د افغانستان مالیې وزیر او د دوه‌اړخیزو همکاریو د اقتصادي کمیسیون رییس محمد ناصر آخوند ایران ته په خپل رسمي سفر کې د دې هېواد د کرنې له وزیر غلام‌رضا نوري قزلجه سره لیدلي دي.

د مالیې وزارت د خپرې شوې خبرپاڼې له مخې؛ په دې لیدنه کې د دواړو هېوادونو د اقتصادي کمیسیون د راتلونکې غونډې پر جوړېدا، ایران ته د افغان کرنیزو محصولاتو پر صادراتو، د ګمرکونو پر ۲۴ ساعته فعالیت، د افغان سوداګرو د ستونزو پر اواري او د ناقانونه توکو د قاچاق پر مخنیوي خبرې وشوې.

دغه راز دواړو لوریو د ناقانونه توکو د قاچاق پر مخنیوي او یو شمېر نورو سوداګریزو او اقتصادي موضوعاتو هم بحث او خبرې کړې دي.

ویل کیږي، چې د ایران د کرنې وزیر په کرنیزو، مالدارۍ او اوبولګولو برخو کې له افغانستان سره د همکاریو د ډاډ تر څنګ د اقتصادي کمیسیون راتلونکې غونډې ته د چمتووالي هم ټینګار کړی دی.

د ریاست‌الوزراء اقتصادي مرستیال ملا عبدالغني برادر د شنبې پر ورځ په جوزجان ولایت کې د بیات پاور شرکت د ۴۰ میګاواټه ګازي برښنا تولیدي توربین د بیا فعالولو مراسم پرانیستل.

د ریاست‌الوزراء اقتصادي مرستیال د ګازي برښنا د تولید په برخه کې د بیات پاور شرکت پانګونه وستایله او له نورو پانګوالو یې هم وغوښتل، چې پر برښنا او نورو برخو پانګونه وکړي.

ملا عبدالغني برادر ویلي، د افغانستان اسلامي امارت د هېواد د اقتصادي ودې او صنعتي کېدو لپاره مهم ګامونه پورته کړي او پانګوالو ته یې د پانګونې مناسب فرصتونه برابر کړي دي.

نوموړي له پانګوالو او صنعت‌کارانو وغوښتل، چې د هېواد په آبادۍ او خلکو ته د کاري فرصتونو په رامنځته کولو کې ونډه واخلي.

د ریاست‌الوزراء اقتصادي مرستیالۍ په هېواد کې د سوالګرۍ پدیدې د مدیریت هر اړخیزه طرحه د نړیوالو بنسټونو او مرستندویه موسسو له استازو سره شریکه کړې ده.

دا طرحه د چارشنبې پر ورځ د اقتصادي مرستیالۍ د عامه اړیکو ریاست پر مشرۍ په جوړه شوې غونډه کې وړاندې شوه.

په دې غونډه کې د سوالګرۍ پدیدې د مخنیوي لپاره پر دوامدارو لارو چارو او په دې برخه کې د اسلامي امارت پر هڅو خبرې وشوې.

د اقتصادي مرستیالۍ د خبرپاڼې له مخې؛ په دې غونډه کې د مسلکي زده‌کړو، مشروطو نغدي مرستو او د اړمنو کسانو د اقتصادي پیاوړتیا له لارې د سوالګرۍ پر کمولو ټینګار وشو، چې هغوی ته د دوامدار او باعزته ژوند زمینه برابره شي.

د نړیوالو بنسټونو او مرستندویه موسسو استازو هم له وړاندې شوې طرحې هرکلی کړی دی.