د افغانستان کرکټ ملي لوبډلې د کرکټ نړیوالې شورا (آی‌سي‌سي) د یوورځنیو سیالیو په تازه لړلیک کې له انګلستان څخه مخکې او د نړۍ اووم مقام ته پورته شوې ده. افغانستان له دې سره د خپلې لوبډلې د تاریخ تر ټولو غوره مقام له خپل پخواني ریکارډ سره برابر کړی دی.

د شنبې پر ورځ( د اوکټوبر پر څلیریشتمه ) د خپور شوي لړلیک له مخې؛ افغانستان د ۹۴ امتیازونو پر ترلاسه کولو اووم مقام خپل کړی؛ انګلستان د ۹۳ امتیازونو پر لرلو اتم مقام ته لوېدلی او سریلانکا د ۹۵ امتیازونو پر لرلو شپږم مقام لري.

افغانستان لومړی ځل د ۲۰۲۵ز.کال په می میاشت کې د نړۍ د یوورځنیو سیالیو په لړلیک کې اووم مقام ته رسېدلی و او اوس یې یو ځل بیا دا تاریخي لاسته‌راوړنه تکرار کړې ده.

په درې‌اړخیزو سیالیو کې اتلولي؛ د افغانستان د پرمختګ لامل

له زیمبابوی او بنګله‌دېش سره په درې‌اړخیزو سیالیو کې د افغانستان لوبډله وځلېده. افغانستان د اوکټوبر پر درویشتمه( د جمعې پر ورځ ) د دغو سیالیو په پایلوبه کې زیمبابوی ته د اووه ویکټو پر توپیر ماتې ورکړه او اتلولي یې وګټله.

په دې لوبه کې افغان توپ‌اچوونکو د زیمبابوی لوبډله د ۱۶۹ منډو له جوړولو وروسته ټوله وسوځوله. راشد خان د درې لوبغاړو پر سوځولو د افغانستان پر ګټه غوره توپ‌اچونه وکړه.

د افغانستان په توپ‌وهنه کې ابراهیم ځدراڼ د ۷۰ ناسوځېدلو منډو پر جوړولو د لوبډلې په بریا کې مهم رول ولوباوه. رحمت شاه هم ۴۳ منډې جوړې کړې او افغانستان په ۳۴.۳ آورونو کې ټاکل شوی هدف پوره کړ.

په نړیوال لړلیک کې د انګلستان شاتګ

انګلستان له سریلانکا څخه له وروستۍ ماتې وروسته په نړیوال لړلیک کې یو مقام له لاسه ورکړی دی. دې لوبډلې د ۴۳۰ منډو لوړ هدف وټاکه؛ خو د دفاع په برخه کې یې بریا ترلاسه نه‌کړه او سریلانکا د یوورځنیو سیالیو په تاریخ کې د هدف د پوره کولو له سترو بریالیو هڅو څخه یوه ترسره کړه.

د افغانستان کرکټ ملي لوبډلې د نړۍ په لړلیک کې اووم مقام ته پرمختګ؛ په نړیوالو سیالیو کې د دې لوبډلې د پرمختګ او د نړۍ له نومیالیو لوبډلو سره د سیالۍ د وړتیا د زیاتېدا ښکارندوی دی.

طوفان هرات د افغانستان اتلانو لیګ روشن د شپږم پړاو د دوه‌یمې نیمایي په څلورپنځوسمه لوبه کې آریانا خوست ته د یو ګول پر توپیر ماتې ورکړه.

دغه لوبه نن (شنبه د لړم دوه‌یمه) د افغانستان فوټبال فډراسیون په لوبغالي کې ترسره شوه او عبیدالله عمري د لوبې یوازنی ګول وواهه، چې له دې سره یې خپلې لوبډلې ته بریا ورپه برخه کړه.

په لومړۍ نیمایي کې عمري د سر پر ګوزار د آریانا خوست لوبډلې دروازه پرانیسته.

د آریانا خوست لوبغاړو د پایلې د بدلولو هڅه وکړه؛ خو سیالې لوبډلې ته پر ګول وهلو بریالي نه‌شول.

په دوه‌یمه نیمایي کې هم دواړو لوبډلو د ګول وهلو فرصتونه لرل؛ خو هیڅ یوې ونه‌شو کولی پایله بدله کړي او لوبه د طوفان هرات پر یو ګول پای ته ورسېده.

طوفان هرات په دې لوبه کې ۱۶ خطاوې وکړې او دوه ژېړ کارتونه یې ترلاسه کړل. په مقابل کې د آریانا خوست لوبغاړو ۱۷ خطاوې وکړې او درې ژېړ کارتونه یې ترلاسه کړل.

طوفان هرات به په خپله راتلونکې لوبه کې د اوکټوبر پر اووه‌ویشتمه له سرخ‌پوشان خوافي سره مخ شي او آریانا خوست به د اوکټوبر پر شپږویشتمه له ابومسلم فراه سره لوبه وکړي.

د افغانستان اتلانو لیګ روشن د شپږم پړاو لوبې د آریانا ټلویزیون له لارې پر ژوندۍ بڼه خپرېږي.