Connect with us

سوداگري

د افغانستان اوسپنې‌پټلۍ د پراختیا لپاره بېلابېلې پروژې تر کار لاندې دي- حق‌شناس

د دې وزارت ویاند محمد اشرف حق شناس ویلي؛ اوسمهال د اړینو ریلي‌پټلیو د لارو په ګدون د هرات- کندهار او په بلخ، پکتیا او تورغونډۍ کې د اوسپنې‌پټلیو د غځولو د سروې کار روان دی.

خپور شوی

د

د ټولګټو چارو وزارت په ټول افغانستان کې د اوسبنې‌پټلۍ د ګڼو پروژو له چټکتیا خبر ورکړ، چې موخه یې د هېواد د ټرانسپورټي بنسټونو پیاوړتیا او په مرکزي او سویلي آسیا کې د یو مهم ټرانزیټ دهلیز کېدا ته وده ورکول دي.

د دې وزارت ویاند محمد اشرف حق شناس ویلي؛ اوسمهال د اړینو ریلي‌پټلیو د لارو په ګدون د هرات- کندهار او په بلخ، پکتیا او تورغونډۍ کې د اوسپنې‌پټلیو د غځولو د سروې کار روان دی.

دا هڅې د هغه پراخ پلان برخه ده، چې د افغانستان لویې سرحدي لارې له یوه متحد ریلي سیسټم سره ونښلوي او ورسره به سوداګري، خوځښت او اقتصادي ودې ته د پام وړ آسانتیاوې برابرې کړي.

د افغانستان خصوصي سکټور د اوسپنې پټلۍ له پراختیا خپل ملاتړ څرګند کړی؛ د صادراتو او ملي عوایدو د زیاتوالي او بهرنۍ پانګونې د راجلبولو لپاره یې پر وړتیا ټینګار کړی دی.

د سوداګرۍ مشران په دې باور دي، چې د دې پروژو له بشپړیدا سره به په سیمه‌ییزو اکمالاتي زنځیرونو کې د ګډون او داخلي لوژستیک ښه کولو لپاره د هېواد وړتیاوې بر ګوته کړي.

د هېواد په لویدیځ کې د خواف- هرات د اوسپنې‌پټلۍ د درېیم پړاو ودانیزې چارې له دې مخکې روانې دي. تمه ده، چې دا اړین دهلیز، چې افغانستان له ګاونډي ایران سره نښلوي؛ د بار وړلو او مسافرو لېږد دواړو ته آسانتیا برابروي.

ایراني رسنیو راپور ورکړی، چې د هرات او مشهد ترمنځ د مسافر وړونکي ریلي سرویس خدمت ډېر ژر فعال شي. دا پرمختګ به د پولې دواړو خواوو ته د نښلولو لپاره یو اړین ګام وي.

په ورته وخت کې، د ټرانس- افغان اوسپنې‌ټلۍ دهلیز سټراټیژیکې پروژې ته چمتووالی پیل شوی، چې موخه یې د افغانستان له لارې ازبکستان له پاکستان سره نښلول دي.

د دې لارې بشپړېدا به سیمه‌ییزې سوداګرۍ وده، د بار وړلو د لیږد وخت لنډولو او له وچې پورې تړلو مرکزي آسیا هېوادونو لپاره سمندري بندرونو ته د لاسرسي لپاره اړین رول ولوبوي.

دا بدلونونه د افغانستان د پراخو هڅو یوه برخه ده، چې ځان د سیمه‌ییزې سوداګرۍ او ټرانزیټ مرکز په توګه بیا راڅرګند کړي؛ مرکزي آسیا، سویلي آسیا، منځني ختیځ او هاخوا سره ونښلوي. اوسني حکومت د بنسټونو بیارغونې ته لومړیتوب ورکړی او پر مهمو دهلیزونو لکه لاجورد لاره، د چابهار دهلیز او ټرانس-افغان اوسبنې‌پټلۍ تمرکز کوي.

سره له دې، چې روانې اقتصادي ننګونې شتون لري؛ افغان چارواکي ژمن دي، چې هېواد د براعظمونو ترمنځ پر یوه پل بدل کړي. د هغې جغرافیایي ګټې، چې کارول شوې ندي؛ له ټرانزیټي ظرفیت څخه ګټه پورته کړي. د اوسپن‌پټلۍ شبکې پراختیا د دې لید لپاره مرکزي ده؛ ځکه، چې د اقتصادي ځان‌بسیاینې او سیمه‌ییز ادغام لپاره نوې هیلې راټوکوي.

سوداگري

د افغانستان، ازبکستان او قرغزستان د استازو سوداګریزه ناسته ترسره شوه

په دې ناسته کې د ټرانزیټ او سوداګرۍ په برخه کې د آسانتیاوو برابرولو او همداراز د ازبکستان او قرغیزستان بازارونو ته د افغانستان د صادراتي توکو د لاسرسي او د منځنۍ آسیا په نړیوال صنعتي نندارتون کې د افغانستان د غړیتوب په اړه هر اړخیز بحث او خبرې وشوې.

Published

on

د منځنۍ آسیا نړیوال صنعتي نندارتون په څنډه کې د افغانستان د صنعت او سوداګرۍ وزیر نورالدین عزیزي، د ازبکستان جمهوریت د پانګونې، صنعت او سوداګرۍ وزیر لذیز قدرتوف او د قرغزستان جمهوریت د اقتصاد او سوداګرۍ وزارت مرستیال  سکندر اسینګلدیویچ آسیلکولوف ترمنځ د ټرانزیټ او سوداګرۍ په برخه کې د آسانتیاوو برابرولو لپاره درې اړخیزه غونډه جوړه شوه.

په دې ناسته کې د ټرانزیټ او سوداګرۍ په برخه کې د آسانتیاوو برابرولو او همداراز د ازبکستان او قرغزستان بازارونو ته د افغانستان د صادراتي توکو د لاسرسي او د منځنۍ آسیا په نړیوال صنعتي نندارتون کې د افغانستان د غړیتوب په اړه هر اړخیز بحث او خبرې وشوې.

په پای کې د ټرانزیټ، سوداګرۍ او په ځانګړي توګه د افغان صادراتي توکو لپاره د اړینو آسانتیاوو برابرولو لپاره د ګډ کاري ګروپ پر جوړولو سربیره د منځنۍ آسیا په نړیوال نندارتون کې د افغانستان د غړیتوب په اړه هوکړه وشوه.

د یادونې ده، چې دغه نړیوال صنعتي نندارتون د منځنۍ آسیا هېوادونو، روسیې او بېلاروس په ګډون جوړ شوی او د افغانستان له غړیتوب سره به افغان صنعتي شرکتونه وکولی شي د غړیتوب امتیازونو پر کارولو خپل تولیدات په نړیواله کچه نندارې ته وړاندې کړي.

Continue Reading

سوداگري

ازبکستان ته د صنایعو او سوداګرۍ د وزیر سفر؛ په نړیوال صنعتي نندارتون کې د افغانستان پیاوړی ګډون

د ورکړ شویو معلوماتو له مخې؛ په دې نندارتون کې له ۶۰ څخه زیات افغان شرکتونه برخه لري.

Published

on

د افغانستان د صنایعو او سوداګرۍ وزیر نورالدین عزیزي په نړیوال صنعتي نندارتون« د منځنۍ آسیا اینوپروم» » کې د ګډون لپاره ازبکستان ته سفر کړی دی.

دا نندارتون د صنایعو د ودې، د پرمختللیو ټکنالوژیو د معرفي کولو او د پانګونې د همکاریو د پراختیا لپاره جوړ شوی او په کې د بېلابېلو هېوادونو لکه روسیې، بېلاروس، قزاقستان، قرغیزستان او تاجکستان چارواکي، پانګوال او تولیدوونکي ګډون لري.

د ورکړ شویو معلوماتو له مخې؛ په دې نندارتون کې له ۶۰ څخه زیات افغان شرکتونه برخه لري.

د پنبې، سکرو، درملو او کرنیزو محصولاتو په برخو کې د افغان شرکتونو حضور د دې ښکارندوي دي، چې افغانستان هڅه کوي خپلې سوداګریزې اړیکې پیاوړې کړي او د سیمې پر کچه خپل اقتصادي ظرفیتونه معرفي کړي.

« د منځنۍ آسیا اینوپروم » نندارتون یو له سترو صنعتي او پانګیزو پېښو څخه ګڼل کېږي، چې د هېوادونو ترمنځ د اقتصادي همکاریو د پراختیا لپاره یو مهم فرصت برابروي.

Continue Reading

سوداگري

د افغانستان د هوايي ټرانزیټ عواید زیات شوي؛ له الوتنو میلیونونه ډالر ترلاسه کېږي

د یاد راپور له مخې؛ اوس‌ مهال په اوونۍ کې نږدې دوه زره الوتنې د افغانستان له فضا تېرېږي، چې دا شمېر د تېر کال پر پرتله شاوخوا پېنځه ځلې زیاتوالی ښيي.

Published

on

په داسې حال کې، چې د نړۍ د الوتنو مخه د سیمې د کړکېچونو له کبله افغانستان ته رااوښتې؛ سویس انفو راپور ورکړی، چې د افغانستان له هوايي حریم څخه د الوتکو تېرېدا د دې هېواد لپاره د پام وړ عواید رامنځته کړي دي.

د یاد راپور له مخې؛ اوس‌ مهال په اوونۍ کې نږدې دوه زره الوتنې د افغانستان له فضا تېرېږي، چې دا شمېر د تېر کال پر پرتله شاوخوا پېنځه ځلې زیاتوالی ښيي.

د یاد راپور د څرګندونو له مخې؛ له هرې الوتکې شاوخوا ۷۰۰ ډالر د تېرېدا حق اخیستل کېږي، چې په ټولیزه توګه اوونیز عواید شاوخوا ۱.۴ میلیون او کلني عواید یې له ۷۰ میلیون ډالرو اوړي.

دا زیاتوالی په داسې حال کې رامنځته شوی، چې په اوکراین کې جګړې او د منځني ختیځ کړکېچونو د اروپا او آسیا ترمنځ دودیزې هوايي لارې محدودې کړي او هوايي شرکتونه اړ دي، چې د افغانستان په ګډون بدیلې لارې وکاروي.

د راپور له مخې؛ د ډېرو نورو هېوادونو پر پرتله د افغانستان له هوايي حریم څخه د تېرېدا فیس د هرې الوتنې لپاره ثابته کچه لري او د الوتکې د وزن یا واټن له مخې نه‌محاسبه کېږي.

سره له دې ځینې اندېښنې هم وړاندې شوې دي.

د راپور له مخې؛ په افغانستان کې د پرمختللي هوايي ټرافیک د څارنې سیسټم د نشتوالي له کبله پیلوټان خپله د اړتیا وړ همغږي ترسره کوي، چې دې موضوع نیوکې رامنځته کړې دي.

دغه راز ځینو هوايي شرکتونو د امنیتي وضعیت او د لارو د بدلون له کبله خپلې ځینې الوتنې د منځني ختیځ پر لور لغوه کړي او د سفري بازار پاملرنه نورو لوریو؛ لکه اروپا او کارائیب ته زیاته شوې ده.

دا بدلونونه ښيي، چې افغانستان سره له ګڼو ستونزو؛ په نامستقیمه توګه د سیمې له ژیوپولیټیک بدلونونو ګټه اخیستې او د هوايي ټرانزیټ یوه اړینه لار ګرځېدلې ده.

Continue Reading
Advertisement

Trending

Copyright © 2025 Ariana News. All rights reserved!