Connect with us

د هوا حالاتو بدلونونه

په فلوریډا کې سېلابونه؛ کالیفورنیا د ساحلي سېلابونو له ګواښ سره مخ ده

د سانفرانسیسکو ښاروال ډانیل لوري خبرداری ورکړی، چې دغه ښار له یوه« خورا جدي» هوايي وضعیت سره مخ دی. هغه له ښاریانو غوښتي، چې د ساحلي سیمو د سختو سېلابونو لپاره چمتووالی ونیسي او د رخصتیو پر مهال په خپلو سفري پلانونو له سره غور وکړي.

خپور شوی

د

 

په فلوریډا کې د شنبې پر ورځ هم پرله‌پسې اورښتونو د تاریخي سېلابونو اغېزې نورې هم پسې زیاتې کړې. په داسې حال کې، چې د کالیفورنیا په شمال کې چارواکي د توپاني څپو او بې‌سارو ساحلي سیلابونو لپاره چمتووالی نیسي. دا وضعیت د شکرانې اختر د رخصتیو او ګڼو مسافرتونو له پیل سره هم‌مهاله رامنځته شوی دی.

د سانفرانسیسکو ښاروال ډانیل لوري خبرداری ورکړی، چې دغه ښار له یوه« خورا جدي» هوايي وضعیت سره مخ دی. هغه له ښاریانو غوښتي، چې د ساحلي سیمو د سختو سېلابونو لپاره چمتووالی ونیسي او د رخصتیو پر مهال په خپلو سفري پلانونو له سره غور وکړي.

د امریکا د ملي سمندري او اتموسفیر ادارې او د هوا پېژندنې ملي ادارې د وړاندوینو له مخې، ښايي په سانفرانسیسکو کې د مدونو(د اوبو د لوړېدا) کچه د دغه ښار په ثبت شوي تاریخ کې تر ټولو لوړې کچې ته ورسېږي.

ډانیل لوري له ښاریانو غوښتي، چې د توپان له رارسېدو مخکې اړین توکي برابر او خپل خرڅ بشپړ کړي. هغه زیاته کړې، د ښاروالۍ چارواکي به د اوونۍ په پای کې د اوسېدونکو او سوداګریزو مرکزونو د ساتنې لپاره خپلې هڅې روانې وساتي.

تمه کېدونکي سېلابونه د کال له کلنیو لوړو مدونو سره هم‌مهاله دي؛ ځکه، چې د کال تر ټولو لوړ مدونه بلل کېږي.

د هوا پېژندنې ادارو خبرداری ورکړی، چې د دوشنبې تر سهار پورې ښايي په ساحلي او ټیټو سیمو کې د اوبو کچه تر ۰.۶ مټر پورې لوړه شي او د آرام سمندر د ساحل په ځینو برخو کې د سېلابونو خبرداری د پنجشنبې تر ماسپښین پورې غځېدلی دی.

دغه راز د فلوریډا د اټلانټیک سمندر ساحل هم د شنبې پر ورځ له خطرناکو هوايي شرایطو سره مخ و او د تندر او برښنا له توپانونو سره د اوبو د څرخنده ستنو د رامنځته کېدا احتمال هم موجود و.

چارواکو سمندري سفر کوونکو ته د خطرناکو سمندري شرایطو او ساحلونو میلمنو ته د سختو څپو او پیاوړو څپیزو بهیرونو په اړه خبرداری ورکړی دی.

که څه هم د سختو اورښتونو لړۍ پای ته رسېدلې؛ خو تمه ده، چې د فلوریډا د تر ټولو اوږد سیند،« سټ جونز» د اوبو کچه د پرله‌پسې سپکو اورښتونو له کبله لوړه شي.

د کوکو ښار ته نږدې د دغه سیند د اوبو کچه د پنجشنبې پر ورځ د ۱۹۵۳ز.کال له ثبت شوي ریکارډ څخه لوړه شوه.

د امریکا د هوا پېژندنې ملي ادارې کارپوهې میلیسا واټسن ویلي، چې د دې سیند په اوږدو کې به سېلابونه د اوږدې مودې لپاره روان وي؛ که نور اورښتونه وشي او که ونه‌شي.

د روانې اوونۍ په پیل کې سختو اورښتونو د فلوریډا د اټلانټیک سمندر ساحل پراخې سیمې تر اوبو لاندې کړې او د دغه ایالت په شمال ختیځو برخو کې یو شمېر اوسېدونکي د سېلابونو له کبله بند پاتې شول.

د فلوریډا او کالیفورنیا هوايي وضعیت له« ال نینو» پدیدې سره تړاو لري. دا یوه طبیعي پدیده ده، چې د استوا کرښې ته نږدې د آرام سمندر د اوبو د تودوخې د لوړېدا له کبله رامنځته کېږي او د نړۍ پر هوايي وضعیت اغېز کولی شي.

د هوا حالاتو بدلونونه

افغانستان د اقلیمي بدلونونو پر وړاندې د نړۍ پنځم زیان‌من هېواد وشمېرل شو

د چاپېریال ساتنې ملي ادارې عمومي رییس مطیع‌الحق خالص په کابل کې یوې علمي غونډې ته ویلي؛ که پر نړیواله کچه هر اړخیزې څېړنې ترسره شي، ښايي افغانستان د اقلیمي بدلونونو پر وړاندې د نړۍ درېیم زیان‌من هېواد وپېژندل شي.

Published

on

 

د افغانستان چاپېریال ساتنې ادارې چارواکو ويلي، افغانستان د اقلیمي بدلونونو د پایلو پر وړاندې د نړۍ د پنځه زیان‌منو هېوادونو په ډله کې دی. په داسې حال کې، چې د نړۍ د شنوخونو ګازونو په تولید کې یې ونډه ډېره کمه ده.

د چاپېریال ساتنې ملي ادارې عمومي رییس مطیع‌الحق خالص په کابل کې یوې علمي غونډې ته ویلي؛ که پر نړیواله کچه هر اړخیزې څېړنې ترسره شي، ښايي افغانستان د اقلیمي بدلونونو پر وړاندې د نړۍ درېیم زیان‌من هېواد وپېژندل شي.

دا علمي غونډه« د افغانستان رسنۍ او اقلیمي ډیپلوماسي؛ فرصتونه او ننګونې» تر سرلیک لاندې په یوه خصوصي پوهنتون کې جوړه شوې وه.

دغه راز د اطلاعاتو او کلتور وزیر شېراحمد حقاني د اقلیمي بدلونونو د منفي پایلو په اړه د عامه پوهاوي په لوړولو کې د رسنیو پر ونډې ټینګار کړی او له رسنیو یې غوښتي، چې په دې برخه کې فعالې خبري خپرونې وکړي.

د رسنیو یو شمېر مسوولانو هم د عامه پوهاوي د لوړولو او د اقلیمي بدلونونو د پایلو پر وړاندې د مبارزې لپاره له دولتي ادارو سره د همکارۍ چمتووالی څرګند کړی دی.

دا څرګندونې په داسې حال کې کېږي؛ ټاکل شوې د اقلیمي بدلونونو په اړه نړیواله غونډه یوه ورځ وروسته په ترکیه کې جوړه شي او د افغانستان له استازو هم دې غونډې ته د ګډون بلنه شوې، چې خپل نظرونه وړاندې او د هېواد اقلیمي وضعیت ته د نړیوالې ټولنې پام راواړوي.

په افغانستان کې د اقلیمي بدلونونو پر وړاندې د مبارزې اړوند یو شمېر نړیوالې پروژې درېدلې دي، چې دې چارې د اقلیمي بحران پر وړاندې د هېواد د مبارزې د وړتیا په اړه اندېښنې زیاتې کړې دي.

Continue Reading

د هوا حالاتو بدلونونه

اسلامي امارت د دوه‌یم ځل لپاره په اقلیمي نړیواله غونډه کې ګډون کوي

اسوشیټیډ پرس خبري آژانس راپور ورکړی، چې د اسلامي امارت چارواکي به په دې غونډه کې څارونکي وي او د افغانستان د چاپېریال ساتنې ملي ادارې د اقلیمي بدلونونو برخې رییس روح‌الله امین هم تائید کړې، چې کابل په دې غونډه کې د ګډون هوډ لري.

Published

on

 

ټاکل شوې د افغانستان اسلامي امارت چارواکي واک ته له رسېدا وروسته د دوه‌یم ځل لپاره د ملګرو ملتونو د اقلیمي بدلونونو په نړیواله غونډه (COP31) کې ګډون وکړي؛ دا غونډه به راتلونکې اوونۍ د ترکیې په انتالیا ښار کې جوړه شي.

اسوشیټیډ پرس خبري آژانس راپور ورکړی، چې د اسلامي امارت چارواکي به په دې غونډه کې څارونکي وي او د افغانستان د چاپېریال ساتنې ملي ادارې د اقلیمي بدلونونو برخې رییس روح‌الله امین هم تائید کړې، چې کابل په دې غونډه کې د ګډون هوډ لري.

یوه ترکي چارواکي هم په COP31 غونډه کې د اسلامي امارت د استازو ګډون تائید کړی دی.

اسلامي امارت له دې دوه کاله مخکې هم د آذربایجان په پلازمېنه باکو کې د اقلیمي بدلونونو د نړیوالې غونډې ګډونوال و؛ خو د اسلامي امارت استازي د ملګرو ملتونو د اقلیم په نړیوالو غونډو کې رسمي دریځ نه‌لري. ملګرو ملتونو تر اوسه په عمومي غونډه کې د افغانستان څوکۍ اسلامي امارت ته نه‌ده سپارلې او د دې ټولنې ډېری غړیو هېوادونو هم د اسلامي امارت حکومت پر رسمیت نه‌دی پېژندلی.

د څارونکو په توګه ګډون د اسلامي امارت استازو ته اجازه ورکوي، چې په غونډو او خبرو اترو کې برخه واخلي؛ خو د اقلیمي تګلارو او موخو په اړه په خبرو اترو او پرېکړو کې د رسمي ګډون حق نه‌لري.

افغانستان؛ د اقلیمي بدلونونو پر وړاندې د نړۍ یو زیان‌منونکی هېواد دی

افغانستان د هغو هېوادونو په ډله کې دی، چې د اقلیمي بدلونونو له کبله تر ټولو ډېر زیان ویني؛ پرله‌پسې وچکالیو، د اوبو کمښت، سختې ګرمۍ او ناڅاپي سېلابونو د میلیونونو وګړو ژوند له ګواښ سره مخ کړی دی.

د کډوالۍ نړیوالې ټولنې د راپور له مخې؛ یوازې د تېر کال له اپریل څخه تر ډسمبر پورې په افغانستان کې له ۱.۶ میلیون ډېر کسان د اقلیمي بدلونونو د اغېزو له کبله اړ شوي، چې خپل کورونه پرېږدي.

څرنګه، چې د افغانستان د وګړو لویه برخه پر کرنه بوخته ده؛ د وچکالیو دوام او د اوبو د سرچینو کمښت د هېواد پر کرنیزو تولیداتو او خوړو خوندیتوب هم سخت منفي اغېز کړی دی.

په نړیوالو غونډو کې د افغانستان د استازولۍ پر سر اختلاف

د افغانستان اسلامي امارت په دې باور دی، چې د افغانستان خلک باید د اقلیمي بدلونونو په نړیوالو غونډو کې استازولي ولري او د اقلیمي بدلونونو پر وړاندې د مبارزې مالي سرچینو ته لاسرسی ومومي.

Continue Reading

د هوا حالاتو بدلونونه

نړیوالو موسسو د چاپېریال ساتنې په برخه کې د همکارۍ ژمنه وکړه

هدف از برگزاری این برنامه، هماهنگی کمک‌ها و همکاری‌های انکشافی آینده با اولویت‌های محیط‌زیستی افغانستان عنوان شده است.

Published

on

 

د تمویلوونکو بنسټونو او نړیوالو موسسو استازو د افغانستان اسلامي امارت د چاپېریال ساتنې عمومي ادارې له لومړیتوبونو سره د خپلو راتلونکو مرستو او پراختیايي همکاریو د همغږۍ ډاډ څرګند کړی دی.

د ریاست‌الوزراء اقتصادي مرستیالۍ د عامه اړیکو ریاست د څرګندونو له مخې؛ د دوشنبې پر ورځ (د لړم یوولسمه) په مرمرینه ماڼۍ کې د افغانستان د سکټوري ادارو د لومړیتوبونو شریکولو په اتمه غونډه کې د چاپېریال ساتنې عمومي ادارې لومړیتوبونه تمویلوونکو، نړیوالو موسسو، ملګرو ملتونو او پراختیايي شریکانو ته وړاندې شول.

د غونډې ګډونوالو د چاپېریال ساتنې په برخه کې د لومړیتوبونو د شریکولو دغه بهیر وستایه او د مرستو او همکاریو د اغېزمنتیا لپاره یې همغږي اړینه وبلله.

هغوی څرګنده کړې، چې خپلې راتلونکې مرستې او پراختیايي همکارۍ به د چاپېریال ساتنې عمومي ادارې د لومړیتوبونو په رڼا کې تنظیم کړي.

د یادې ادارې په لومړیتوبونو کې د اقلیمي بدلونونو د معلوماتي سیسټم پراختیا، د شنو خونو ګازونو د خپرېدنې د معلوماتو ثبت، د اقلیم د زیانونو ارزونه، د څېړنیزو فارمونو جوړول، د نیالګیو کېنول، د شنو سیمو پراختیا او د اوزون پوړ د تخریبوونکو موادو د څارنې سیسټم پیاوړتیا شامل دي.

Continue Reading
Advertisement

Trending

Copyright © 2026 Ariana News. All rights reserved!