د کورنیو چارو وزارت د خپرې شوې خبرپاڼې له مخې، د دې وزارت د وزیر خلیفه سراج‌الدین حقاني پر مشرۍ د رهبرۍ غونډه ترسره شوه.

په خبرپاڼه کې راغلي، چې خلیفه سراج‌الدین حقاني د اسلامي امارت د رهبر له لوري د کورنیو چارو وزارت لپاره د نوي توشیح شوي قانون پر پلي کېدا او په محرم الحرام کې د امنیتي تدابیرو پر نیولو ټینګار کړی دی.

نوموړي همداراز د خلکو د فردي او ټولنیز امنیت د بشپړ ټینګښت، د ولس د باور د پیاوړتیا او له جرمونو سره د مبارزې ریاست د تخنیکي امکاناتو او مسلکي وړتیاوو د لوړولو پر اړتیا هم ټینګار کړی دی.

ویل کیږي، چې په دې غونډه کې پر امنیتي موضوعاتو سربېره د بېلابېلو چارو پر اړوند برخو ټینګار وشو او مسوولانو هم د خپلو اړوند فعالیتونو راپورونه وړاندې کړل.

یو بریټانوي چارواکي له پاکستان او افغانستان څخه غوښتنه کړې، چې د کړکېچونو د کمولو او د امنیتي اندېښنو د حل لپاره دې خبرو اترو او دوه‌اړخیزو همکاريو ته لومړیتوب ورکړي.

د بریتانیا د بهرنیو چارو وزارت د منځني ختیځ، افغانستان او پاکستان په چارو کې مرستیال وزیر همیش فالکنر اسلامآاباد ته د سفر پر مهال له «ډان» ورځپاڼې سره په مرکه کې ویلي، چې بریټانوي چارواکي د وضعیت د ښه درک لپاره له پاکستانيو همکارانو سره نږدې اړیکې لري.

فالکنر ویلي: «د پرمختګ تر ټولو ښه او اغېزمنه لاره خبرې اترې دي.»

هغه زیاته کړې؛ کابل او اسلام‌آباد باید ډاډ ترلاسه کړي، چې د هیڅ یو هېواد له خاورې د بل هېواد پر ضد د ګواښ یا برید لپاره کار نه اخیستل کېږي.

نوموړي همدارنګه په سیمه کې د ملکي تلفاتو په اړه اندېښنه ښودلې او څرګندوي، چې هیڅ هېواد نه غواړي ملکي وګړي زیانمن شي، نه په پاکستان کې او نه په افغانستان کې.

فالکنر په پاکستان کې د افغان کډوالو موضوع ته په نغوته کې د نړیوالو حقوقي اصولو د رعایت غوښتنه کړې؛ خو دا مسئله یې پېچلې بللې ده.

هغه ویلي، د دې ستونزې حل تر ډېره د افغانستان او پاکستان ترمنځ له همکارۍ او همغږۍ سره تړاو لري.

د نوموړي څرګندونې په داسې حال کې وړاندې کېږي، چې په وروستیو میاشتو کې د افغانستان او پاکستان ترمنځ کړکېچونه زیات شوي او پاکستانیو چارواکو تل په پاکستان کې د بریدونو لپاره د افغان خاورې د کارولو غږ پورته کړی دی؛ خو اسلامي امارت دا ادعاوې رد کړي او څرګندوي، چې هیڅ ډلې ته به د نورو پر وړاندې د افغان خاورې د کارولو اجازه ورنه‌کړي.