تازه خبرونه
په ۶ ولایتونو کې له ۸۰۰ جریبو ډېره ځمکه له کوکنارو پاکه شوې
د افغانستان اسلامي امارت د کورنیو چارو وزارت ويلي؛ د نشهيي توکو پر وړاندې د مبارزې پولیسو د هېواد په شپږ ولایتونو کې پر یو لړ ځانګړیو عملیاتو د کوکنارو ۸۰۰ جریبه کښت له منځه وړی دی.
د کورنیو چارو وزارت د چارشنبې پر ورځ ویلي، چې د بدخشان ولایت په مرکز، یفتل پایان، ارغنجخواه، کشم او شهربزرګ ولسوالیو کې ۳۵۶ جریبه ځمکه، د پروان ولایت په ګلبهار او جبل السراج ولسوالیو کې ۳۳۸ جریبه ځمکه؛ د سمنګان ولایت په دره صوف کې ۶۲ جریبه ځمکه؛ د بغلان ولایت د اندراب، دوشي او بورکې په ولسوالیو کې ۳۰ جریبه ځمکه؛ د لغمان ولایت په علیشنګ ولسوالۍ کې ۸ جریبه ځمکه او د کونړ ولایت په ماڼوګي ولسوالۍ کې ۷ جریبه ځمکه د کوکنارو له کښت پاکه شوې ده.
د اسلامي امارت ویاند ذبیح الله مجاهد تېره اوونۍ ویلي وه، چې په هېواد کې د نشهیي توکو د کښت او قاچاق پر وړاندې جدي مبارزه روانه ده او په هېواد کې د نشهیي توکو د ټولو نښو د له منځه وړلو لپاره به ټینګه مبارزه وشي.
د ذبیح الله مجاهد د څرګندونو له مخې؛ د نشهیي توکو د قاچاق د مخنیوي لپاره هڅې روانې دي او د ۲۰۲۱ کال په اګست میاشت کې د اسلامي امارت له واک څخه د نشه یي توکو یو زیات شمېر قاچاق وړونکي نیول شوي او بندیان دي.
مجاهد ټینګار کړی: په افغانستان کې د نشهيي توکو ستونزه د حل په حال کې ده؛ سږ کال په ټول هېواد کې د کوکنارو کښت صفر ته نږدې شوى، که چا په غرنيو او لرې پرتو سيمو کې کرلي، نو له منځه ځي.
هغه دا هم څرګنده کړې: د نشهيي توکو د قاچاق په مخنيوي کې هم جديت شته او هره ورځ د نيولو د قضيو شاهدان يوو. په نږدې راتلونکي کې به انشاالله صفر ته ورسیږي.
نوموړي دغه راز ګاونډ او سيمه ييزو هېوادونو ته ډاډ ورکړ، چې له افغانستان څخه د نشهيي توکو د قاچاق په اړه اندېښنه ونهلري، بلکې له نشه يي توکو سره د مبارزې په برخه کې له دولت او خلکو سره همکاري او د کوکنارو د بديل کښت په موندلو کې مرسته وکړي.
تازه خبرونه
څار: د افغانستان په اړه پاکستان او قطر ته د امریکایي ډیپلوماټ سفرونه
تازه خبرونه
د سیمې هېوادونه باید په ګډه ثبات او پرمختګ ته زمینه برابره کړي – مولوي عبدالکبیر
د ریاست الوزراء سیاسي مرستیال په کابل کې د قزاقستان د لومړي وزیر له مرستیال سره په کتنه کې ویلي، چې د سیمې هېوادونه باید په ګډه د سترو سیمهییزو پروژو په پلي کولو کې ونډه واخلي.
د ریاست الوزراء سیاسي مرستیالۍ د خبرپاڼې له مخې؛ په دې ناسته کې مولوي عبدالکبیر د قزاقستان پانګوالو ته بلنه ورکړه، چې په افغانستان کې پانګونه وکړي.
نوموړي زیاته کړې؛ اسلامي امارت د افغانستان پولې په بشپړ ډول کنټرول کړي، نشهيي توکي او فساد یې له منځه وړی او خپلواک ملي حاکمیت ټینګ شوی دی.
د قزاقستان د لومړي وزیر د مرستیالۍ د خبرپاڼې له مخې؛ په افغانستان کې د اسلامي امارت له لوري د شویو پرمختګونو قدرداني کړې او څرګندوي، چې هېواد یې له افغانستان سره اوږد مهاله سوداګریزو اړیکو، ټرانزیټ او اوږدمهاله پانګونې ته چمتو دی.
ژومانګارين افغان ځوانانو ته د تحصيلي بورسونو د ورکړې د چمتوالي ترڅنګ زياته کړې، چې افغانستان اوسمهال په سيمه کې د يوه سولهييز هېواد بېلګه ده او له همدې کبله له اسلامي امارت سره په بېلابېلو برخو کې د اړيکو ټينګول غواړي.
د قزاقستان لومړي وزير مرستيال دغه راز د کابل او الماتا ترمنځ د مستقيمو الوتنو د پيل غوښتنه وکړه او څرګندوي، چې هېواد يې له افغان حکومت سره په فرهنګي برخه کې دوه اړخيزو همکاريو ته چمتو دى.
اسلامي امارت په تېرو درې کلونو کې پرلهپسې ټینګار کړی، چې په ټول افغانستان کې د امنیت له رامنځته کیدو سره د سترو اقتصادي پروژو پلي کېدا ته له بل هر وخت ډېره ښه زمینه برابره شوې او اړتیا ده، چې افغانستان د سیمې هېوادونه سره ونښلوي.
تازه خبرونه
له پاکستان څخه دې د افغان کډوالو د جبري ایستلو چټکتیا راکمه شي
د سره صلیب یوه لوړپوړي چارواکي د پاکستان له حکومته غوښتي؛ د افغان مهاجرینو د جبري ایستلو چټکتیا دې راکمه شي، چې ښه لاسرسي ورته شونی شي.
د سره صلیب او سرې میاشتې ټولنې د آسیا او پاسیفیک څانګې مشر الکساندر مټیو په دوحه کې خبریالانو ته ویلي، چې له پاکستان څخه د راستنیدونکیو افغان کډوالو پر وړاندې یوه ننګونه دا هم وه، چې په کابل کې یې د اسلامي امارت له چارواکو سره پرې خبرې کړې دي.
هغه زیاته کړې: تاسې پوهیږئ، چې په وروستیو میاشتو کې له نیم میلیون څخه ډېر خلک له پولې څخه را تېر شوي او شونې ده، چې مونږ به په راتلونکیو میاشتو کې د نويو راستنیدونکیو لوی شمېر وګورو.
د هغه د څرګندونو له مخې؛ دا له ۲۰۱۷ کال وروسته په آسیا کې د میانمار او بنګله دیش تر منځ د وګړو ترټولو لوی حرکت دی.
پاکستان د تېر کال له اکتوبر میاشتې راپدیخوا له ۵۰۰ زره ډېر بې اسناده افغان کډوال جبري راایستلي دي.
مټیو زیاتوي، چې ډېري راستانه شويو کسانو له لسیزو راپدیخوا په پاکستان کې ژوند کړی او له حکومت او نړیوال ملاتړ پرته په افغانستان کې د نوي ژوند پیلولو ته چمتو ندي.
د نوموړي د څرګندونو له مخې؛ د راستنېدونکیو نيمايي برخه ماشومان دي، چې په کې د خوارځواکۍ پېښې هم زياتوالی لري.
-
نړۍ4 days ago
د فلسطین پر رفح ښار اسرائیلي ځواکونو د ځمکنيو بریدونو ګواښ وکړ
-
لوبی4 days ago
اټکانرژۍ لوبډلې په نهمه سیالۍ کې سرخپوشانخوافي ته ۱ـ ۰ ماتې ورکړه
-
سیمه ییز خبرونه5 days ago
د غزې په شمال کې د قحطۍ خطر ډېر دی
-
سیمه ییز خبرونه4 days ago
امریکا دې د بشري حقونو په اړه دوه ګوني سیاست ودروي – ترکیه
-
لوبی4 days ago
ابو مسلم فراه اوومه لوبه له خراسان فاریاب لوبډلې څخه ۶ د صفر پر توپیر وګټله
-
تازه خبرونه16 hours ago
ترکمنستان د ټاپي پروژې بشپړولو ته ژمن دی – امانوف
-
سیمه ییز خبرونه17 hours ago
په عراق کې به همجنسبازان پر۱۵ کاله بند شي –پارلمان
-
لوبی14 hours ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل