د پاکستان بهرنیو چارو وزیر محمد اسحاق ډار په خپله کلنۍ وینا کې یوې رسنیزې ناستې ته ویلي: “په سعودي عربستان کې له طالبانو سره خبرې اترې کومې منطقي پایلې ته ونه‌رسیدې. لکه څنګه یې، چې په قطر او ترکیه کې پایله نلرله.”

دغه رازاسحاق ډار زیاته کړې؛ اسلام آباد د افغانستان په اړه ښه نیت لري او له طالبانو څخه یې یوازنۍ غوښتنه دا ده، چې خپله خاوره د پاکستان پر ضد ونه‌کاروي.

 هغه هیله څرګنده کړې، چې د سراج الدین حقاني څرګندونې به د ستونزو په پای ته رسولو کې مرسته وکړي.

دغه راز نوموړي یو ځل بیا له اسلامي امارت څخه وغوښتل، چې د افغانستان له خاورې څخه د پاکستان پر ضد د بریدونو لپاره کار وانخلي او څرګندوي، چې دا د دواړو هېوادونو ترمنځ د سوداګرۍ د ځنډولو اصلي دلیل دی.

هغه وایي: “د طالبانو حکومت (اسلامي امارت) ځواب د قناعت وړ ندی او د وسلوالو پر وړاندې هیڅ ډول کوټلي اقدام نه‌کیږي.”

پاکستانيو چارواکو تل ادعا کړې؛ په پاکستان کې بریدونه د افغانستان د وسلوالو له‌خوا تنظیم کیږي، چې دا تور پر ځلونو اسلامي امارت رد کړی دی.