سیمه ییز خبرونه
په هرات كې لاريونكوونكيو د ايران كونسلگري په كاڼو وويشته
په هرات كې د يكشنبې په ورځ(د ليندۍ ۱۹) د كهسان ولسوالۍ خلكو د ايران كونسلگرۍ مخې ته په لاريون لاس پورې كړ.
لاريونكوونكيو د هغو۱۳ تنو مړو د ورسپارلو غوښتنه كوله، چې دوه مياشتې وړاندې د ايراني سرحدي ځواك په ډزو كې وژل شوي ول.
لاريونكوونكيو پر كونسلگرۍ كاڼي ويشتل او غوښتل يې، چې ورننوځي؛ خو د پوليسو له هوايي ډزو سره مخ او ووېشل شول.
ويل كيږي، چې په دې پېښه كې يو تن سرسري ټپي شوى او د كونسلگرۍ د ودانۍ ښېښې د كاڼو د لگيدو پر لامل ماتې شوې دي.
لاريونكوونكيو دولت تورن كړ، چې دغې ستونزې ته يې تر دې دمه لازمه پاملرنه كړې نه ده.
د هرات والي وياند محي الدين نوري وايي:
لاريون د خلكو منل شوى حق دى، خو پر تاوتريخوالي بايد وانوړي.
په هرات كې د ايران كونسل يكتا محمدي وايي:
تر اوسه موږ ته د دغو ۱۳ تنو د وژل كيدو بشپړ اسناد راسپارل شوي نه دي.
دا په داسې حال كې ده، چې څه موده وړاندې د ملي شورا غړيو هم د ايران پر سرحدي پوله د دغو ۱۳ تنو پر وژل كيدو اندېښنه څرگنده كړې او دغې ستونزې ته د لاسرسي غوښتونكي شوي ول.