د امریکايي رسنیو د راپورونو له مخې؛ ۳۲ کلن افغان محمد داوود الکوزي د اوکټوبر پر شپږمه د ټکزاس ایالت په فورت‌ورټ فډرالي محکمه کې د ځانمرګي برید د ترسره کولو په اړه د انلاین ګواښیز پیغام د لېږلو پر تور پر خپل جرم اعتراف کړی دی.

د راپورونو له مخې؛ نوموړي دا ګواښ د ۲۰۲۵ز. کال په نومبر کې د خواله رسنۍ د یوې ژوندۍ خپرونې پر مهال کړی و او د دغې وینا ځینې برخې وروسته په ټک‌ټاک او نورو خواله رسنیو کې خپرې شوې. امریکايي چارواکو د خلکو له راپورونو وروسته هغه وپېژاند او ویې نیوه. په داسې حال کې، چې د الکوزي د کور او ګرځنده ټیلیفون له پلټنې وروسته هېڅ ډول چاودېدونکي توکي یا د بم جوړولو وسایل موندل شوي نه‌دي.

چارواکو ویلي، داسې شواهد یې هم  موندلي نه‌دي، چې نوموړي په رښتیا د برید د ترسره کولو نیت درلود.

الکوزی اوس د پېنځه کلونو له فډرالي بند، ۲۵۰ زره ډالرو جریمې او تر درې کلونو پورې قضايي څارنې سره مخ دی. د نوموړي د سزا د اعلان نېټه تر دې دمه ټاکل شوې نه‌ده.

د ډله‌ییز امنیت تړون ټولنې «سي‌اس‌ټي‌او» څرګنده کړې، چې د اوکټوبر پر پېنځلسمه او شپاړلسمه به په مسکو کې د دې ټولنې، د ګډو ګټو خپلواکو هېوادونو او د شانګهای همکاریو ټولنې د غړیو هېوادونو ګډه غونډه جوړه شي.

په دې غونډه کې به د منځنۍ آسیا او افغانستان امنیتي مسایل وڅېړل شي.

دغه راز د ډله‌ییز امنیت تړون ټولنه د ګډ امنیت شورا غونډه به د نومبر پر لسمه او یوولسمه په مسکو کې جوړه شي، چې په کې به د ډله‌ییز امنیت د نظام پیاوړتیا او د غړیو هېوادونو ترمنځ د امنیتي همکاریو پراختیا وڅېړل شي.

ټاکل شوې، چې په دې غونډه کې به د ډله‌ییز امنیت نظام د پیاوړتیا او د غړو هېوادونو ترمنځ د امنیتي همکاریو د پراختیا لپاره هم پرېکړې وشي.

د پاکستان لومړي وزیر شهباز شریف ټینګار کړی، چې سوله‌ییز او باثباته افغانستان د پاکستان پر ګټه دی؛ خو په ورته وخت کې یې له هغو ترهګرو ډلو سره د مبارزې لپاره د« ځانګړو او د تائید وړ» هڅو غوښتنه کړې، چې له افغانستان څخه فعالیت کوي.

 د پاکستان د لومړي وزیر دفتر ویلي، شریف دغه څرګندونې د چارشنبې پر ورځ په اسلام‌‌آباد کې د ملګرو ملتونو له سرمنشي انټونیو ګوټرش سره په لیدنه کې کړې دي.

د پاکستان لومړي وزیر د هغه څه په اړه جدي اندېښنه څرګنده کړې، چې نوموړي« له افغانستان څخه راولاړه ترهګري» بللې ده.

هغه ویلي؛ پاکستان د سوله‌ییز او باثباته افغانستان غوښتونکی دی؛ خو ټینګار یې کړی: د هغو ډلو پر وړاندې باید ځانګړې هڅې ترسره شي، چې اسلام‌آاباد یې له افغانستان څخه پر بریدونو ترسره کولو تورنوي.

د اسلامي امارت چارواکو پر ځلونو هغه ادعاوې رد کړي، چې ګواکې له افغانستان څخه وسله‌والو ډلو ته د نورو هېوادونو پر وړاندې د فعالیت اجازه ورکول کېږي.