د افغانستان اسلامي امارت د صنایعو او سوداګرۍ وزیر نورالدین عزیزي د چین له ځانګړي استازي یو شیاویونګ سره د لیدنې پر مهال په افغانستان کې د سوداګرۍ او پانګونې د فرصتونو پر پراختیا بحث اوخبرې کړې دي.

د صنایعو او سوداګرۍ وزارت د خپرې شوې خبرپاڼې له مخې؛ نورالدین عزیزي د پانګونې لپاره د خوندي او مناسب چاپېریال چمتو کولو د ډاډ ترڅنګ چینایي پانګوالو ته بلنه ورکړه، چې د دواړو هېوادونو د ګټو لپاره د افغانستان په بېلابېلو اقتصادي سکټورونو کې پانګونه وکړي.

هغه همدارنګه چین ته د افغانستان د صادراتو لپاره په ځانګړي توګه د پنبې، انارو، جلغوزیو، قیمتي او نیمه قیمتي ډبرو او نورو افغان صادراتي توکو په برخو کې د ډېرو آسانتیاوو پر رامنځته کېدا او برابرولو ټینګار وکړ او د دواړو هېوادونو ترمنځ یې د ګمرکي، ټرانزیټي او ټرانسپورتي آسانتیاوو د زیاتولو غوښتنه وکړه.

دغه راز د چین ځانګړي استازي هم د چینایي سوداګرو او پانګوالو د لېوالتیا د ډاډ وړاندې کولو تر څنګ ویلي، چې د چین په سټراټیژۍ کې افغانستان د پانګونې لپاره طبیعي او نه هېریدونکي فرصتونو لري.

هغه د دواړو هېوادونو د مسوولو ادارو او خصوصي سکټورونو د ملاتړ لپاره د اقتصادي اړیکو پراختیا اړینه وګڼله.

ویل کیږي، چې په دې لیدنه کې د دواړو هېوادونو د اړوند ادارو ترمنځ د سوداګریزو آسانتیاوو او د پانګونې د پراخولو لپاره پر ګډو همکاریو ټینګار وشو.

په افغانستان کې د ملګرو ملتونو د کډوالو عالي کمیشنرۍ استازي عرفات جمال ويلي، چې په ایران کې میشت ډېری افغانان له سختې پرېکړې سره مخ شوي دي.

عرفات جمال الجزیرې ته څرګنده کړې، چې ایران میشتي افغانان یا باید په دې هېواد کې جګړه او اقتصادي ستونزې وزغمي او یا هم افغانستان ته له راستانېدا سره ورته ننګونې وویني.

نوموړی وایي: ” داسې ښکاري، چې اوسمهال دا (د کډوالو راستنېدا) پوره پاملرنه غواړي. خلک د بمونو او مرمیو په اړه، چې پرې وریږي؛ خبرې کوي. دوی وېره لري؛ خو د خراب اقتصاد په اړه هم خبرې کوي.”

عرفات جمال ویلي، سږ کال شاوخوا ۱۱۰زره افغانان له ایران څخه راستانه شوي دي.

هغه پر ​​افغانستان د پاکستان پوځي یرغل ته د نغوتې( اشارې ) پر مهال ویلي: «د دې خلکو لپاره کومه ښه پرېکړه نه‌وینم؛ ځکه له یوې جګړې تښتي او بلې ته راستنیږي.»

جمال دا خبرداری هم ورکړی، چې ملګري ملتونه اوسمهال د راستنېدونکو د وضعیت د څارنې لپاره پوره مالي سرچینې نلري.

ویل کیږي، چې په ۲۰۲۵ ز.کال کې شاوخوا ۲.۸ میلیون افغانان هېواد ته راستانه شوي دي.