د بهرنیو چارو وزارت ويلي، د دې وزارت چارسمبالي امیرخان متقي د ملګرو ملتونو د سیاسي او سولې چارو مرستیالې روزمري ډې‌کارلو سره په ټیلیفوني خبرو کې د کابل او ملګرو ملتونو ترمنځ پر همکاریو خبرې کړې دي.

د بهرنیو چارو وزارت د څرګندونو له مخې، دواړو لوریو په دې ټیلیفوني خبرو کې د اسلامي امارت او ملګرو ملتونو ترمنځ د همکاریو پر عمومي وضعیت بحث کړی او د راتلونکو همکاریو د پیاوړتیا او پراختیا پر لارو چارو یې نظرونه سره شریک کړي دي.

همدارنګه په دې خبرو کې د دوحې بهیر د چوکاټ له مخې د راتلونکو تعاملاتو او همکاریو د څرنګوالي په اړه هم نظرونه شریک شوي دي.

د بهرنیو چارو وزارت د دوحې بهیر په چوکاټ کې د راتلونکو ناستو د وخت او موضوعاتو په اړه نور جزئیات نه‌دي ورکړي.

د پاکستان د پنجاب ایالت اعلی وزیرې مریم نواز شریف ويلي، پنجاب د ګاونډ هېوادونو پر پرتله له ګاونډ ایالتونو څخه له ډېرو امنیتي ګواښونو سره مخ شوی دی.

مریم نواز شریف د شنبې پر ورځ په لاهور کې یوې غونډې ته ویلي؛ هیله لري، چې د پنجاب خلک په بشپړ امنیت کې ویده شي.

هغې ویلي:« له ګاونډ هېوادونو څخه پنجاب ته ګواښونه کم دي، خو له ګاونډ ایالتونو څخه ډېر دي.»

نوموړې زیاته کړې، له همدې سیمو څخه پنجاب ته ترهګریز بریدونه کېږي.

پنجاب په شمال او لویدیځ کې له خیبر پښتونخوا او بلوچستان، په سویل کې له سند ایالت او په ختیځ کې له هند سره ګډې پولې لري.

د پنجاب د اعلی وزیرې دا څرګندونې په داسې حال کې راپورته کېږي، چې د پاکستان حکومت تل هند او د افغانستان اسلامي امارت د پاکستان په بلوچستان او خیبر پښتونخوا کې د ناامنۍ پر رامنځته کولو تورن کړي دي.

د افغانستان اسلامي امارت دغه ادعاوې تل رد کړي او څرګندوي، چې په پاکستان کې ناامني د دغه هېواد د کورنیو ستونزو له کبله ده.

د امریکا د ولسمشر ډونالډ ټرمپ د ادارې له‌خوا درېیمو هېوادونو ته د کډوالو د ایستلو د تګلارې د پراختیا په لړ کې د افغانستان او کیوبا شپږ هغه وګړي، چې د امریکا له‌خوا ایستل شوي؛ ګویان ته رسېدلي دي.

د ګویان بهرنیو چارو وزیر رابرټ پرساډ ویلي، دغه شپږ کسان د شنبې پر ورځ د کډوالۍ اړوند مسایلو له کبله له امریکا وایستل شول او ګویان ته راولېږدول شول.

د نوموړي د څرګندونو له مخې؛ له ایستل شویو کسانو څخه یو هم جرمي سابقه نه‌لري او امریکا تر اوسه ګویان ته د نورو غیرګویاني وګړو د لېږدولو غوښتنه نه‌ده کړې.

پرساډ زیاته کړې، ګویان له امریکا سره له څو میاشتو خبرو وروسته پر یو کلن تړون سلا شوی؛ خو دا تړون په دغه هېواد کې د کډوالو د دایمي مېشتېدا معنا نه‌لري.

د دغه تړون له مخې؛ ایستل شویو شپږ کډوالو ته به د ملګرو ملتونو د کډوالې نړیوالې ټولنې د «مرستندویه داوطلبانه ستنېدا» پروګرام له لارې مرسته ورکړ شي. هغوی به په ګویان کې تر هغې پاتې شي، چې د کډوالۍ وضعیت یې معلومېږي او ښايي په پای کې خپلو اصلي هېوادونو ته ستانه شي یا په بل هېواد کې د مېشتېدا لپاره اقدام وکړي.

درېیمو هېوادونو ته د بهرنیو وګړو د ایستلو تګلاره د بشري حقونو د ادارو له پراخو نیوکو سره مخ شوې ده.

نیوکه کوونکي وايي؛ ډېری دغه کسان له هغو هېوادونو سره هېڅ تړاو نه‌لري، چې ورلېږدول کېږي او ښايي د ژبې او د ژوند له سختو شرایطو سره مخ شي.

د امریکا ولسمشر ډونالډ ټرمپ د خپلې دوه‌یمې ولسمشرۍ پر مهال د کډوالۍ د محدودولو او د بهرنیو وګړو د ایستلو تګلاره پراخه کړې ده.

دونالد ترمپ، رئیس‌جمهور امریکا، در دوره دوم ریاست‌جمهوری خود سیاست محدودیت مهاجرت و اخراج شهروندان خارجی را گسترش داده است.