د روسیې په فډراسیون کې د افغانستان اسلامي امارت سفیر ګل حسن حسن د دې هېواد له میشتو افغانانو سره تعارفي ناسته ترسره کړې ده.

په دې ناسته کې سفیر ګل حسن حسن له ګډونوالو د هرکلي ترڅنګ د افغانستان په اړه د روسیې له مهم ډیپلوماتیک ګام ستاینه وکړه او هیله‌من شو، چې د اسلامي امارت د رسميت پېژندل به په بېلابېلو برخو کې د دواړو هېوادونو دوه اړخیزې اړیکې نورې هم پیاوړې کړي.

سفیر همدارنګه ټینګار کړی، چې هغه به له خپلې کاري ډلې ​​سره یوځای په روسیه کې میشتو افغانانو ته صادقانه خدمت وکړي او هڅه به وشي، چې د دوی ستونزې او اړتیاوې پخپل وخت حل کړو.

په روسیه کې د میشتو افغانانو قومي مشرانو او د زده‌کړیالانو استازو هم د ناستې پر مهال خبرې وکړې.

دوی د افغانستان په اړه د روسیې له وروستي دریځ څخه خوښي څرګنده کړه او د سفیر ګل حسن حسن له ټاکل کېدو یې هرکلی وکړ.

ویناوالو ویلي؛ د روسیې لخوا د اسلامي امارت پر رسمیت پېژندل نه یوازې دوه اړخیزې اړیکې پراخوي، بلکې په روسیه کې به د میشتو افغانانو د ننګونو په حل کې هم اغېزمن رول ولوبوي.

د افغانستان د سولې پخواني افغان ــ امریکایي استازي زلمي خلیلزاد له ایران څخه د افغان کډوالو ډله‌ییزې ایستنې ته په غبرګون کې دا کړنه “وحشیانه” یاده کړې او له ایران څخه یې د دې بهیر د ورو کولو او له نړیوالو مرستندویه ادارو سره د همغږۍ غوښتنه کړې ده.

خلیلزاد ویلي: هغه د هرات په سرحدي سیمه کې له خپلو همکارانو څخه، چې هلته د سلګونو زره افغان کډوالو سره د مرستې لپاره تللي؛ ځوروونکي راپورونه ترلاسه کړي دي.

د نوموړي د څرګندونو له مخې؛ ایراني ځواکونه له سړکونو پرته له مخکنۍ خبرتیا افغانان نیسي، په بسونو کې اچوي او تر افغان پولې یې رارسوي.

هغه زیاته کړې: “کله، چې کډوال غواړي په سوله‌ییز توګه له خپلو کورنیو سره له دې هېواده ووځي؛ نو دوی ته ویل کیږي، چې د دوی د کورنۍ غړي به جلا وشړل شي او دوی باید پخپله د هغو لټون وکړي.”

خلیلزاد خبرداری ورکړی، چې افغانستان پخپله له جګړې وروسته په بحران کې دی؛ نشي کولی په لنډ وخت کې دومره لوی شمېر کډوال جذب کړي.

هغه دا ټینګار هم کړی؛ ډېری راستنېدونکي کلي یا خپلوان نلري، چې ورستانه شي.

هغه له ایران اسلامي جمهوریت څخه وغوښتل؛ د جبري ایستنې بهیر دې ورو او له افغان او نړیوالو مرستندویه ادارو سره همغږي وکړي او ډاډ ترلاسه کړي، چې کډوال انسانه او باعزته خپل هېواد ته ستانه شي.

د امریکا ولسمشر ډونالډ ټرمپ یو ځل بیا په ۲۰۲۱ کال کې له افغانستان څخه د امریکایي ځواکونو د وتلو پر څرنګوالي سختې نیوکې کړي او د پوځ پخوانی لوی درستیز جنرال مارک میلي یې د پوځي تجهیزاتو د پاتې کېدو پر وړاندیز “احمق” وباله.

ټرمپ د سې‌شنبې پر ورځ په واشنګټن کې د کابینې غونډې ته د خبرو پر مهال ویلي، چې د پوځ له دې پرېکړې سره، چې په افغانستان کې یې د میلیارډونو ډالرو پوځي تجهیزات پرېښول؛ مخالفت و او پدې اړه یې له جنرال میلي سره بحث هم کړی دی.

هغه زیاته کړې: “زه پوهیدم، چې میلي یو احمق دی.”

ټرمپ ويلي:  جنرال میلي استدلال کړی و، چې له افغانستان څخه د تجهیزاتو لېږدول ګران تمامیږي او غوره یې پرېښودل دي؛ خو دا پرېکړه او د امریکايي ځواکونو چټک او نامنظم وتل د امریکا په تاریخ کې “تر ټولو شرمونکې شېبه” وه.

هغه ټینګار کړی، چې اصلي ستونزه نه یوازې د سرتېرو ایستل ول، بلکې د وتلو هغه نامنظمه، وژونکې او سپکوونکې طریقه وه، چې په کې ترسره شوه.

هغه زیاته کړې: ” نه یوازې مونږ له افغانستان څخه راووتو، بلکې له شرموونکو تلفاتو سره مو هغه ځای پرېشوو، چې راته شرم دی.”

ټرمپ له دې مخکې هم د جو بایډن اداره او د امریکا پوځي قومندانان پدي بڼه وتلو تر نیوکې لاندې نیولي او دا یې د هېواد د معاصر تاریخ ترټولو بده پوځي پرېکړه یاده کړې وه.

د فاکس نیوز د راپور له مخې: جنرال میلي، چې اوس متقاعد دی؛ تر اوسه یې د دغو نویو څرګندونو په اړه غبرګون ندی ښودلی؛ خو پخوا یې ویلي وه، چې ټرمپ فاشیست دی او واک ته له بیا رسېدو سره به له خپلو منتقدینو غچ واخلي.