د بدخشان ولايت د اطلاعاتو او کلتور رياست د دغه ولايت په يمګان ولسوالۍ کې د حکيم ناصر خسرو د زیارت د رغولو د پروژې له بشپړېدو خبر ورکوي.

د بدخشان د اطلاعاتو او فرهنګ رييس ذبيح الله اميري په دې اړه ويلي: د يمګان ولسوالۍ د حضرت سيد په سيمه کې د ناصر خسرو تاريخي زیارت، چې د طبيعي او غير طبيعي پېښو له کبله د ويجاړېدو په حال کې و؛ پر معیاري ډول بیا ورغول شو.

هغه زياته کړې؛ د دې زیارت د بيارغونې چارې د اغا خان بنسټ پر مالي او تخنيکي مرسته په ۴ مياشتو کې ترسره شوې دي.

ذبیح الله امیري زیاته کړې: په دې بنسټیزه رغونه کې د زیارت بېلابېلې برخې لکه کړکۍ، دروازې، دیوالونه، ستنې، پلسترونه، غالۍ، پلچکونه، د لنګر خانې په نامه خونې، تشنابونه او ستونونه د ځایي موادواو  نیزوړي پر کارولو ورغول شوې.

د بدخشان د اطلاعاتو او کلتور رييس د دغې ولسوالۍ له خلکو او مسوولينو وغوښتل، چې د تاريخي ابداتو په ساتنه کې له دغه رياست سره همکاري وکړي.

نوموړي زیاته کړې؛ په دې ولايت کې يو شمېر نورې تاریخي سیمې هم ويجاړې شوې؛ خو د بيارغونې او د ويجاړيدو د مخنيوي لپاره يې عملي کار روان دى.

حکیم ناصر خسرو په پېنځمه لېږدیزه پېړۍ کې د سلجوقی دورې یو نامتو شاعر او لیکوال و.

د قرغزستان ولسمشر د اروپايي هېوادونو له مشرانو او د امریکا له حکومته غوښتي، چې په افغانستان کې حاکم نظام پر رسمیت وپېژني او د افغانانو د راتلونکي لپاره د دغه هېواد کنګل شوې شتمنۍ خوشې کړي.

نوموړي له یوې ترکي رسنۍ سره په خبرو کې ټینګار وکړ، چې د افغانستان خلک اوس هم د جګړې  کلونو ته ورته له سختو شرایطو سره مخ دي.

د قرغزستان ولسمشر صدر جباروف ویلي: «کله، چې طالبان (اسلامي امارت) د ۲۰۲۱ کال په دوبي کې واک ته ورسېدل؛ د افغانستان د مرکزي بانک د بهرنیو اسعارو زېرمې، چې ۹ اعشاریه ۴ میلیارډ ډالره ارزښت لري په غربي هېوادونو کې کنګل شوې، ګئ شاوخوا اووه میلیډده ډالره یې په امریکا کې دي. دا زیرمې باید ژر تر ژره خوشې شي، چې په افغانستان کې وضعیت ښه او د افغانان هوسا شي.

جباروف په دې مرکه کې دا هم ویلي، چې قرغزستان له اسلامي امارت سره همکاري روانه ساتلې؛  ځکه، چې د افغانستان وضعیت خرابېدا به پر سیمه منفي اغېز وکړي.

هغه ویلي: زمونږ په ګډون ډېرو هېوادونو طالبان (اسلامي امارت) د له تور نوملړه ایستلي دي. له دې وروسته، چې طالبان (اسلامي امارت) واک ته ورسېدل مونږ سمدلاسه د افغانستان د خلکو د ملاتړ او مرستې لپاره له هغوی سره تماسونه ونیول. مونږ څو- څو ځله بشري مرستې واستولې.

لکه څنګه، چې ما وویل: د افغانستان د وضعیت نوره خرابیدا زمونږ په سیمه منفي اغېزه کولی شي. له همدې کبله مونږ دا نه پټوو، چې مونږ له اوسنۍ افغان ادارې سره همکاري کوو. مونږ څومره، چې کولی شو مرسته وکړو؛ البته دا بسنه نه‌کوي.

د قرغزستان ولسمشر زیاته کړې، که په افغانستان کې حاکم نظام کمزوری وای: ډېر پخوا به د خلکو له خوا ړنګ شوی وای. نوموړي همدا راز "TRT" رسنۍ ته ویلي، چې له نورې نړۍ څخه د افغانستان پر ګوښه کولو  به ستونزه اواره نشي.

جباروف همداراز ټینګار کړی، که اروپايي هېوادونه او یا هم امریکا له افغانستان سره د بېلابېلو پروژو او پروګرامونو په پلي کولو کې تخنیکي مرستې وکړي، دی یې عملي کولو ته چمتو دی.

جباروف ویلي، چې اسلامي امارت یو یا دوه اروپايي هېوادونو ته د سوداګریز سفر لپاره بلل کیدای شي.

هغه وایي: که دوی د پرمختللیو هېوادونو څخه لیدنه وکړي او په ښکاره ډول وګوري، چې خلک څنګه د نړۍ په مختلفو برخو کې ژوند کوي؛ دا کولی شي د دوی د حکومتدارۍ پر تجربه مثبته اغېزه وکړي. که مونږ د دوی ګوښه کول روان وساتو او حتا ۵۰ کاله وروسته به هم کومه مثبته پایله ترلاسه نشي.

اسلامي امارت له نړۍ سره د افغانستان د ارزښتناکو اړیکو د ټینګښت په برخه کې د قرغزستان د رهبر له ملاتړ او غوښتنې هرکلی کوي او له نورو هېوادونو هم غواړي، چې له افغانستان سره همکاري وکړي.

د قطر بهرنیو چارو وزارت ويلي؛ د دې هېواد د نړیوالو همکاریو وزیرې مریم بنت علي بن ناصر المسند د افغانستان لپاره د بریټانیا له استازي اندریو مک‌کوبري سره وکتل.

د قطر بهرنیو چارو وزارت د خبرپاڼې له مخې؛ په دې کتنه کې د افغانستان پر وضعیت او په افغانستان کې د روغتیا، پوهنې او د بشري او انکشافي پروژو په برخو کې د دوه اړخیزو همکاریو پر پیاوړتیا خبرې شوې دي.

قطري او بریټانوي چارواکو ټینګار کړی؛ دغه ناسته د دواړو هېوادونو سټراټیژیک هوډ څرګندوي، چې په بشري چارو کې برخه واخلي او د افغانستان له خلکو ملاتړ وکړي.

دا مهال له افغانستان سره د ډېرو هېوادونو همکاري په بشري برخه کې ده او د ډيپلوماټيکو اړيکو په برخه کې لویديځو هېوادونو تر دې دمه کوم ګام پورته کړی ندی.

قطر د افغانستان له ډيپلوماټيکو، اقتصادي او بشري ملاتړو څخه ګڼل کېږي او دغه هېواد درې ځلې د دوحې د غونډې کوربتوب کړى دى.

ویل کیږي، چې دغو ناستو تر اوسه کومه مثبته پایله نده لرلې؛ ځکه، چې نه اقتصادي بندیزونه لرې شوي او نه هم د اسلامي امارت د چارواکو نومونه له تور نوملړه ایستل شوي دي.