د طب افغان زده‌کړیالانو د خپلو زده‌کړو لپاره د پاکستان د طب او غاښونو طبي شورا د وروستۍ خبرتیا د لغوه کولو پر غوښتنه د اسلام‌آباد په ستره محکمه کې خپله دعوه ثبت کړه.

د اسلامي جمعیت طلبه‌وو اتحادیې(آی‌جي‌ټي) د یو شمېر افغان زده‌کړیالانو پر استازیتوب د پاکستان د طب او غاښونو شورا(پي‌ام‌ډي‌سي) د وروستۍ خبرتیا پر ضد د اسلام‌آباد په ستره محکمه کې دا دعوه ثبت کړې ده.

د دغې اتحادیې د خبرپاڼې له مخې؛ د اسلامي جمعیت طلبه‌وو اتحادیې مشر صاحب‌زاده وسیم حیدر، د اسلام‌آباد له فډرالي طب پوهنځیو د یو شمېر افغان زده‌کړیالانو او د اسلام‌‌آباد د اسلامي جمعیت طلبه‌وو اتحادیې له مشر سره یوځای سترې محکمې ته ورغلی دی.

د دې دوسیې حقوقي چارې د مدافع وکیل عمران شفیق او د هغه حقوقي ډلې له‌خوا پر مخ وړل کیږي.

افغان طبي زده‌کړیالان په پاکستان کې د طب او غاښونو شورا د هغو پرېکړو پر ضد اعتراض لري، چې د دوی د زده‌کړو پر دوام اغېز کولی شي.

له دې مخکې د لاهور او سند سترو محکمو هم د لنډمهاله حکمونو پر صادرولو  په پنجاب او سند ایالتونو کې د افغان زده‌کړیالانو پر وړاندې د ځینو اقداماتو عملي کېدل درولي وه.

وسیم حیدر ویلي؛ هیله لري، چې د دوسیې له هر اړخیزې ارزونې وروسته د افغان زده‌کړیالانو تحصیلي راتلونکی خوندي او د پاکستان د طب او غاښونو شورا د لانجمنې خبرتیا په اړه بیاکتنه وشي.

دغه دوسیه د ډېرو افغان زده‌کړیالانو لپاره ځانګړی اهمیت لري؛ ځکه، چې یو شمېر یې د طب زده‌کړو په وروستیو کلونو کې دي او اندېښنه لري، چې د مقرراتو بدلون به یې د زده‌کړو دوام او کاري راتلونکی له ستونزو سره مخ کړي.

د اسلام‌‌آباد ستره محکمه به اوس د افغان زده‌کړیالانو پر ثبت شوې دعوه پرېکړه وکړي.

د بشري حقونو «حال‌وش» ډلې راپور ورکړی، چې د ایران د سویل ختیځ سراوان ښار ته څېرمه د سختې تندې له کبله د ښځو او ماشومانو پر ګډون لږ تر لږه ۱۷ افغان کډوال مړه شوي دي.

د دغه بنسټ د راپور له مخې، دا پېښه د سپټمبر پر لسمه د سراوان ښار د روتک برخې د مک‌سوخته په اړوند سیمه کې رامنځته شوې ده.

د راپور له مخې: د قربانیانو مړي وروسته د خاش ښار یوې سړې خونې ته لېږدول شوي؛ ځکه، چې د سراوان سړې خونې د مړو د ساتلو لپاره کافي ځای نه‌درلود.

حال‌وش وايي، پېنځه قربانیان د افغانستان د بغلان ولایت د یوې کورنۍ غړي وه، چې یوه ۴۵ کلنه مور او څلور یې ۲۲، ۱۸، ۱۶ او ۱۴ کاله عمرولرونکې لوڼې دي.

د دغه بنسټ د څرګندونو له مخې، لږ تر لږه شپږ نور قربانیان هم له ۱۴ کلونو کم عمره ماشومان ول.

عیني شاهدانو او د قربانیانو خپلوانو ویلي، چې کډوال د سفر پر مهال د اوبو له سخت کمښت سره مخ شوي او یو شمېر یې په لنډ واټن کې له یو بل سره نږدې مړه شوي دي.

د قربانیانو یوه خپلوان ویلي، چې له دغې ډلې سره مل نرینه د سفر پر مهال له ښځو او ماشومانو بېل شوي او ښځې او ماشومان د کافي اوبو له شتون پرته خپلې لارې ته دوام ورکړی دی.

حال‌وش ویلي، چې له پېښې څلور ورځې وروسته هم د قربانیانو کورنیو د مړو د لېږد او خاورو ته سپارلو لپاره هڅې کولې.

دې بنسټ ټینګار کړی، چې د قربانیانو کره شمېر او د پېښې ټول جزئیات یې په خپلواکه توګه نه‌دي تائید کړي او د یو شمېر قربانیانو هویت او د مړینې کره لامل اوس هم تر څېړنې لاندې دی.

د عامې روغتیا وزارت د خوړو او درملو مرستیال حمدالله زاهد او ورسره مل پلاوي هند ته د سفر پر مهال په ممبۍ ښار کې د درملو او خوراکي توکو د کیفیت د څارنې له یوه خصوصي لابراتوار او د ګجرات ایالت له څو هغو کارخونو لیدنه وکړه، چې طبي وسایل، خوراکي توکي او د طبي محصولاتو اومه توکي تولیدوي.

د عامې روغتیا وزارت ویلي، په ممبۍ کې د کیفیت د څارنې له لابراتوار څخه د لیدنې پر مهال د هغو درملو او خوراکي توکو د آزمون بهیر وکتل شو، چې نورو هېوادونو ته صادرېږي.

په دې لیدنه کې دواړو لوریو د کیفیت د څارنې، د لابراتوار له تخنیکي وړتیاوو د ګټې اخیستنې او د کارکوونکو د وړتیاوو لوړولو په برخو کې د همکاریو پر پیاوړتیا خبرې وکړې.

د هوکړې له مخې؛ هندي لابراتوار به افغان لوري ته د همکاریو داسې بشپړه طرحه وړاندې کړي، چې له هر اړخیزې ارزونې وروسته د ګډو همکاریو د څرنګوالي د روښانه کولو لپاره تخنیکي ناستې ترسره شي.

دغه راز یاد لابراتوار د وړتیاوو لوړولو په برخه کې د همکارۍ چمتووالی ښودلی او د عامې روغتیا وزارت به هم اړین معلومات دې مرکز ته وړاندې کړي.

د دې سفر په بله برخه کې د عامې روغتیا وزارت پلاوي د ګجرات ایالت د طبي وسایلو له یوې تولیدي کارخانې، د خوراکي توکو له یوې لویې تولیدي کارخانې او د طبي محصولاتو د اومو توکو له یوې تولیدي کارخانې لیدنه وکړه.

د دغو لیدنو پر مهال د تولیدي بهیر، تخنیکي وړتیاوې، د ټکنالوژۍ کارونه او د کیفیت د معیارونو مراعاتول وکتل شول. همدارنګه، د معیاري طبي وسایلو، خوراکي توکو او د طبي محصولاتو د اومه توکو د تولید او برابرولو، د سوداګریزو اړیکو د پراختیا او له شته وړتیاوو څخه د ګټې اخیستنې په اړه خبرې وشوې.

د عامې روغتیا وزارت وایي؛ د شوې هوکړې له مخې به هندي کارخانې د خپلو تولیدي محصولاتو تفصیلي نوملړ له افغان لوري سره شریک کړي، چې د اړتیاوو له ارزونې وروسته د باکیفیته او معیاري محصولاتو د مناسبې بیې په بدل کې د برابرولو زمینه برابره شي.

دغه راز د تجربو او ټکنالوژۍ د لېږد او په افغانستان کې د طبي وسایلو د تولید د زمینې د ارزونې لپاره، د طبي وسایلو د تولیدي کارخانې مسوولانو ته د سفر بلنه ورکړ شوې ده.

دا لیدنې په داسې وخت کې ترسره کیږي، چې د عامې روغتیا وزارت هڅه کوي د سیمې هېوادونو له تخنیکي او تولیدي وړتیاوو څخه پر ګټه اخیستنه د باکیفیته او معیاري درملو، طبي وسایلو او طبي توکو ته د لاسرسي زمینه نوره هم پیاوړې کړي.