سوداگري
په جنورۍ میاشت کې د انفلاسیون عمومي کچه منفي ۱۰ اعشاریه ۲ سلنې ته راکښته شوې
نړیوال بانک په یوه راپور کې ویلي، چې د ۲۰۲۴ ز. کال په جنورۍ کې د افغانستان د انفلاسیون عمومي کچه له ټيټېدو سره مخ شوې او منفي ۱۰ اعشاریه ۲ سلنې ته ورسېده.
په دغه راپور کې راغلي، چې د عمومي انفلاسیون د کچې ټیټوالی پر ټولیزه ټوګه د خوراکي او غیر خوراکي توکو په بیو کې د پام وړ کمښت له امله رامنځته شوی دی.
پردې سربېره اصلي انفلاسیون په منفي حد کې دی، چې د ۶ اعشاریه ۵ سلنې منفي کچه یې ثبت کړې ده.
نړیوال بانک خبرداری ورکړی، چې د بیو راټیټېدل به له زیانمنو کورنیو سره مرسته وکړي؛ خو د هېواد لوی اقتصاد ته زیان رسوي.
د دغه بانک د راپور له مخې؛ د افغانستان صادرات د ۲۰۲۴ ز. کال په جنورۍ کې د تېر کال د جنورۍ پر پرتله له ۵ سلنې کمښت سره ۱۴۰ اعشاریه ۵ میلیون ډالرو ته رسېدلي دي.
هند ته د خوراکي توکو صادرات ۲۲ سلنه ډېر شوي او پاکستان ته ۱۸ سلنه کم دي.
د وارداتو ارزښت هم د روان کال په جنورۍ کې د تېر کال د جنورۍ پر پرتله ۳۷ سلنه ډېر شوی او ۸۳۰ میلیونه ډالرو ته رسېدلی دی.
د دغه راپور له مخې؛ په ۲۰۲۳ کال کې د افغانیو ارزښت د امریکايي ډالرو په مقابل کې ۲۷ سلنه لوړ شوی، چې ستر لامل یې هېواد ته د ملګرو ملتونو لهخوا د یو اعشاریه ۸ میلیارډ ډالرو لېږل او د ۲ میلیارډ ډالرو د افغانانو لهخوا خپلو خپلوانو ته استول دي.
نړیوال بانک زیاته کړې، چې د روان مالي کال په یوولس میاشتو کې د اسلامي امارت عواید له ټاکلي هدف دوه سلنه کم او ۱۸۹ میلیارډ افغانیو ته رسېدلي؛ خو سږ کال عایدات د تېر کال پر پرتله ۵ اعشاریه ۶ سلنه زیات شوي دي.
سوداگري
ازبکستان او پاکستان د افغان ټرانس اوسپنېپټلۍ پروژې پر پیلېدا ټینګار څرګند کړ
د ازبکستان او پاکستان د بهرنیو چارو وزیرانو د ازبکستان، افغانستان او پاکستان د اوسپنې پټلۍ پروژې پر ژر عملي کېدو ټینګار کړی دی.
د پاکستان د بهرنیو چارو وزیر له خپل ازبک سیال بختیار سیدوف سره په لیدنه کې د ازبکستان، افغانستان او پاکستان یا افغان ټرانس اوسپنې پټلۍ پروژې د چټکتیا غوښتنه کړې ده.
د دې وزارت خبرپاڼې له مخې؛ په دې ليدنو کې د دوه اړخيزو سوداګريزو اړيکو د پراختيا، د پانګونې او مخابراتي پروژو په اړه بحثونه وشول.
په خبرپاڼه کې راغلي، چې دواړو لوریو د “افغان ټرانس” پروژې عملي کېدل د سیمې د هېوادونو پر ګټه وګڼل او څرګندوي، چې دا پروژه به د جنوبي او مرکزي آسیا ترمنځ د سوداګرۍ پر لنډې او ډاډمنه لار بدله شي.
په دې کتنه کې د ازبکستان د بهرنیو چارو وزیر د افغان ټرانس اوسپنې پټلۍ پروژې د ژر تر ژره عملي کېدو لپاره د هڅو پر چټکتیا ټینګار څرګند کړ.
د پاکستان بهرنیو چارو وزارت اعلان کړی، چې د دغه هېواد د بهرنیو چارو وزیر په اسلامآباد کې له خپل ازبک سیال بختیار سیدوف سره په کتنه کې د ازبکستان، افغانستان او پاکستان د اوسپنې پټلۍ پروژې د چټکتیا غوښتنه وکړه. دواړو لوریو د “افغان ټرانس” پروژې پلي کېدل د سیمې د هېوادونو په ګټه وګڼل.
د دغې خبرپاڼې له مخې؛ د پاکستان بهرنیو چارو وزیر محمد اسحاق ډار د ازبکستان د بهرنیو چارو له وزیر بختیار سیدوف سره د پراخو دوه اړخیزو سوداګریزو اړیکو، پانګونې، امنیت، د خلکو تر منځ د اړیکو او ارتباطي پروژو پر ټولو اړخونو خبرې وکړې او د ازبکستان د ژر تر ژره تطبیق لپاره یې د افغانستان او پاکستان د اوسپنې پټلۍ پر پروژې ټینګار وکړ.
له دې مخکې د ازبکستان چارواکو داسې ټینګار کړی و: د افغانستان له لارې د اوسپنې پټلۍ، چې منځنۍ آسیا د افغانستان له لارې له پاکستان سره نښلوي، د ۲۰۲۷ کال تر پایه بشپړه شي.
تمه ده، چې دا ۷۶۰ کیلومټره د اوسپنې پټلۍ به د ازبکستان او پاکستان ترمنځ د کارګو د لېږد وخت هم راکم کړي. د “افغان ټرانس” پروژې یوه بله ګټه د توکو د لېږد رالېږد په لګښت کې ۴۰ سلنه کموالی دی.
اقتصادي شنونکي شبیر بشیري ویلي؛ د ازبکستان، افغانستان او پاکستان ترمنځ د اوسپنې پټلۍ جوړول د سیمې د هېوادونو ترمنځ د سوداګریزو او اقتصادي اړیکو په پراخولو او اسانتیا کې اغېزمن رول لري.
د يادونې وړ ده، چې د افغانستان، پاکستان او ازبکستان تر منځ د اوسپنې پټلۍ د جوړولو پلان په ۲۰۱۸ کال کې طرحه شو، چې څه باندې څلور نيم ميليارډ ډالر لګښت لري. په دې وروستیو کې اسلامي امارت ویلي، چې قطر هم د دې پروژې مالي ملاتړ اعلان کړی دی.
سوداگري
د تاتارستان سوداګر په افغانستان کې پر تېلو او ګازو پانګونې ته لیواله شول
د کانونو او پټرولیم وزارت ویلي، چې د دې وزارت چارسمبالي شهاب الدین دلاور په کابل کې د تاتارستان جمهوریت له یو شمېر سوداګرو، د تېلو او ګازو د پروسس کمپنیو له استازو سره وکتل.
د تاتارستان سوداګرو د کانونو او پټرولیم وزارت له رهبرۍ سره په لیدنه کې د تېلو او ګازو د استخراج او پروسس په برخه کې د خپلو کاري تجربو په اړه د معلوماتو وړاندې کولو ترڅنګ ویلي، چې افغانستان پر یو منظم سیسټم سربېره د بشپړ امنیت درلودونکی دی او د پانګونې لپاره په کې ښه زمینه برابره شوې ده. دوی وایي؛ زمونږ کمپنۍ لیواله ده، چې د افغانستان د تېلو او ګازو د سروې، اکتشاف او استخراج په برخه کې پانګونه وکړي.
د کانونو او پټرولیم وزارت چارسمبالي د دوی د پانګونې له لیوالتیا هر کلی کړی او وایي، چې له نېکه مرغه افغانستان په بېلابېلو برخو کې د تېلو او ګازو پراخې زېرمې لري، چې په ځانګړي توګه اوس د هرات ولایت د تېلو او ګازو بلاکونه هم اعلان ته سپارل د تاتارستان مسلمان هېواد سوداګر هم کولی شي د هېواد د تېلو او ګازو په زېرمو کې پانګونه وکړي او دا وزارت به د خپلو اړوند قوانینو له مخې پوره همکاري وکړي.
دا په داسې حال کې ده، چې نوموړي نن په کابل کې د ټاپي پروژې له اجرائیوي رییس او مل پلاوي سره د دې پروژې پر بېلابېلو خواوو هم بحث او خبرې کړې دي.
سوداگري
افغان – ترکمن شرکتونو د ودانیزو او خوراکي توکو تړونونه لاسلیک کړل
د افغانستان صنایعو او سوداګرۍ وزارت څرګنده کړې، چې د افغانستان او ترکمنستان شرکتونو د ودانیزو او خوراکي توکو په ګډون له ۱۰ ډېر تړونونه او دوه هوکړهلیکونه لاسلیک کړي دي.
دغه تړونونه هرات ولایت ته د ترکمنستان د سوداګرو پلاوي د سفر پر مهال د صنعت او سوداګرۍ وزارت د چارسمبالي نورالدین عزیزي په حضور کې لاسلیک شوي دي.
د صنایعو او سوداګرۍ وزارت د خبرپاڼې له مخې؛ نورلدین عزیزي د دغو تړونونو د لاسلیک په مراسمو کې څرګنده کړې: د افغانستان او ترکمنستان ترمنځ د سوداګریزو او اقتصادي اړیکو د پراختیا لپاره تر ټولو ښه فرصت برابر شوی، چې دواړه لوري باید پوره ګټه ترې پورته کړي.
د صنایعو او سوداګرۍ وزارت په خبرپاڼه کې راغلي؛ یاد تړونونه ترکمنستان ته د دغه وزارت د چارسمبالي د سفر او د ترکمنستان له ملي رهبر قربانقلي بردي محمدوف سره د کتنې په پایله کې لاسلیک شوي دي.
له دې مخکې د ترکمنستان دې پلاوي ویلي وه، چې د دوی موخه د دواړو هېوادونو د خصوصي سکټورونو ترمنځ د اقتصادي اړیکو پراخول دي؛ نو هڅه کوي هر کال له افغان صنعتکارانو څخه سلګونه ټنه ودانیز توکي لکه سیخ، رنګ او مرمر ډبرې واخلي.
-
تازه خبرونه4 days ago
په غور کې د سېلابونو له کبله سلګونه خلک بې ځایه شول
-
نړۍ2 days ago
حماس او اسرائیل کولی شي په غزه کې د اوربند په اړه واټن راکم کړي – امریکا
-
تازه خبرونه5 days ago
اسلامي امارت په بدخشان کې د اعتراضي لاريون د څېړلو لپاره یو پلاوي وټاکه
-
تازه خبرونه1 day ago
د پاکستان خاوره د افغانستان پر ضد کارول کیږي
-
تازه خبرونه4 days ago
په افغانستان کې پر کوکنارو د بندیز له کبله کروندګرو خپل عاید له لاسه ورکړی – نړیوال بانک
-
تازه خبرونه1 day ago
د سې شنبې پر ورځ خراسان او سرخ پوشان لوبډلو لوبه وګټله
-
نړۍ4 days ago
اسرائیلي ځواکونو بیت المقدس ته نږدې د الجزیرې پر رسنیز دفتر چاپه ووهله
-
تازه خبرونه2 days ago
دولتي بنسټونه د برښنا له شرکت څخه یو نیم میلیارډ افغانۍ پوروړي دي