نه شكنجه كيږي.

همدا راز ولسمشري د كوم شخص يا بل هېواد له خوا په افغانستان كې د بندي خانې درلودن د افغانستان د ملي حاكميت خلاف كار بولي.

افغان ولسمشر حامد كرزي په دې وروستيو كې د هغو بنديانو د دوسيو څېړلو حكم وركړ، چې د مودو راپديخوا په بند كې دي.

ولسمشرۍ ماڼې وايي:

په دغه فرمان كې افغان ولسمشرعدليې او قضايې بنسټونو ته دستور وركړى، چې څو د بنديانو د برخليك په ټاكلو كې جدې اقدام وكړي او امنيتي بنسټونو ته سپارښتنه شوې، چې د تحقيقاتو پرمهال دې بنديان نه كړول كيږي.

د ولسمشرۍ د عدلي او قضايې بورد ريس نصرالله ستانكزى د دغه فرمان د يوې برخې يادونه داسې كوي:

د افغانستان د اسلامي جمهوريت ستره محكمه د هغو بنديانو دوسيې، چې د رپوټونو له مخې له يوولس كلونو را پديخوا د ابتدائيه، استيناف او تميز محكمو د پرېكړو په تمه دې او يا هم بې برخليكه پاته دي د اړوند محكمو له لارې دې په جدي توگه وڅېړل شي او په ټاكل شوې قانونې موده كې دې دوسيو ته د لاسرسي بهير په دريگونو مرحلو كې گړندۍ كړي.

د افغان ولسمشر ورستى فرمان كه څه هم د سياسي چارو كارپوه صديق الله توحيدي، د ولسي جرگې غړي فرهاد صديقي او د ولسې جرگې غړې ذكيه سنگين له ملاتړ څخه برخمن شوى؛ خو وايي، چې دا كار ډېر وړاندې بايد ترسره شوى واى.

ولسمشر په دغه فرمان كې د عدليې او كورنيو چارو وزارت ته هم دنده سپارلې، چې تر راتلونكيو شپږ مياشتو پورې بنديانو ته د عدالت د پلې كيدو او د زندانونو د تجهيزاتو په برخه كې گړندۍ كړنې تر سره او خپل رپوټونه ولسمشرۍ ته ورړاندې كړي.