د ایران د خبرګانو مجلس غړی محمد مهدي میرباقري ويلي، چې د ایران د راتلونکي مذهبي رهبر په اړه د “اکثریت” نظر چمتو شوی دی.

هغه په ​​یوه ویډیو کې څرګنده کړې، چې “ځینې خنډونه” اوس هم حل ته اړتیا لري.

ایراني رسنیو راپور ورکړی؛ د خبرګانو مجلس په دې اړه یو کوچنی اختلاف لري، چې آیا د دوی وروستۍ پرېکړه باید له حضوري ناستې وروسته وشي یا پرته له داسې رسمي مراسمو رامنځته شي.

دغه راز د خبرګانو مجلس بل غړي محسن حیدري آل کثیر په یوه ویډیو کې ویلي؛ په اوسنيو شرایطو کې د وروستۍ رایې لپاره د غونډې مخامخ یا حضوري ناسته ممکنه نده.

نوموړي زیاته کړې: دا غوراوی د علي خامنه‌یي د  سپارښتنې له مخې د ایران رهبر باید داسې څوک وي، چې دښمن ترې کرکه ولري؛ نه دا، چې ستایل شوی وي.

حیدري آل کثیر د غوره شوي ځایناستي په اړه وایي: «حتا لوی شیطان (امریکا) د هغه نوم یاد کړی دی.»

دا په داسې حال کې ده، چې څو ورځې مخکې د امریکا ولسمشر ډونالډ ټرمپ ویلي وه: د خامنه‌یي زوی مجتبی ورته د «نه منلو » غوراوی دی.

سعودي عربستان ایران ته خبرداری ورکړی، چې پدې هېواد دې له بریدونو ډده وکړي او که خپل بریدونه روان وساتي؛ ریاض ښايي متقابل ځواب ورکړي.

څلور باخبره سرچینو رویټرز خبري سرچینې ته څرګنده کړې، چې سعودي عربستان د ایران او امریکا ترمنځ د تاوتریخوالي د حل لپاره له ډیپلوماټیکو لارو ملاتړ کوي.

دا پیغام د شنبې پر ورځ د ایران د ولسمشر مسعود پزشکیان له وینا مخکې لېږل شوی و.

هغه په خپله وینا کې د خلیج له ګاونډ هېوادونو څخه د ایران د بریدونو له کبله بښنه وغوښته. داسې ښکاري، چې دا کار د سیمې د قهر د کمولو لپاره شوی؛ ځکه ایران پر ځینو غیرنظامي هدفونو بریدونه کړي وه.

له دې دوه ورځې مخکې، د سعودي عربستان بهرنیو چارو وزیر په ټیلیفوني اړیکه کې د ایران د بهرنیو چارو له وزیر سره د ریاض دریځ شریک کړی و.

د سرچینو د څرګندونو له مخې؛ سعودي عربستان ویلي: له هر ډول منځګړیتوب ملاتړ کوي، چې تاوتریخوالی کم او د خبرو له لارې حل پیدا شي.

همدارنګه ټینګار شوی؛ سعودي عربستان او د خلیج نورو هېوادونو اجازه نده ورکړې، چې د دوی له هوايي حریم یا خاورې څخه امریکا پر ایران بریدونه وکړي.

دغه راز د سعودي بهرنیو چارو وزیر خبرداری ورکړی، چې که د ایران بریدونه پر سعودي یا د انرژۍ پر تاسیساتو دوام وکړي؛ ریاض ښايي اړ شي، چې امریکایي ځواکونو ته د سعودي له پوځي اډو څخه د استفادې اجازه ورکړي او د بریدونو پر وړاندې غبرګون وښيي.

د سرچینو د څرګندونو له مخې: له هغه وخت راپدېخوا، چې د امریکا او اسرائیلو پوځي عملیات د فبرورۍ پر اته‌ویشتمه پر ایران پیل شوي؛ سعودي عربستان د خپل سفیر له لارې له تهران سره منظم تماسونه ساتلي دي.

په تېرې اوونۍ کې متحده عربي امارات، کویټ، قطر، بحرین او عربستان د ایران د پراخو بې‌پیلوټه الوتکو او راکټي بریدونو هدف ګرځېدلي وه.

د جګړې پر لومړۍ ورځ د امریکا او اسرائیلو په بریدونو کې د ایران ستر مذهبي مشر علي خامنه‌یي ووژل شو او له هغې وروسته ایران پراسرائیل او هغو هېوادونو بریدونه وکړل، چې د امریکا پوځي اډې په کې دي.

مسعود پزشکیان ویلي: د ایران لنډمهالې رهبرۍ شورا پرېکړه کړې، چې پر ګاونډ هېوادونو بریدونه ودروي؛ خو که له هغو هېوادونو څخه پر ایران برید وشي بیا به، نو ځواب ورکړ شي.

دا په داسې حال کې ده، چې د ایران ځینو پوځي قومندانانو ټینګار کړی؛ د امریکا او اسرائیلو پوځي اډې په سیمه کې اوس هم د ایران د بریدونو اصلي هدفونه دي.

د ایران دولتي رسنیو د څرګندونو له مخې؛ ایرانیان به نن( چارشنبه) په تهران کې راټول شي او د ارواښاد ستر رهبر آیت‌الله علي خامنه‌یي د الوداع مراسم، چې د روانې اوونۍ په پیل کې یې د اسرائیلو او امریکا د هوایي بریدونو له کبله خپل ژوند له لاسه ورکړ؛ ترسره کړي.

د ایران اسلامي تبلیغ شورا رییس حجت الاسلام محمودي څرګنده کړې، چې د الوداع مراسم به په سیمه‌ییز وخت د شپې پر لس بجو د پلازمېنې د امام خمیني د لمانځه په تالار کې پیل شي.

خلکو ته به اجازه ورکړ شي، چې خپل درناوی وړاندې کړي. تمه ده، چې مراسم به درې ورځې دوام وکړي.

رویټرز راپور ورکړی، چې د جنازې د مراسمو جزئیات به په وروستي پړاو کې اعلان شي.

له تهران څخه خپرېدونکي انځورونه ښیي، چې په ټول ښار کې لنډمهاله یادناستې روانې دی او خلک د ۸۶ کلن رهبر د غم لپاره مخ پر راټولېدا دي. چارواکو له خلکو غوښتنه کړې، چې په مراسمو پراخ ګډون وکړي.

خامنه‌یي، چې له درې لسیزو څخه زیات یې ایران رهبري کړی؛ د هېواد د کورني او بهرني سیاست په جوړولو کې یو مرکزي شخصیت و. د امریکا او اسرائیلو دواړو پر وړاندې یې کلک دریځ ساتلی و.

د ایران دولتي رسنیو راپور ورکړی، چې هغه د شنبې پر ورځ د امریکا او اسرائیلو په ګډو هوايي بریدونو کې ووژل شو. دا هغه بدلون دی، چې په سیمه کې یې تاوتریخوالی بې‌ساری زیات کړی دی.

راپور شوی وژنه د ایران لپاره یوه مهمه شېبه ده، چې د ځایناستې، کورني‌ثبات او د منځني ختیځ لپاره د پراخو جیوپولیتیکي پایلو په اړه پوښتنې راپورته کوي.