تازه خبرونه
د پاکستان ویزه په تور بازارکې پر ۲۰۰ دالرو پلورل کیږي
خلک وایي، په سلګونو کسان هره ورځ د پاکستان سفارت ته د ویزې د تر لاسه کولو لپاره ورځي؛ خو په اوونیو کې هم ویزه نشي اخیستی؛ ځکه د هرې ویزې په مقابل کې ترې د پیسو غوښتنه کیږي.
سهار وختي د پاکستان سفارت مخې ته د سلګونه افغانانو کتار جوړیږي؛ دوی ډېرې ورځې منډې ترړي کوي، چې ویزه ترلاسه کړي.
یو شمېر کسان وايي، چې که پیسې ورکړو؛ نو په بیړه ویزه ورکول کیږي.
د ویزې غوښتونکی محمد عزیز نومی وایي؛ شپږ ورځې کیږي، چې د ویزې د تر لاسه کولو لپاره له میدان وردکه راغلی یم. په داسې حال کې، چې ناروغ هم یم؛ خو له ما دوه سوه دالر غوښتل کیږي. زه نه پوهیږم، چې دا ستونزه ولې نه حل کیږي.
د ویزې غوښتونکی غلام اصغر وایي؛ بېکاري او غریبي ده؛ خو د پاکستان ویزې په بدل راڅخه پیسې غوښتل کیږي. دا ډېره بده ستونزه ده، چې ورسره مخ یم.
د کورنیو چارو وزارت وايي، چې د پاکستان د ویزو په مالي فساد کې ککړ لس کسان نیول شوي او د خلکو د دغو ستونزو د حل لپاره یې څارنه هم ډېره کړې ده.
د کورنیو چارو وزارت د ویاند مرستیال نصرت الله رحیمي وایي، چې ستونزې شته؛ خو کورنیو چارو وزارت د استخباراتو څانګې ته سپارښتنه کړې، چې خپلې څارنې ډېرې او رشوت خواره کسان ونیسي.
نوموړی زیاتوي؛ مونږ په دې اړه تر دې دمه لس کسان له پېژندلو وروسته نیولي دي.
خلک وایي؛ زیاتره افغانان د درملنې، د کورنیو د غړیو د لیدو او نورو اړتیاوو له مخې پاکستان ته سفرونه کوي. له هغې ورځې څخه، چې پاکستان ته د سفر ویزه اړینه شوې، له ګڼو ستونزو سره مخ یو او چارواکي هم د دغو ستونزو د حل لپاره مناسب ګامونه نه پورته کوي.
تازه خبرونه
د دفاع وزارت چارسمبالي د قطر د بهرنیو چارو وزارت له مرستیال سره وکتل
د ملي دفاع وزارت وياند ويلي، چې د دفاع وزارت چارسمبالي محمد يعقوب مجاهد نن (پنجشنبه د غبرکولي درېیمه ) په کابل کې د قطر د بهرنيو چارو وزارت له مرستيال محمد بن عبدالعزيز الخليفي سره وکتل.
د دفاع وزارت ویاند عنايت الله خوارزمي څرګنده کړې، چې په دې کتنه کې محمد یعقوب مجاهد په هېواد کې د وروستۍ زلزلې او سېلاب له زیانمنو کسانو سره د قطر له بشري مرستو مننه وکړه.
د خبرپاڼې له مخې؛ مجاهد دغه راز له قطر سره د اړیکو پر پیاوړتیا او د همکاریو پر دوام ټینګار کړی دی.
ویل کیږي، چې د قطر د بهرنیو چارو وزارت مرستیال د افغانستان خلکو ته د دوستانه اړیکو د ټینګښت او په بېلابېلو برخو کې د ډېرو نورو همکاریو د دوام ډاډ ورکړ.
تازه خبرونه
اسلامي امارت دې د دوحې په غونډه کې ګډون وکړي – قطر
د قطر بهرنیو چارو وزارت مرستیال کابل ته راغلی او اسلامي امارت ته یې د دوحې په درېیمه ناسته کې د ګډون بلنه ورکړې ده.
محمد بن عبدالعزیز الخلیفي د پنجشنبې پر ورځ ( د غبرګولي درېیمه ) د ریاست الوزراء له اقتصادي مرستیال سره په لیدنه کې ویلي، چې دغه غونډه به د اسلامي امارت د استازي په شتون کې بې پایلې نهوي. نوموړي زیاته کړې، چې د اسلامي امارت له استازي پرته به دا ډول غونډې بې پالې وي او په دې اړه یې ملګرو ملتونو ته هم خپل دریځ روښانه کړی دی.
دې قطري چارواکي دا هم ویلي؛ هېواد یې له نړیوالو هوايي شرکتونو سره کار کوي، چې د قطر او کابل ترمنځ د سوداګریزو اړیکو د پراخولو لپاره د یوه ځانګړي میکانیزم له مخې په افغانستان کې خپلې الوتنې پیل کړي. له همدې کبله به په نږدې راتلونکي کې یو شمېر قطري سوداګر کابل ته سفر وکړي.
د ریاست الوزراء اقتصادي مرستیال ملا عبدالغني برادر په دوحه کې درېيمې ناستې ته په نغوته کې څرګنده کړې: د افغانستان په اړه جوړې شوې غونډې او نړيوال کنفرانسونه د اسلامي امارت له استازي پرته کومې پايلې ته نه رسېږي؛ نو لازمه ده، چې په داسې غونډو کې د اسلامي امارت دریځ ته درناوی وشي.
د ریاست الوزراء اقتصادي مرستيال هم له افغانستان سره د قطر له مرستو مننه وکړه او زياتوي، چې اوسمهال په افغانستان کې د پانګونې زمينه برابره شوې او قطري پانګهوال کولى شي په دې هېواد کې پانګونه وکړي.
تازه خبرونه
د افغانستان اسلامي امارت د سیاسي کمیسیون غونډه ترسره شوه
د پنجشنبې پر ورځ (د غبرګولي درېیمه) په سپیدار ماڼۍ کې د افغانستان اسلامي امارت د ریاست الوزراء د سیاسي مرستیال موموي عبدالکبیر پر مشرۍ د سیاسي کمیسیون غونډه ترسره شوه.
په دې غونډه کې د هېواد او سیمې د وروستیو حالاتو، د دوحې د راتلونکې ناستې او اړمنو ته د بشري مرستو د رسولو په اړه هراړخیزې خبرې وشوې.
دغه راز د سیاسي کمیسیون په دې غونډه کې له یو شمېر هېوادونو سره د اړیکو پر پراختیا او تعامل بحث وشو او د اجنډا پر اساس لازم تصمیمونه ونیول شول.
تېره ورځ ملګرو ملتونو اعلان وکړ، چې د افغانستان په اړه به د دوحې درېیمه غونډه د چنګاښ پر لسمه او یوولسمه ( د جون پر دېرشمه او د جولای پر لومړۍ ) جوړه شي.
دغه نړیوال بنسټ د سې شنبې پر ورځ (د غبرګولي لومړۍ ) د اسلامي امارت له چارواکو او یو شمېر افغان شخصیتونو سره د ملګرو ملتونو د عمومي منشي د مرستیالې وروستۍ ناستې په اړه په یوه خبرپاڼه کې لیکلي، چې د دوحې په راتلونکې غونډه کې به د مدني ټولنې فعالان هم حضور ولري.
دغه راز یې په دې غونډه کې د ګډون لپاره امیر خان متقي ته رسمي بلنه ورکړې ده.
د اسلامي امارت ویاند ويلي، چې د دوحې په راتلونکې غونډه کې د افغانستان د ګډون په اړه بحثونه روان دي.
یو شمېر کارپوهانو د نړۍ وضعیت ته په نغوته کې د دې غونډې جوړېدل مهم بولي؛ ځکه د دوی په باور افغانستان د نړیوالې ټولنې رسمي غړیتوب ته اړتیا لري.
-
سیمه ییز خبرونه4 days ago
د ایران ولسمشر ابراهیم رییسي د چورلکې د راغورځېدو په پېښه کې مړ شو
-
لوبی21 hours ago
آریانا ټلویزیون د ۲۰ اوریز کرکټ نړیوال جام د خپراوي حق ترلاسه کړ
-
تازه خبرونه5 days ago
په افغانستان کې د وروستیو سیلابونو له کبله ۵۴۰ کسان مړه شوي – م.م
-
تازه خبرونه4 days ago
سر له سبا د ترکيي هوايي شرکت افغانستان ته رسمي الوتنې پیلوي
-
نړۍ4 days ago
د چورلکې په راغورځېدو کې د ایران د ولسمشر مړینې غبرګونونه راوپارول
-
تازه خبرونه3 days ago
د شانګهای همکاریو ټولنې د بهرنیو چارو وزیرانو په افغانستان کې د ثبات پر ټینګښت خبرې وکړې
-
سیمه ییز خبرونه4 days ago
د ایران د ولسمشر ابراهیم رییسي راغورځېدلې چورلکه وموندل شوه – د ایران سره صلیب اداره
-
تازه خبرونه3 days ago
د تېرو لس ورځو په سېلابونو کې ۵۶۰ کسانو ته مرګ او ژوبله اوښتې