د اسلامي امارت ویاند ذبیح‌الله مجاهد له مډال ګټونکو لوبغاړو څخه د ستاینې په مراسمو کې د هېواد له لوبغاړو څخه د هر اړخیز ملاتړ ډاډ څرګند کړ او له ملت یې غوښتي، چې د دې ویاړ له رامنځته کوونکي قشر څخه پوره ملاتړ وکړي.

نوموړي په دغو مراسمو کې ویلي، چې د سیاست، اقتصاد، امنیت او سپورټ په برخو کې د افغانستان اوسنۍ لاسته‌راوړنې د ملت د یووالي او همغږۍ پایله ده.

هغه په نړیوالو سیالیو کې د افغان لوبغاړو ځلېدا د هېواد د ټولو وګړو ګډ ویاړ او سرلوړي بللې ده.

د مسوولانو د څرګندونو له مخې؛ د هېواد د سپورټ ادارې هغه لوبغاړي، چې د بحرین د ځوانانو په سیالیو او د ریاض د اسلامي هېوادونو د پیوستون په لوبو کې یې مډالونه خپل کړي؛ د موټرو پر ډالۍ کولو وستایل.

د۲۰۲۶  آسیا فوټسال ملتونو جام اتلسم پړاو نن (سې‌شنبه د سلواغې اوومه) د انډونیزیا په پلازمېنه جاکارتا کې پیلېږي او ۱۶ لوبډلې به د اتلولۍ د ګټلو لپاره سیالۍ وکړي.

انډونیزیا، چې له ۲۰۰۲ کال وروسته د دوه‌یم ځل لپاره د دې سترې سیالۍ کوربتوب کوي؛ لوبې به په دوه لوبغالو کې ترسره شي او د سیالیو اتل به د سلواغې پر اته‌لسمه / دفبرورۍ پر اوومه راڅرګند شي.

دا سیالۍ د جاکارتا په نړیوال ولوډروم لوبغالي کې پرانیستل کېږي، چې د لومړۍ لوبې پر مهال به په B ګروپ کې تایلنډ (د فیفا درجه: ۱۱) له لبنان (د فیفا درجه ۵۴) سره ولوبیږي.

دا لوبه د کابل پر وخت سهار ۹:۳۰ پیلېږي.

د ورځې په بله لوبه کې ویټنام (۲۰) چې په ۲۰۱۶ کال کې یې څلورم مقام خپل کړی و؛ له کویټ (۴۰) سره سیالي کوي.

دغه راز د انډونیزیا په ارینا لوبغالي کې د A ګروپ سیالۍ د سهار پر ۱۱:۳۰ پیلېږي، چې عراق (۳۷) به له قرغیزستان (۴۳) سره ولوبېږي.

کوربه هېواد انډونیزیا (۲۴) به د مازیګر پر ۴ بجو د خپلو مینه‌والو پر پیاوړي ملاتړ د سویلي کوریا (۵۷) پر وړاندې میدان ته ورودانګي.

له هغو لوبډلو څخه، چې باید ځانګړې پاملرنه ورته وشي؛ افغانستان دی، چې پر ۲۰۲۴ کال یې د لومړي ځل لپاره په فوټسال نړیوال جام کې ګډون وکړ او تر یو پر څلورمه پایلوبې پورې ورسېد. دا د افغانستان په آسیا فوټسال ملتونو جام کې دوه‌یم ګډون دی.

افغانستان د دې سیالیو په غوراوي پړاو کې د خپلې ډلې لومړي مقام ته ورسېد. دې لوبډلې د مالډیف پر وړاندې خپله بریا ۱۰پر۱ پیل کړه او بیا یې د میانمار پر وړاندې پر ۸پر۰ بریا سره خپل صعود یقیني کړ.

افغانستان، چې یو ځل بیا د پیاوړو لوبډلو تر څنګ درېدلی؛ د چارشنبې پر ورځ د جنورۍ پر اته‌ویشتمه د سهار پر ۹:۳۰ د D ګروپ په لومړۍ لوبه کې د سعودي عربستان (۴۵) پر وړاندې، چې دا یې څلورم ګډون دی، سیالۍ پیلوي. دا لوبه به د جاکارتا په نړیوال ولوډروم لوبغالي کې ترسره شي.

وروسته پر هماغه ورځ ایران (۵) چې د اوسني اتل په توګه او یوازنی هېواد دی، چې هیڅکله له درې غوره لوبډلو څخه ندی پاتې شوی؛ د خپلې څوارلسمې اتلولۍ د ګټلو په لټه کې د مالیزیا (۷۰) پر وړاندې سیالۍ پیلوي.

سره له دې ننګونو افغانستان به بې‌وېرې ډګر ته وردانګي. دې لوبډلې د ۲۰۲۴ کال د ګروپي پړاو پر مهال پر ایران، چې مدافع اتل و؛ سخت فشار راوړ، چې دا د آسیا په فوټسال کې د افغانستان چټک پرمختګ څرګندوي.

د افغانستان د لومړي ځلېدونکي شتون له کبله تمه ده، چې دا لوبډله به د ۲۰۲۶ کال د انډونیزیا په سیالیو کې هم تر حذفي پړاو پورې ورسېږي.

له بلې‌خوا جاپان (۱۳) چې په ۲۰۲۴ کال کې ناڅاپه له ګروپي پړاو څخه حذف شوی و؛ په C ګروپ کې به د چارشنبې پر ورځ د ماسپښین پر ۳ بجو د اسټرالیا (۵۱) پر وړاندې ولوبېږي.

همدارنګه، ازبکستان (۲۲) چې څلور ځله پایلوبې ته رسېدلی؛ ماښام به پر ۷ بجو د تاجکستان (۴۷) پر وړاندې سیالي وکړي.

آریانا ټلویزیون به په اندونیزیا کې د ۲۰۲۶ کال آسیا فوټسال ملتونو جام سیالۍ پر ژوندۍ او ځانګړې بڼه په ټول افغانستان کې خپرې کړي.

د افغانستان فوټسال ملي لوبډله، چې له دې مخکې یې په ټایلینډ کې روزنیزې هحې ترسره کړې؛ نن یکشنبه د ۲۰۲۶ ز.کال په آسیا فوټسال ملتونو جام کې د ګډون لپاره انډونیزیا ته ورسېده.

افغانستان په D ګروپ کې راغلی او له ایران، سعودي عربستان او مالیزیا سره به سیالۍ وکړي.

دغه لوبډله د دغو سیالیو له پیل مخکې د ویټنام پر وړاندې په دوه دوستانه لوبو کې د بریاوو له ترلاسه کولو وروسته ډاډمنه دې سیالیو ته وردانګي.

د آسیا فوټسال ملتونو جام ۲۰۲۶ سیالۍ به د سلواغې پر اوومه /  د جنورۍ پر اووه‌ویشتمه په انډونیزیا کې پیل شي، چې په کې به د آسیا ۱۶ غوره لوبډلې ګډون ولري.

افغانستان به خپله لومړنۍ لوبه د چارشنبې پر ورځ( د سلولغې پر اتمه / د جنورۍ پر اته‌ویشتمه ) په جاکارتا کې د سعودي عربستان پر وړاندې ترسره کړي.

د آسیا د فوټسال ملتونو جام سیالۍ به په ټول افغانستان کې د آریانا ټلویزیون له لارې پر ژوندۍ بڼه خپرې شي.