د دودیزو غېږنیونې نړیوالې سیالۍ، چې د افغانستان پر کوربه‌توب په کابل کې له درې ورځنیو سیالیو وروسته د اووه هېوادونو د لوبغاړو پر ګډون پای ته ورسېدې.

په دې سیالیو کې د افغانستان تر څنګ د ایران، قرغزستان، تاجکستان، ازبکستان، ترکمنستان او ترکیې ۱۶۰ غېږنیوونکو برخه اخیستې وه او په بېلابېلو وزنونو کې یې سیالۍ وکړې.

دې سیالۍ درې برخې لرلې: کورش، رستمي غېږنیونه او کشتینګېري، چې د سیمې د دودیزو رزمي ورزشونو ښکلی انځور یې وړاندې کړ.

د کورش په برخه کې ازبکستان لومړی مقام، تاجکستان دوه‌یم مقام او افغانستان درېیم مقام خپل کړ.

د رستمي غېږنیونې په برخه کې افغانستان لومړی، ازبکستان دوه‌یم او تاجکستان درېیم مقامونه ترلاسه کړل.

په کشتینګېري برخه کې تاجکستان لومړی، ازبکستان دوه‌یم او افغانستان درېیم مقامونه وګټل.

نن(چارشنبه د غویي دوه‌یمه) د هېواد د غېږنیونې ملي فډراسیون د چارواکو په شتون کې له آریانا نړیوال راډیو ټلویزیون سره د غېږنیونې غوره لیګ د لومړي پړاو تړون لاسلیک شو.

د دې تړون له مخې؛ د غېږنیونې غوره لیګ سیالۍ به د ۱۰ ورځو لپاره په لس وزني کټګوریو کې له ۳۵۰ څخه د زیاتو لوبغاړو پر ګډون ترسره شي.

دا سیالۍ د پېنځه پړاویز پروګرام پر بڼه په پام کې نیول شوي او تړون یې د راتلونکو پېنځه پړاوونو لپاره لاسلیک شوی دی.

دغه راز دا سیالۍ به د ۲۰۲۶ ز.کال د جون له لومړۍ نېټې پیل او د همدې میاشتې تر لسمې پورې به هره شپه د ماښام له ۶:۰۰ څخه تر ۹:۰۰ پورې په ۲زره ۵۰۰ کسیز ورزشي سالون کې ترسره شي.

دا هڅه په هېواد کې د رزمي سپورټ د ودې او د لوبغاړو د ملاتړ په برخه کې یو اړین ګام ګڼل شوی دی.

ویل کیږي، چې دا سیالۍ به د آریانا نړیوالې راډیو ټلوېزیون له لارې پر ژوندۍ او ځانګړې بڼه خپرې شي.

آریانا تلویزیون د افغانستان دغېږنیونې غوره لیګ د لومړي پړاو د تولید او خپرولو ځانګړي حقونه ترلاسه کړي، چې په هېواد کې د سپورټ د ودې او پراختیا پر لوري یو اغېزمن ګام دی.

دا هوکړه، چې له افغانستان غېږنیونې فډراسیون سره لاسلیک شوې؛  په خپلو ۱۰ ورځنیو ملي سیالیو کې د ټول افغانستان غوره غېږنیوونکو ته د لوبو زمینه برابروي.

د افغانستان غېږنیونې غوره لیګ پرانیستونکی پړاو به د روان ۱۴۰۵ لمریز لېږدیز کال د غبرګولي له یوولسمې څخه تر شلمې په کابل کې ترسره شي.

سیالي هره ورځ د ماښام له ۶ څخه د شپې تر ۹ بجو په کابل بدني روزنې او سپورت عمومي ریاست جمنازیم کې ترسره کیږي.

تنظیموونکي وايي، چې دا سیالۍ به د هېواد له بېلابېلو سیمو څخه ۱۰ لوبډلې ولري، چې شاوخوا ۳۵۰ لوبغاړي به په ۱۰ وزني ډلو کې سیالي وکړي.

تمه ده، چې په دې لیګ د غېږنیونې بېلابېلې بڼې او نوي راټوکېدونکي استعدادونه نندارې ته وړاندې شي او د لوبغاړو لپاره به پر لوړه کچه د سیالیو زمینه چمتو کړي.

آریانا ټلویزیون د دغو لوبو پراخ پوښښ پر ژوندۍ او تحلیلي بڼه وړاندې کوي.

غېږنیونه په افغانستان کې اوږده مخینه لري او یو کلتوري اړین سپورټ پېژندل شوی؛ په بېلابېلو سیمه‌ییزو دودونو کې ژورې ریښې لري او پر شوقي او مسلکي کچه ترسره کیږي.

د دې سیالیو منظم پیل د سپورټ په عصري کولو او ډېرو لوبغاړو ته د ډېرو سیاليو د فرصتونو په چمتو کولو کې د لوبېدا ښه زمینه ګڼل کیږي.

چارواکي وايي؛ د سیالیو دا نوښت نه یوازې د غېږنیونې هڅول رانغاړي، بلکې د هېواد له ګوټ ګوټ څخه په یوه منظم مسلکي ټورنمنټ کې سیالان راټولوي، چې ملي یووالي او ویاړ ته هم وده ورکړي.

تمه ده، چې د افغانستان غېږنیونې غوره لیګ به د لیدونکو د پام وړ شمېر راخپل کړي؛ ځکه، نو ټلویزیون دا زړه‌راکښونکی سپورتي پېښه د پروګرامونو په مهالوېش کې ځای کړې ده.