تازه خبرونه
د اسلامي امارت ځواکونو زمونږ له ملي حاکمیته سرغړونه کړې – پاکستان
د پاکستان بهرنیو چارو وزارت د دوشنبې پر ورځ څرګنده کړې؛ د افغانستان اسلامي امارت ځواکونو تېره اوونۍ د پاکستان په خاوره کې د پوځي تاسیساتو پر جوړولو کار کاوه، چې دا مو له ملي حاکمیته ښکاره سرغړونه ده.
یاد وزارت د تورخم دروازې د تړلو په اړه په یوه اعلامیه کې ویلي، چې د افغانستان اسلامي امارت اعلامیه حیرانوونکې ده؛ ځکه، چې لنډمهاله افغان چارواکي په تورخم کې د پاکستان – افغانستان د پولې د لنډمهاله تړل کېدا پر لاملونو ښه پوهیږي.
د اسلامي امارت بهرنیو چارو وزارت د شنبې پر ورځ ناوخته په یوه خبرپاڼه کې څرګنده کړه، چې د تورخم د لارې بندول او د پاکستانيو پوځیانو له لوري پر افغان پوله ساتو ډزې کول د ښه ګاونډیتوب له اړیکو سره په ټکر کې دي.
د دې وزارت د څرګندونو له مخې؛ د پاکستان سرحدي ساتونکیو د افغانستان اسلامي امارت پر ځواکونو هغه مهال ډزې وکړې، چې دوی د یوې پخوانۍ امنیتي پوستې د رغونې په حال کې ول. دا پېښه د چارشنبې پر ورځ رامنځته شوې، چې په پایله کې یې د تورخم پوله د ټولو ترافیکو پر مخ وتړل شوه.
په دې خبرپاڼه کې راغلي: د افغانستان اسلامي امارت د پاکستان له لوري د تورخم دروازې تړل او پر افغان امنیتي ځواکونو ډزې کول د ښه ګاونډیتوب خلاف بولي.
پاکستان د دوشنبې پر ورځ د افغانستان پر اسلامي امارت تور ولګاوه، چې د دوی په خاوره کې تاسیسات جوړوي.
پاکستان په خپله اعلامیه کې ویلي، چې په خپله خاوره کې د افغانستان د لنډمهالي حکومت له لوري د هر راز تاسیساتو جوړول ورته د منلو نهدي؛ ځکه، چې دا زمونږ له حاکمیته سرغړونه ده. د سپتمبر پر شپږمه نېټه افغان ځواکونو د یوه سولهییز حل پر ځای بې توپیره ډزې وکړې؛ د پاکستانيو پوځیانو پوستې یې پر نښه کړې، د تورخم په پوله کې یې بنسټیز تاسیسات زیانمن کړل او د افغان او پاکستاني ملکي وګړیو ژوند یې له خطر سره مخ کړ.
پاکستان ادعا کړې، چې دا ډزې بې بنسټه او بې دلیله وې.
د پاکستان په اعلامیه کې راغلي؛ د افغانستان د سرحدي امنیتي ځواکونو له لوري بې بنسټه ډزې هغه ترهګر عناصر زړور کوي، چې په افغانستان کې له خوندي پټنځایونه لري.
دغه راز دې ډلو ته په نغوته کې ویل شوي: دوی لکه څنګه، چې د ملګرو ملتونو د امنیت شورا تحلیلي ملاتړ او د بندیزونو د څار ډلې په خپل وروستي راپور کې تائید کړي؛ له خپلو خوندي پټنځایونو خوند اخلي.
دغه وزارت دا هم ویلي، چې پاکستان پر ګډه پوله د میشتو افغان ځواکونو له لوري د پرلهپسې غیر ضروري پارونو پر وړاندې له زغمه کار اخیستی او خبرو ته لومړیتوب ورکوي. لنډمهالي بندیزونه یوازې په سختو قضیو کې ترسره کیږي. لکه په پوله کې د ۲۰۲۳ کال د سپتمبر د ۶ پېښه یا کله، چې په پاکستان کې دننه د افغانستان خاوره د ترهګریزو بریدونو لپاره وکارول شي.
په دې اعلامیه کې راغلي: مونږ له افغان لنډمهالي حکومت څخه هیله کوو، چې د پاکستان اندېښنې په پام کې ونیسي؛ د پاکستان ځمکني بشپړتیا ته درناوی وکړي او ډاډ ترلاسه کړي، چې د افغانستان خاوره د پاکستان پر ضد د تروریستي بریدونو لپاره نه کارول کېږي.
دا په داسې حال کې ده، چې په سلګونه باروړونکي موټر پاکستان ته له تګ څخه منع شوي، چې د تازه میوو او سابو د خرابېدو شونتیا یې ډېره ده.
تازه خبرونه
جاپان د افغانستان له سیلاب ځپلیو سره د بېړنیو مرستو ژمنه وکړه
په افغانستان کې د جاپان سفارت د پنجشنبې پر ورځ په ډاګه کړه، چې د افغانستان د شمال له سیلاب ځپلیو خلکو سره به بېړنۍ مرستې وکړي.
د سفارت د خپرې شوې خبرپاڼې له مخې؛ دا مرستې به د جاپان د نړيوالې همکارۍ ادارې (JICA) له لارې د سره صليب او سرې مياشتې ټولنې (IFRC) او افغاني سرې مياشتې ټولنې (ARCS) پر همکارۍ ترسره شي.
دا مرست خیمې، کمبلې او نور اړین توکي رانغاړي.
په یادې خبرپاڼه کې راغلي؛ جاپان پرېکړه کړې، چې ډېر ژر به د افغانستان د سيلاب ځپلیو خلکو د مرستې لپاره بېړنۍ مرستې وکړي. مونږ تل د افغانستان د خلکو تر څنګ ولاړ یوو.
دغه راز د ملګرو ملتونو د بشري چارو د همغږۍ دفتر (OCHA) ویلي، چې په بغلان، بدخشان او تخار ولایتونو کې د سختو بارانونو او سیلابونو له کبله ۸ زره ۹۷۵ کورونه ویجاړ شوي او یا هم زیانمن شوي دي.
روسیې هم د اړتیا په صورت کې د مرستې ژمنه کړې ده.
دا په داسې حال کې، چې د اسلامي همکاریو ټولنې (OIC) هم له اسلامي هېوادونو او مرستندویه ټولونو غوښتي، چې د افغانستان له سیلاب ځپلیو سره مرسته وکړي.
تازه خبرونه
د ترکیې سفیر د افغانستان سیلاب ځپلیو ته د ۶۷۰ ټنو مرستې اعلان وکړ
په کابل کې د ترکیې سفیر د اقتصاد وزارت له چارسمبالي سره په کتنه کې څرګنده کړې، چې سبا (جمعه د غویی ۲۸ ) ته به د افغانستان د وروستیو سیلاب ځپلیو لپاره د لومړنیو توکو څه باندې۲۰ ټنه مرسته راولېږدول شي.
د اقتصاد وزارت د خبرپاڼې له مخې؛ جنګ اونال له دین محمد حنیف سره په کتنه کې له ترکیې څخه د ۶۵۰ ټنو نورو بشري مرستو له رالېدولو هم خبر ورکړی، چې په کې خیمې، خوراکي توکي، درمل، جامې او نور توکي شامل دي.
هغه دا ډاډ هم ورکړی، چې افغانستان ته به دا مرستې د اوسپنېپټلۍ له لارې د هرات تورغنډۍ بندر ته رادننه شي.
په دې کتنه کې دین محمد حنیف له دغو مرستو څخه د هرکلي تر څنګ ویلي، چې د ترکیې هېواد د تاریخ په اوږدو کې د افغانستان یو ښه دوست او همکار پاتې شوی دی.
تازه خبرونه
ملګري ملتونه غواړي په افغانستان کې د ځمکو خړبولو لپاره سولري پمپونه ولګوي
د ریاست الوزراء اداري مرستیال عبدالسلام حنفي د سې شنبې پر ورځ ( د غویی پېنځهویشتمه ) د ملګرو ملتونو د پروژې خدمتونو د دفتر (UNOPS) له اجرائیوي رییس جورج موریرا داسیلوا سره وکتل.
په دې کتنه کې جورج موریرا داسیلوا اداري مرستيال ته د خپلو تېرو هڅو او لاسته راوړنو په اړه معلومات ورکړل او څرګندوي؛ دا اداره غواړي، چې په افغانستان کې د سولري پمپونو پر لګولو د کرنيزو ځمکو د خړوبولو يوه نوې پروژه پيل کړي.
عبدالسلام حنفي د دې ادارې د فعالیتونو او لاسته راوړنو د ستاینې ترڅنګ ویلي، چې اسلامي امارت په افغانستان کې د (UNOPS) ادارې له هڅو ملاتړ کوي او د پروژو د پلي کولو لپاره یې لازمې اسانتیاوې برابروي.
ویل کیږي، چې عبدالسلام حنفي له ټولو نړیوالو مرستندویه بنسټونو وغوښتل، چې کروندګرو ته د کوکنارو د بدیل کښت او افغان ځوانانو ته د کار د زمینې په برابرولو کې همکاري وکړي.
-
تازه خبرونه4 days ago
الله ګل مجاهد د قتل پر تور ونیول شو
-
تازه خبرونه4 days ago
په بغلان کې سېلابونو ۱۹۴۵ کسانو ته مرګ او ژوبله اړولې
-
تازه خبرونه3 days ago
د اسلامي هېوادونو همکاریو ټولنې د افغانستان له سیلاب ځپلیو سره د مرستې غوښتنه وکړه
-
تازه خبرونه2 days ago
د یوناما استازې د ایران له بهرنیو چارو وزیر سره وکتل
-
لوبی2 days ago
د کابل کرکټ غوره لیګ لوبغاړو د داوطلبۍ مراسم ترسره شول
-
سوداگري4 days ago
افغانستان او پاکستان د بار وړونکیو موټرو پر نوي ټرانسپورټي میکانیزم هوکړه وکړه
-
تازه خبرونه4 days ago
څو ایراني شرکتونو د افغانستان په کانونو کې د پانګونې پرېکړه وکړه – قدیر قیافه
-
تازه خبرونه2 days ago
په ننګرهار کې د ناکامورا کانال پروژه بشپړه شوه