د ریاست‌الوزرا اقتصادي مرستیال ملا عبدالغني برادر د پنجشنبې پر ورځ( د چنګاښ اته‌لسمه) د پروان ولایت په جبل‌السراج ولسوالۍ کې د افغانستان د سمنټو د دوه‌یمې سترې کارخونې د بنسټ ډبره کېښوده.

ملا عبدالغني برادر د پروژې د پرانیستې په مراسمو کې ویلي، چې دا پروژه د افغانستان د صنعت د پیاوړتیا، اقتصادي ځان‌بساینې او د کورني تولید د زیاتوالي پر لور یو اړین ګام دی.

هغه زیاته کړې، افغانستان د پراخو طبیعي سرچینو، وړ بشري ځواک او مناسب جغرافیایي موقعیت له کبله د صنعتي پراختیا لپاره پراخ ظرفیتونه لري.

د نوموړي د څرګندونو له مخې، د اسلامي امارت له بیا واکمنېدا وروسته په هېواد کې سراسري امنیت ټینګ شوی، اداري فساد په بې‌ساري کچه کم شوی، اداري چارې ساده شوي او د پانګونې لپاره ډاډمن چاپېریال رامنځته شوی دی.

ملا عبدالغني برادر وایي، اسلامي امارت هڅه کوي د افغانستان اقتصاد پر وارداتو له متکي اقتصاد څخه پر کورني تولید او صادراتو ولاړ اقتصاد ته واړوي.

هغه د بنسټیزو او ودانیزو پروژو په پلي کولو کې د سمنټو پر اهمیت ټینګار وکړ او څرګندوي، چې د کورني تولید زیاتوالی به د وارداتو اړتیا کمه، د هېواد د اسعارو د وتلو مخه ونیسي او زرګونه کاري فرصتونه به رامنځته کړي.

هغه له بهرنیو پانګوالو هم وغوښتل، چې د افغانستان په بېلابېلو اقتصادي برخو کې پانګونه وکړي.

د ریاست‌الوزراء اداري مرستیال عبدالسلام حنفي هم په دغو مراسمو کې ویلي، چې دغه کارخانه به په هرو ۲۴ ساعتونو کې ۵ زره ټنه سمنټو د تولید وړتیا ولري او د هېواد د اړتیاوو د پام وړ برخه به پوره کړي.

حنفي زیاته کړې، د اسلامي امارت له بیا واکمنېدا او د امنیت له ټینګښت وروسته د هېواد د رغونې او پراختیا چارې چټکې شوې دي؛ خو د سمنټو کورنی تولید اوس هم د هېواد د اړتیاوو د پوره کولو لپاره بسنه نه‌کوي.

د نوموړي د څرګندونو له مخې، په وروستیو څو کلونو کې د سمنټو څو نوې کارخونې هم جوړې شوې دي.

د امارتي شرکتونو لوی رییس احمدجان بلال ویلي، چې افغانستان به په نږدې راتلونکې کې د سمنټو د تولید په برخه کې پر ځان‌بسیا شي او د دې محصول له واردولو به بې‌نیازه شي.

د اوبو او انرژۍ وزیر محمد یونس آخوندزاده هم ویلي، چې افغانستان د برښنا د تولید لپاره پراخې سرچینې لري او باید په دې برخه کې هم ځان‌بساینې ته ورسېږي.

د کانونو او پټرولیم وزیر هدایت‌الله بدري ویلي، چې په هېواد کې د سمنټو د تولید د کارخونو شمېر ۹ ته رسېدلی دی.

نوموړي زیاته کړې، د دغو کارخونو له فعالېدو سره به د افغانستان د سمنټو د تولید ظرفیت په ورځ کې شاوخوا ۳۰ زره ټنو ته ورسېږي.

هغه همداراز ټینګار څرګند کړ، چې افغانستان د سمنټو، ‌سیخ او ګاډر د تولید په برخه کې ځان‌بساینې ته نږدې شوی او د کورنیو صنعتونو د پراختیا لپاره هڅې روانې دي.

د هندوستان ټایمز ورځپاڼې راپور ورکړی؛ هند او افغانستان هوکړه کړې، چې د کرنې او مالدارۍ په برخو کې د اوږدمهالې همکارۍ د نقشې د جوړولو لپاره ګډه کاري ډله رامنځته کړي. د راپور له مخې، د دې ډلې موخه د تخمونو، اوبولګولو، کرنیزو څېړنو او د کرنیزو محصولاتو د سوداګرۍ په برخو کې د همکاریو پراختیا ده.

دغه هوکړه د افغانستان د کرنې، اوبولګولو او مالدارۍ وزیر، مولوي عطاالله عمري او د هند د کرنې وزیر، شیو راج سنګهـ چوهان، ترمنځ په نوي ډیلي کې د شوې لیدنې پر مهال شوې ده.

د هندوستان ټایمز د راپور له مخې، د هند د کرنې وزارت ویلي، چې دا ګډه کاري ډله به د دواړو هېوادونو ترمنځ منظم تعامل پیاوړی کړي او د کابل او نوي ډیلي د لومړیتوبونو له مخې به د همکارۍ نوې برخې وپېژني.

په دې لیدنه کې افغان پلاوي له هند څخه غوښتي، چې د پرمختللو تخمیزو ټکنالوژیو پر کارولو او د کرنیزو څېړنو د پراختیا له لارې د غنمو د تولید په زیاتولو کې همکاري وکړي.

په مقابل کې د هند د کرنې وزیر ویلي، چې هېواد یې چمتو دی افغانستان ته د غنمو، جوارو او کچالو لوړکیفیته تخمونه، د اقلیمي بدلونونو پر وړاندې مقاوم او مغذي ډولونه او همداراز د هند د کرنیزو څېړنو شورا علمي پوهه او تجربې برابرې کړي.

د اوبو د سرچینو مدیریت او د اقلیمي بدلونونو له شرایطو سره سمه کرنه هم د دې لیدنې مهم محورونه ول.

د راپور له مخې، افغان پلاوي د اوبولګولو، د اوبو زېرمه کولو، د اوبو د حوزو د مدیریت او د اوبو د کمښت او د اقلیمي بدلونونو د اغېزو د مخنیوي په برخو کې د هند د همکارۍ غوښتنه کړې ده.

د هند د کرنې وزیر هم ویلي، چې هېواد یې چمتو دی د څاڅکي اوبولګولو، د باراني اوبو د راټولولو، د کرنیزو ډنډونو او کوچنیو بندونو د جوړولو او د اوبو د اغېزناک مدیریت د ټکنالوژیو تجربې له افغانستان سره شریکې کړي.

دواړو لوریو د کرنیزو څېړنو، روزنې او د تخنیکي وړتیاوو د لوړولو په برخو کې د همکاریو د پراختیا په اړه هم خبرې کړې دي.

شیو راج سنګهـ چوهان له دې لیدنې وروسته خبریالانو ته ویلي، چې هند او افغانستان ډېرې لرغونې او تاریخي اړیکې لري او د کرنیزو همکاریو د پیاوړتیا په اړه د دواړو لوریو خبرې په خورا دوستانه فضا کې ترسره شوې دي.

زرګونو کسانو د پنجشنبې پر ورځ په کابل کې د افغانستان کرکټ ملي لوبډلې د پخواني لوبغاړي شاپور ځدراڼ د جنازې او خاورو ته سپارلو په مراسمو کې ګډون وکړ او د هېواد د کرکټ له یوې اغېزمنې څېرې سره یې وروستۍ مخه ښه وکړه.

د نوموړي د جنازې لمونځ د پنجشنبې پر سهار(۱۰ بجو) د کابل په عیدګاه جومات کې ادا شو او وروسته یې جسد د مرنجان په غونډۍ کې خاورو ته وسپارل شو.

په دغو مراسمو کې د افغانستان کرکټ ملي لوبډلې مخکښو لوبغاړو؛ راشد خان، محمد نبي او مجیب‌الرحمن، د نوموړي د کورنۍ غړو، چارواکو، لوبغاړو او زرګونو مینه‌والو ګډون کړی و او د افغانستان کرکټ له یوه مخکښ لوبغاړي سره یې وروستۍ مخه ښه وکړه.

د شاپور ځدراڼ جسد د چارشنبې پر ورځ( د چنګاښ اووه‌لسمه) له هند څخه، چې د خپلې ناروغۍ د درملنې لپاره په یوه روغتون کې بستر و؛ د کام‌ایر په الوتکه کابل ته راولېږدول شو او د سې‌شنبې( دچنګاښ پر شپاړلسمه) پر ورځ یې د ورپېښې ناروغۍ له کبله ساه ورکړې وه.

شاپور ځدراڼ د افغانستان لپاره په ۴۴ یو ورځنیو، ۳۶ شل‌آوریزو نړیوالو او یوې ټسټ لوبه کې برخه اخیستې وه او نړیوالو سیالیو ته یې د افغانستان په لاره موندلو کې یې خپله ونډه ترسره کړه.

د نوموړي له مړینې وروسته د افغانستان او نړۍ له بېلابېلو برخو د کرکټ لوبغاړو، پخوانیو ملګرو او مینه‌والو د خواخوږۍ او درناوي پیغامونه خپاره شوي دي. ډېری کسان شاپور ځدراڼ د افغانستان کرکټ د بریاوو له بنسټګرو او هغو لوبغاړو څخه ګڼي، چې افغانستان یې د نړیوال کرکټ د راڅرګندېدونکي ځواک په توګه نړۍ ته وروپېژاند.