د افغانستان اسلامي امارت د ویاند مرستیال حمدالله فطرت ویلي، چې د اسلامي امارت رهبر د پروان او کاپیسا ولایتونو د علماوو شوراګانو له مسوولانو او غړو سره لیدلي او د علماوو د مسوولیتونو، د امت د یووالي، د شریعت د پلي کېدو او د جهاد د تاریخ د ساتنې په اړه یې خبرې کړې دي.

د فطرت د څرګندونو له مخې، په دې غونډه کې د بهرنیو چارو وزیر، یو شمېر علماء او د اسلامي امارت نورو چارواکو هم ګډون درلود.

په دې ناسته کې د اسلامي امارت رهبر د پروان او کاپیسا د علماوو شوراګانو فعالیتونه ستایلي او ویلي یې دي، چې اوس علماوو ته ښه فرصت برابر شوی، چې د خلکو د ذهنیتونو د اصلاح او د دیني پوهاوي د پراختیا لپاره ډېرې نورې هڅې وکړي.

هغه ټینګار کړی، چې علماء اړ دي په خپلو اړوند ولایتونو کې د خلکو د شرعي ستونزو د حل لپاره هڅه وکړي او د ټولنې په دیني لارښوونه کې فعاله ونډه ولري.

د اسلامي امارت رهبر د خپلو خبرو په یوه برخه کې علماوو ته وویل: «هڅه وکړئ، چې خپلمنځي یووالی او اتفاق نور هم پیاوړی کړئ؛ ځکه د علماوو اتحاد د اسلامي امت د یووالي لامل ګرځي.»

هغه د فقهي مجلسونو د ارزښت په اړه هم خبرې کړي او زیاتوي، چې د دغو ناستو جوړېدل د شرعي مسایلو د ښې څېړنې، د حق د څرګندېدو او د علماوو ترمنځ د مینې او همغږۍ د پیاوړتیا سبب کېږي.

د فطرت وایي؛ د اسلامي امارت رهبر ټینګار کړی، چې الله تعالی پر علماوو لوی احسان کړی او هغوی یې پر دیني علم ویاړلي ګرځولي دي.

هغه ویلي، دیني علم یو سپېڅلی صفت دی او علماء د الله تعالی امانت‌ساتونکي او د پیغمبرانو وارثان دي؛ هغه کسان دي، چې د خلکو د دیني لارښوونې مسوولیت ورپرغاړه دی.

د اسلامي امارت رهبر زیاته کړې؛ علماوو د تاریخ په اوږدو کې د دین او اسلامي شریعت د ساتنې لپاره استدلال او توره کارولې او د دین د خپرېدو په لاره کې یې ګڼ کتابونه، رسالې، شرحې او تفسیرونه لیکلي دي.

هغه ټینګار کړی، چې د اسلامي شریعت پلي کول او خلکو ته یې په ښه ډول تشریح کول د علماوو له مهمو مسوولیتونو څخه شمېرل کېږي.

دغه راز نوموړي ویلي؛ علما دنده لري، چې د اسلامي امارت صادر شوي فرمانونه خلکو ته روښانه کړي، قوانین ټولنې ته ورسوي او خلک د دغو فرمانونو له ارزښت او مقام خبر کړي.

د اسلامي امارت رهبر د خپلو خبرو په یوه بله برخه کې له علماوو غوښتي، چې د اطلاعاتو او کلتور وزارت د جهادي آثارو د ساتنې له ریاست سره بشپړه همکاري وکړي او د مجاهدینو د جهادي آثارو د ساتنې او د جهاد د تاریخ د ثبت لپاره هڅې وکړي.

هغه ټینګار کړی، چې د شهیدانو پر مزارونو او د شهادت پر ځایونو دې لوحې ولګول شي؛ د هغوی د قربانیو په اړه دې کتابونه او رسالې ولیکل شي او د جهاد تاریخ او د شهیدانو د شهادت ځایونه دې کره او روښانه ثبت شي، چې راتلونکي نسلونه د مجاهدینو له سرښندنو خبر شي.

د اسلامي امارت رهبر له علماوو هم غوښتي، چې خلکو ته د جهاد فضیلت او د شهیدانو، معلولانو او یتیمانو مقام بیان کړي، چې ټولنه تېر تاریخ او سرښندنې هېرې نه‌کړي.

ویل کیږي، چې د غونډې په پای کې حاضرو علماوو یو ځل بیا د اسلامي امارت له رهبر سره خپل بیعت تازه کړ او ژمنه وشوه، چې د رهبرۍ او اسلامي نظام ملاتړ به کوي.

د افغانستان په چارو کې د چین ځانګړي استازي یو شیائویونګ د خپل سفر پر مهال د قطر د بهرنیو چارو وزارت د دولت له وزیر محمد بن عبدالعزیز بن صالح الخلیفي سره ولیدل او دواړو لوریو د افغانستان پر وروستیو بدلونونو بحث او خبرې وکړې.

د قطر بهرنیو چارو وزارت د خبرپاڼې له مخې؛ دا لیدنه د هغو ګډو نړیوالو هڅو د پیاوړتیا پر لارو چارو راوڅرخېده، چې موخه یې په افغانستان کې د امنیت او ثبات ښه کول دي.

په دې لیدنه کې الخلیفي ټینګار کړی، چې قطر د شخړو د سوله‌ییزو حل لارو ملاتړ کوي او په سیمه او نړۍ کې د سولې او ثبات د پیاوړتیا هڅې هڅوي.

قطر په وروستیو کلونو کې د افغانستان په چارو کې فعاله ډیپلوماټیکه ونډه لرلې، چې په کې د افغان چارواکو او بهرنیو هېوادونو د استازو په ګډون د خبرو اترو کوربه‌توب هم رانغاړي.

د روسیې یوه لوړپوړي امنیتي چارواکي ویلي؛ مسکو له اسلامي امارت سره د «بشپړې ملګرتیا» د رامنځته کولو په حال کې دی او د سیمې له نورو هېوادونو غواړي، چې له کابل سره خپلې همکارۍ پراخې کړي.

د اینټرفاکس خبري آژانس د راپور له مخې؛ د روسیې د امنیت شورا منشي سرګې شویګو په قرغزستان کې د شانګهای همکاریو ټولنې ناستې ته ټینګار کړی، چې مسکو له کابل سره همکاري د سیمه‌ییز امنیت او پرمختګ لپاره مهمه ګڼي.

شویګو زیاته کړې؛ روسیه د اسلامي امارت له چارواکو سره «عمل‌پاله خبرې اترې» لري، چې د امنیت، سوداګرۍ، کلتوري تبادلو او بشري مرستو برخې رانغاړي.

هغه همداراز د افغانستان په اړه د شانګهای همکاریو ټولنې د تماس ډلې د بیا فعالولو وړاندیز کړی، چې د افغانستان د اړوند مسایلو لپاره ورسره سیمه‌ییزه همغږي پیاوړې شي.

روسي چارواکي د امنیتي اندېښنو له کبله له افغانستان سره نږدې همکاري اړینه بولي.

د یادونې ده، چې روسیې د یوازني هېواد په توګه اسلامي امارت پر رسمیت پېژندلی دی.