د امریکا ولسمشر ډونالډ ټرمپ ادعا کړې، چې د افغانستان جګړه یې په درې اوونیو کې ګټلی شوه. هغه د امریکا پر پخوانیو ولسمشرانو نیوکه کړې، چې ولې یې د دغه هېواد په تر ټولو اوږده جګړه کې بریا ترلاسه نه‌کړه.

ټرمپ د یکشنبې پر ورځ د آیوا ایالت په ډوبوک ښار کې د منځمهالو ټاکنو یوې ټاکنیزې غونډې ته ویلي، چې د امریکا پخوانیو حکومتونو په جګړو کې د روښانه موخې او بریا لپاره ګام نه‌دی پورته کړی.

هغه د افغانستان په جګړه کې د امریکا پوځي حضور ته په نغوته کې هم ویلي:« افغانستان، کلونه او کلونه. مونږ هېڅکله د بریا لپاره جګړه نه‌کوو؛ د بریا لپاره جګړه نه‌کوو، بلکې د مساوي کېدا لپاره جګړه کوو.»

هغه زیاته کړې:« ما دغه جګړه په درې اوونیو کې ګټلی شوه.»

ټرمپ د ویتنام جګړې په اړه هم ورته ادعا کړې او ویلي یې دي، چې هغه جګړه یې په یوه اوونۍ کې ګټلی شوه.

امریکا د سپټمبر د یوولسمې له بریدونو وروسته د ۲۰۰۱ز.کال په اوکټوبر کې پر افغانستان پوځي عملیات پیل کړل. دغه جګړه نږدې ۲۰ کاله روانه وه او امریکايي ځواکونو د ۲۰۲۱ز.کال په اګست کې له افغانستان څخه خپل وتل بشپړ کړل.

د ملګرو ملتونو سرمنشي انټونیو ګوترش ويلي، د نړۍ په بېلابېلو هېوادونو کې خبریالان اوس هم د رښتیا او حقیقت ویلو له کبله درنده بیه پرې کوي.

ګوترش د خبریالانو پر وړاندې د جرمونو د بې‌سزا پاتې کېدو د پای ته رسولو نړیوالې ورځې پر مناسبت، چې د نومبر پر دوه‌یمه لمانځل کېږي؛ خبرداری ورکړی، چې د خبریالانو پر نښه کول او د هغوی د غږ غلي کول خلک له معلوماتو بې‌برخې کوي او ټول زیانمنوي.

هغه ویلي:« کله، چې خبریالان پر نښه کېږي او د هغوی د راپورونو خپرول بندېږي؛ په حقیقت کې مونږ ټول زیان وینو.»

د ملګرو ملتونو سرمنشي په خپل پیغام کې د خبریالانو لپاره د عدالت پر ټینګښت او د رسنیو د کارکوونکو پر وړاندې د جرمونو د عاملانو د ځواب‌ویلو پر اړتیا ټینګار کړی دی.

اسوشیټډ پرس خبري آژانس د یکشنبې پر ورځ د محکمې د اسنادو د څرګندونو له مخې  راپور ورکړی، چې د امریکا حکومت غواړي په دې هېواد کې نیول شوي یو شمېر افغان کډوال د پاکستان له لارې افغانستان ته ولېږدوي.

د دغو اسنادو له مخې؛ امریکا په پام کې لري، چې د افغان کډوالو د لېږد بهیر د دوشنبې پر ورځ له لوییزیانا ایالت څخه پاکستان ته پیل کړي او وروسته یې افغانستان ته ولېږدوي.

د افغان کډوالو د حقونو مدافع ډلې«افغان ایوک» دغه پرېکړه غندلې او د هغو افغانانو د پخوانیو همکارانو په اړه یې د پایلو خبرداری ورکړی، چې له امریکايي ځواکونو سره یې همکاري کړې وه.

دغه پرېکړه د یو شمېر ډیموکراټو قانون‌جوړوونکو له نیوکو سره هم مخ شوې ده.

ډیموکراټ سناټور ریچارډ بلومنټال ویلي، چې امریکا له هغو افغانانو سره پر کړې ژمنې پښېمانه ده، چې د جګړې پر مهال یې له امریکايي ځواکونو سره همکاري کړې وه.

د ویرجینیا ایالت سناټور ټیم کین هم ویلي: « زموږ افغان همکارانو له امریکا سره د مرستې لپاره خپل هر څه له خطر سره مخ کړل. اوس ټرمپ غواړي د هغوی د کورنیو غړي د طالبانو تر واکمنۍ لاندې افغانستان ته ولېږدوي؛ د هغوی د سرښندنو په بدل کې خیانت کول د شرم وړ دي او په راتلونکو شخړو کې به د امریکا لپاره د مرستې ترلاسه کول خورا ستونزمن کړي.»

له دې مخکې د ټرمپ حکومت د افغانانو د بیا مېشتېدنې هغه پروګرام درولی و، چې د جوبایډن د حکومت پر مهال پیل شوی و.