نن چارشنبه د غبرګولي شپارلسمه د افغانستان بانک چارسمبالي هدایت الله بدري د ملګرو ملتونو پراختیايي پروګرام له رییس سټیفن راډریکز سره د افغانستان بانک پر بېلابېلو موضوعاتو خبرې وکړې.

د افغانستان بانک ویلي؛ په دې لیدنه کې هدایت الله بدري بانکي سکټور، اسلامي بانکوالي، د اداینو برېښنایي کول او کوچني مالي تمویلات د اقتصادي پرمختګ په برخه کې د ارزښت وړ یاد کړل او د دې برخو پیاوړتیا یې د اوسني عصر اړتیا وګڼله.

بدري ویلي؛ د افغانستان بانک بریالی شوی، چې بانکي سکټور په ښه ډول مدیریت کړي، د اسلامي بانکوالۍ د پراختیا په برخه کې د پام وړ ګامونه پورته کړي، د اداینو د برښنایي کولو په برخه کې عملي اقدامات تر سره او د کوچنیو مالي تمویلاتو د پیاوړتیا لپاه منظم قوانین او مقررات رامنځته او خپل مثبت رول ولوبوي.

نوموړي زیاته کړې؛ مونږ باور لرو، چې مناسبو مالي خدمتونو ته لاسرسی کولی شي د ټیټ عاید لرونکیو خلکو په اقتصادي پیاوړتیا او د بېوزلۍ په کمولو کې مهم رول تر سره کړي.

په دې غونډه کې د ملګرو ملتونو د پراختیايي پروګرام رییس سټیفن راډریکز د افغانۍ د ثبات، انفلاسیون د کنترول، بانکي سکټور د مدیریت او د ټولیز اقتصاد په پرمختګ کې د افغانستان بانک د لاسته راوړنو د ستاینې ترڅنګ د بانکي سکټور، اسلامي بانکوالۍ د پراختیا، کوچنیو مالي تمویلاتو، اداینو د برښنايي کولو او یو شمېر نورو برخو کې د همکارۍ ژمنه وکړه.

ویل کیږي، چې د افغانستان بانک له ټولو مرسته کوونکیو بنسټونو سره د غوره اړیکو غوښتونکی دی او هیله لري، چې مرسته کوونکي بنسټونه به خپلې مرستې د بېکارۍ د کچې پر کمولو او نویو دندو رامنځته کولو راوڅرخوي.

ملا عبدالغني برادر نن د غبرګولي پر شپارلسمه د اندونیزیا د سرې میاشتې او جوماتونو شورا رییس محمد یوسف کالا پر مشرۍ له یوه پلاوي سره وکتل.

د ریاستالوزراء اقتصادي مرستیالۍ ویلي، چې د دواړو لوریو ترمنځ پر سیاسي، اقتصادي، سوداګریزو او د دواړو هېوادونو د ولسونو تر منځ د دوه اړخیزو اړیکو پر پراختیا خبرې وشوې.

د ریاست الوزراء اقتصادي مرستیال ویلي، اوسمهال د دغو اړیکو د پراختیا لپاره ښه زمینه برابره شوې او اړتیا ده، چې دواړه هېوادونه یې د پياوړتیا لپاره ګډ کار وکړي.

 ملا برادر زیاته کړې؛ په افغانستان کې د انرژۍ، کانونو، بندونو، بېخبناوو او نورو برخو کې د پانګونې ښه فرصتونه رامنځته شوي او اندونیزیايي پانګوال کولی شي په یادو برخو کې پانګونه وکړي.

د نوموړي د څرګندونو له مخې؛ اسلامي امارت پانګوالو ته لازمې اسانتیاوې رامنځته کړي او د هر ډول همکارۍ ډاډ ورکوي.

د انډونیزیا د سرې میاشتې او جوماتونو شورا رییس په افغانستان کې د رامنځته شویو پرمختګونو د ستاینې تر څنګ ویلي؛ دوی به د انډونیزیا حکومت، خلکو او نړۍ ته د افغانستان واقعي وضعیت په ډاګه کړي.

کالا ویلي؛ انډونیزیا په بېلابېلو برخو کې له افغانستان سره د خپلو اړیکو پراخول غواړي او پانګوال لېواله دي، چې د افغانستان په کانونو کې پانګونه وکړي. نوموړي زیاته کړې؛ په نږدې راتلونکي کې به د افغانستان په کانونو کې د پانګونې په موخه انډونیزیا اقتصادي پلاوی کابل ته راشي او دلته به په بېلابېلو برخو کې د ګډو اقتصادي همکاریو  په اړه له افغان لوري سره بحثونه ولري.

ویل کیږي، چې دواړو لوریو د افغانستان او انډونيزيا ترمنځ په سياسي، اقتصادي، سوداګريزو او تعليمي برخو کې د اړیکو پر پراختيا ټينګار وکړ.

د کار او ټولنیزو چارو وزارت چارسمبالی عبدالمنان عمري د روسیې په سنټ پیترزبورګ اقتصادي غونډه کې د ګډون لپاره دې هېواد ته سفر کړی دی.

د کار او ټولنيزو چارو وزارت په خبرپاڼه کې راغلي، چې عبدالمنان عمري نن (چارشنبه د غبرګولي شپاړلسمه) روسيې ته رسېدلی دى.

دغه اقتصادي سرمشریزه به نن د روسیې په سنټ پیترزبورګ ښار کې پیل شي او څلور ورځې به روانه وي.

د کار او ټولنیزو چارو وزارت چارسمبالی به په یاده اقتصادي سرمشریزه کې؛ د سیمې او نړۍ هېوادونو سره د بالفعله او بالقوه اقتصادي او سوداګریزو فرصتونو په اړه د ګڼ‌شمېر هېوادونو سیمه‌ییزو او نړیوالو ټولنو له استازو سره هم وګوري.

ویل کیږي، چې په دې سرمشریزه کې د ګډونوالو تر منځ د اقتصاد او تجارت په اړوند برخو کې  تړونونه لاسلیک کیږي.