د کورنیو چارو وزارت امنیتي چارو مرستیال ابراهیم صدر د یوه پلاوي پر مشرۍ پنجشېر ته په سفر کې د دې ولایت د والي محمدآغا حکیم په ګډون له حکومتي رییسانو، علماوو کرامو، قومي مشرانو او ولسي استازو سره یوه ګډه ناسته ترسره کړې ده.

د پنجشېر ولایت امنیه قومندانۍ ویاند حقمل سعد د څرګندونو له مخې؛ په دې ناسته کې د کورنیو چارو وزارت د امنیتي چارو مرستیال ابراهیم صدر ویلي: اوس هغه وخت رارسېدلی، چې اسلامي امارت د ولسونو تر څنګ اوږه پر اوږه ودریږي؛ د خلکو ستونزې او مشکلات واوري، ولس ته شته امکانات او آسانتیاوې برابرې کړي او د هغوی رښتینی خدمت ترسره کړي.

هغه زیاته کړې: اسلامي امارت د مجاهدینو او ولسونو د سرښندنو پایله ده.

نوموړي د پنجشېر ولایت مسوولانو ته په خطاب کې ویلي: ولسوالیو او لرې پرتو سیمو ته  سفرونه کوئ؛ له خلکو سره به مخامخ ګورئ، د هغوی ستونزې او مشکلات به اورئ او ورته به پخپل وخت رسېدنه کوي.

نوموړي ټینګار کړی: مسوولان دې د خپل پرسونل د لیکو چاڼولو ته پوره پاملرنه وکړي او هغه منفورې څېرې او اشخاص، چې ولس او نظام ته ګټه نه‌رسوي؛ له لیکو لرې کړي، ځکه دا ډول کسان د فتنې او فساد سبب ګرځي.

دغه راز یې د یونیفورم؛ صورت او سیرت پر برابرولو هم ټینګار وکړ او وایي: ټولو منسوبینو ته لازمه ده، چې خپل رسمي یونیفورم رعایت کړي؛ ځکه د هر اورګان ځانګړی یونیفورم ټاکل شوی او دا د اسلامي امارت د رهبر سپارښتنه هم ده.

نوموړي زیاته کړې، چې لومړی به مسوولان خپل سیرت او صورت د سنت پر طریقه برابروي.

د نشه‌یي توکو په اړه نوموړي وویل: په افغانستان کې د نشه‌یي توکو کچه صفر ته راټیټه شوې ده؛ استعمال، کښت، قاچاق او پلور یې بشپړ بند دی او د مخنیوي لپاره به نظام او ولس ګډ کار کوي.

ویل کیږي، چې یاد پلاوي د پنجشېر ولایت د امنیه قومندانۍ له اړوند ادارو او مدیریتونو هم لیدنه وکړه او د چارو د ښه‌والي لپار یې اړوند مسوولانو ته لازمې لارښوونې وکړې.

د ایران بهرنیو چارو وزیر سید عباس عراقچي ويلي، چې په افغانستان کې امنیت، پرمختګ او سوکالي د ټولو ګاونډ هېوادونو له ګټو سره نېغ تړاو لري.

هغه نن (یکشنبه د لیندۍ درویشتمه) په تهران کې د افغانستان په اړه د سیمه‌ییزې ناستې د جوړېدا پر مهال په سیمه کې د افغانستان د هراړخیز ادغام پر اړتیا ټینګار وکړ او څرګندوي، چې سیمه‌ییز پرمختګونه او ننګونې یوازې د رغنده خبرو اترو، د ټولو هېوادونو د فعال ګډون، د متقابل درناوي د اصولو بشپړ رعایت او له سیمه‌ییزو میکانیزمونو څخه د ګټې اخیستنې او د سیمه‌ییزو هېوادونو ترمنځ د  همکاریو له لارې اداره او حل کېدی شي.

هغه ویلي: “په تېرو څو کلونو کې د سیمې بدلونونو ښودلې، چې بهرني چلندونه او تحمیل شوي نسخې نه ثبات ته لار اواروي او نه هم تلپاتی پرمختګ تضمینوي. د پوځي مداخلې او په افغانستان کې د ناټو د دوه لسیزو شتون تجربه زمونږ مخې ته پرته ده.”

د ایران بهرنیو چارو وزیر زیاته کړې؛ په امنیتي حل لارو ډېر تمرکز، د افغانستان ټولنیز او کلتوري شرایطو ته پام نه‌کول، د سیمه‌ییزو لوبغاړو او ګاونډیانو رول له پامه غورځول، د افغانستان سیاسي او اقتصادي جوړښتونه متکي او فاسد کول او په پای کې د بېړني وتل د ناکامۍ او ماتې نښې وې.

په غونډه کې، د افغانستان د چارو لپاره د پاکستان ځانګړي استازي، محمد صادق هم ټینګار وکړ، چې د ترهګرۍ په اړه د اسلام‌آباد اندېښنې باید حل شي.

هغه ویلي، چې پاکستان غواړي په سیمه کې سوله، پرمختګ او امنیت ته وده ورکړي.

سید عباس عراقچٍ د افغانستان د ګاونډ هېوادونو ترمنځ د منظم ډیالوګ میکانیزمونو رامنځته کولو پر اړتیا ټینګار وکړ او څرګندوي؛ دا سیمه‌ییزه ناسته به نه یوازې د غلط فهمۍ مخه ونیسي، بلکې د اقتصادي، سرحدي او بشري پالیسیو او پروګرامونو همغږي به هم آسانه، د سیمې د هېوادونو ترمنځ متقابل تفاهم او د نظرونو همغږي به لوړه او د ګاونډ هېوادونو ترمنځ د تاوتریخوالي کمولو او رغنده همکارۍ ته وده ورکولو لپاره مناسب پلیټ فارم رامنځته کړي.

د افغانستان اسلامي امارت دفاع وزیر محمد یعقوب مجاهد کندهار ولایت ته په سفر کې ویلي: د عصري او دیني علومو له زده‌کړې ملاتړ وکړئ.

هغه د کندهار په یوه مدرسه کې د فراغت مراسمو ته د وینا پر مهال ویلي: “زه له تاسې څخه غوښتنه کوم، چې له ښوونځیو او مدرسو ملاتړ وکړئ؛ خپل ماشومان بې تعلیمه مه پریږدئ. هر علم زده کړئ، که عصري وي یا مذهبي.”

دفاع وزیر ټینګار کړی، چې اسلامي امارت د خلکو په خدمت کې دی؛ ځکه، چې ځینې ځواکونه له سرحدونو او نور د خلکو د سر او مال ساتنه کوي.

دغه راز د افغانستان د اسخباراتو ریاست مرستیال تاجمیر جواد د شنبې پر ورځ( د لیندۍ دوه‌ویشتمه ) د جامعة مصباح العلوم د فراغت غونډې ته په ثبت شوي پیغام کې ویلي؛ اسلامي امارت په دې باور دی، چې د دیني علومو وده او پرمختګ اسلامي عقیده تضمینوي او د عصري علومو له ودې او پرمختګ سره هېواد د سوکالۍ او پرمختګ څخه برخمن کېږي.

نوموړي زیاته کړې، چې دا مهال یو شمېر کړۍ په افغانستان کې د شته اسلامي نظام تر چتر لاندې عدالت، سرتاسري امنیت، سوکالي او پرمختګ زغملی نشي او غواړي افغانستان ته ستونزې جوړې کړي.

نوموړي ویلي؛ دوی په کابل کې د دیني عالمانو له لوري هغې پرېکړې ته ژمن دي، چې د هېواد او شرعي نظام پر فرضیت یې ټینګار کړی دی .

هغه وایي: مونږ جګړه نه‌ غواړو؛ خو که جګړه پر مونږ وتپل شي، نو د خپل نظام او اسلامي خاورې د دفاع په لار کې به داسې وړتیاوې وښیو، چې د دښمن ټولې اوسنۍ محاسبې ناسمې وښيي او جنګ‌ غوښتونکي به د خپل ژوند تر ټولو سخته پښېماني تجربه کړي.

هغه په خپلو څرګندونو کې دا هم ویلي، چې مونږ سیمه‌ییز امنیت او ثبات ته د شریعت د لارښوونو او د خپل هېواد د مصالحو په رڼا کې ژمن یوو.

دا څرګندونې په داسې حال کې راپورته کیږي، چې دیني عالمان د یوې سترې غونډې پرمهال د اسلامي امارت پر لارښوونو عمل او د خپل نظام او خاورې دفاع ته ژمن شوي دي.