سیمه ییز خبرونه
په سيمه كې د هېوادونو نه همكاري د امنيت شورا له مصوبو سرغړونه ده- سپنتا
د افغان ولسمشر د ملي امنيت سلاكار وايي:
په هېواد كې غير متوازنې نيونې او د ترهگرو اصلي پتڼځايونو ته د نړيوالې ټولنې نه پاملرنه په هېواد كې د نا رضايتۍ اصلي لاملونه دي.
نوموړى وايي:
په داسې حال كې، چې د افغانستان ملي حاكميت او ځمكنۍ بشپړتيا ته زيان رسيږي؛ نو دا د آيساف دنده ده، چې ترې مخنيوى وكړي.
په كابل كې د افراطگرۍ او د نا رضايتۍ د ډېرودو د څېړلو لپاره د كورنيو او بهرنيو څېړونكيو، ډيپلوماتانو او د پوهنتونونو د استادانو د جوړې شوې ناستې پايلې به ترراتلونكيو درې ورځو ولسمشرۍ ته وړاندې شي.
د افغان ولسمشر د ملي امنيت سلاكار رنگين دادفر سپنتا د اداري فساد زياتيدل، په يو شمېر چارو كې د دولت نا سم چلند او يو شمېر بهرني عوامل په هېواد كې د نا رضايتى اصلي لامل بولي او زياتوي، چې:
د نړيوالې ټولنې له خوا د ترهگرو اصلي پټنځايونو ته نه پاملرنه هم په هېواد كې د نا رضايتۍ او د افراطيت د زياتيدو يو بل لامل دى .
همدا راز په دغه ناسته كې د آيساف استازي په هېواد كې د نا رضايتۍ له څېړلو ملاتړ څرگند كړى او وايي:
په پام كې ده د دغې ناستې پايلې د تركيې او د بن دوه يم كنفرانس ته هم وړاندې شي .
د آيساف استراتيژيك ريس بې جي هاريسون ټينگار څرگكند كړ، چې:
زما په نظر په راتلونكې مياشته كې، چې كومې دوه يا درې ناستې د افغانستان په باب جوړيږي د افغانستان د وضيعت د ښه كيدو لپاره گټورې تمامېدى شي.
د ولسمشر د ملي امنيت سلاكار په داسې حال كې، چې د افغانستان د ملي حاكميت ساتنه د آيساف اساسي دنده بولي؛ وايي، چې:
كه په سيمه كې كوم هېواد له ترهگرۍ سره په مبارزه كې همكاري ونه كړي؛ نو دا د ملگرو ملتونو د امنيت شورا له مصوبې ښكاره سرغړونه ده.
سپنتا ټينگاركوي، چې:
د ملگرو ملتونو د امنيت شورا مكلفه ده، چې له ترهگرۍ سره د مبارزې په برخه كې جدي چلند وكړي.
كه څه هم سپنتا په ځانگړي ډول د كوم هېواد نوم ياد نه كړ؛ خو د كارپوهانو په بارو د سپنتا اشاره پاكستان ته ده، ځكه په دې ورستيو كې د افغانستان او پاكستان اړيكې خرابې شوې او اسلام اباد له ترهگرو ډلو او په ځانگړي توگه د حقاني له ډلې ملاتړ كوي .