د مسکو چارواکو ویلي، د شنبې پر ماښام د روسیې د پلازمېنې مسکو په مرکزي برخه کې د یوه لوکس رسټورانټ ترڅنګ د یوې ښځې له لوري لېږدول شوې کورني جوړ شوي چاودېدونکو توکو چاودنه کړې، چې له کبله یې درې کسان وژل شوي او لږ تر لږه ۲۱ نور ټپیان دي.

د رویټرز د راپور له مخې پولیسو ویلي، چاودنه د ځايي وخت له مخې د ماښام له ۸ بجو مخکې د مسکو د کودرینسکایا څلورلارې یوه ایټالوي رسټورانټ ته څېرمه شوې ده. دغه رسټورانټ د سټالین د دورې د مسکو له اووه لوړو ودانیو څخه په یوه کې موقعیت لري.

د روسیې د ترهګرۍ ضد کمیټې ویلي، یوې نامعلومې ښځې هڅه کړې وه، چې رسټورانټ ته ننوځي؛ خو امنیتي ساتونکي یې مخه نیولې ده.

د روسیې دولتي خبري آژانس«ریا نووستي» د راپور له مخې؛ دغه ښځه امنیتي ساتونکی او د بالزي روسي ایټالوي رسټورانټ یو پېرېدونکی په ورپسې چاودنه کې وژل شوي دي.

پولیسو ویلي، ټپیانو ته د ټپونو کچه توپیر لري او روغتیايي مرکزونو ته لېږدول شوي دي.

د روسیې دولتي خبري آژانس«ریا نووستي» له پېښې څخه یوه ویډیو خپره کړې، چې په کې درندې وسلې سمبال امنیتي ځواکونه ښکاري. د پېښې ځای د خلکو پر مخ تړل شوی و.

چارواکو د وژل شویو او ټپیانو هویت نه‌دی څرګند کړی او نه یې ویلي، چې د دې پېښې تر شا د چا لاس دی.

روسیه له اوکراین سره د بشپړې کچې جګړې له پیل څخه نږدې پېنځه کلونه په جګړه کې ښکېله ده.

د روسیې د امنیت فډرالي ادارې(اف‌اس‌بي) د روان کال په پیل کې ویلي وه، چې د هغو وژنو او د وژنې د هڅو له لړۍ وروسته، چې مسکو یې پړه پر کیف اچولې؛ د لوړپوړیو پوځي چارواکو د ساتنې چارې به نورې هم پیاوړې کړي.

د «کومرسنت» ورځپاڼې د خپلو سرچینو د څرګندونو له مخې ویلي، چاودېدونکې توکي د دې لپاره جوړ شوي وه، چې د رسټورانټ د دوبي په بهرنۍ چوتره کې ناست میلمانه ووژني یا ټپیان کړي.

ورځپاڼې اټکل کړی، چې ښايي چاودنه د لرې کنټرول له لارې شوې وي او هغه ښځه، چې وسیله یې لېږدوله؛ ښايي نه پوهېده، چې دا چاودېدونکې توکي یا وسیله ده.

د رسټورانټ په اوبپاڼه کې لیکل شوي، چې دغه ځای د شنبې پر ورځ د یوې ځانګړې غونډې لپاره تړل شوی و.

د امریکا ولسمشر ډونالډ ټرمپ ویلي، که د ایران د اټومي پروګرام په اړه د اندېښنو د پای ته رسېدا او د هرمز تنګي د بېرته پرانیستل کېدا لپاره ژر هوکړې ته ورسېږي؛ نو پر ایران نوی برید به وځنډوي.

ټرمپ په ټولنیزه شبکه «ټروت سوشیل» کې لیکلي، چې ایران او «د منځني ختیځ نورو هېوادونو» د دې لپاره د وخت غوښتنه کړې، چې نه یوازې هوکړه بشپړه او د هرمز تنګی اړخیز پرانیستل شي، بلکې د ایران اټومي ګواښ هم ورسره پای ته ورسیږي.

هغه زیاته کړې، د همدې غوښتنې له مخې یې پلان شوی برید درولی؛ خو په دې شرط، چې هوکړه به په لنډ وخت کې رامنځته شي.

ټرمپ همداراز ویلي، چې اسرائیل هم په دې ژمنه کې ورسره مل دی؛ خو اسرائیلي چارواکو تر اوسه په دې اړه رسمي څرګندونې نهءدي کړي.

دغه راز د ایران بهرنیو چارو وزیر عباس عراقچي له ترکیې، پاکستان او سعودي عربستان له لوړپوړیو چارواکو سره په بېلابېلو ټیلیفوني خبرو کې د امریکا د هر راز پوځي کړنې په اړه خبرداری ورکړی او څرګندوي، چې تهران به د هر راز «تېري» پر وړاندې پرېکنده ځواب ورکړي.

عراقچي د پاکستان له لوی درستیز عاصم منیر او د ترکیې د بهرنیو چارو له وزیر هاکان فیدان سره په خبرو کې د بې‌ثباته کوونکو کړنو د پایلو او په سیمه کې د ناامنۍ د زیاتېدا د خطر په اړه خبرې کړې دي.

دغه راز د ایران بهرنیو چارو وزیر د سعودي عربستان بهرنیو چارو وزیر فیصل بن فرحان آل سعود ته ویلي، چې د امریکا او اسرائیلو هر راز برید یا په داسې کړنو کې د سیمې د هېوادونو ګډون به د ایران له «متناسب ځواب» سره مخ شي.

همدارنګه یوه امریکايي چارواکي ویلي، چې د سعودي عربستان ولیعهد محمد بن سلمان له ټرمپ سره په ټیلیفوني خبرو کې د ایران په اړه د امریکا د پلانونو په اړه اندېښنه ښودلې او د دې موضوع په اړه یې وضاحت غوښتی دی.

بل لور ته د ایران له امنیتي ادارو سره نږدې یوې رسنۍ خبرداری ورکړی، چې د ایران د انرژۍ پر بنسټیزو ودانیو برید ښايي په سیمه کې د تېلو او ګازو پر بنسټیزو ودانیو د غبرګونونو لامل شي.

ټرمپ له دې مخکې ویلي وه، چې د امریکا مرکچیان، د بهرنیو چارو وزیر مارکو روبیو، د امریکا ځانګړی استازی سټیو ویټکاف او د هغه زوم جیرډ کوشنر اوس هم هڅه کوي له ایران سره یوې هوکړې ته ورسېږي؛ خو هغه په ورته وخت کې تهران د ژمنو پر ماتولو تورن کړی دی.

د امریکا او ایران ترمنځ وروستیو نښتو او کړکېچونو د نړۍ د انرژۍ د لېږد مهمې لارې، هرمز تنګي د امنیت په اړه اندېښنې زیاتې کړي او د نړیوالو بازارونو د تېلو بیې ورسره لوړې شوې دي.

د پاکستان په خیبرپښتونخوا ایالت کې پر امنیتي پوسته د وسله‌والو د برید له کبله لږ تر لږه ۱۵ کسان، چې اووه پولیس او اته وسله‌وال دي؛ وژل شوي دي.

د پاکستاني رسنیو د راپورونو له مخې، دغه برید د چارشنبې پر ماښام د هنګو په اړوند سیمه کې شوی دی.

د یادې ولسوالۍ د پولیسو مسوول طارق حبیب ویلي، په دې پېښه کې ۲۲ نور پولیس هم ټپیان دي او امنیتي ځواکونو په سیمه کې د چاڼیزو عملیاتو لړۍ پیل کړې ده.

تر اوسه کومې وسله‌والې ډلې د دې برید مسوولیت نه‌دی منلی.

دا پېښه یوازې څو ورځې وروسته له هغې رامنځته شوې، چې د خیبرپښتونخوا د ټانک ولسوالۍ پر امنیتي پوسته ورته برید وشو.

په هغه برید کې وسله‌والو د چاودېدونکو توکو ډک موټر کارولی او پر امنیتي پوستې برید وکړ، چې له کبله یې ۱۵ کسان د پوځیانو، پولیسو او دولتي کارکوونکو په ګډون وژل شوي وه.

د پاکستان پوځ ویلي وه، چې په ځوابي عملیاتو کې یې ۱۲ وسله‌وال هم وژلي دي.

خیبرپښتونخوا په وروستیو میاشتو کې د وسله‌والو بریدونو د زیاتوالي شاهده ده.

پاکستاني چارواکو څو ځله دا بریدونه په افغانستان کې مېشتو ډلو پورې تړلي بللي، خو اسلامي امارت دغه تورونه رد کړي او د پاکستان په ناامنۍ کې یې هر ډول لاس لرل نه‌دي منلي.