سیمه ییز خبرونه
د پاکستان د کراچۍ ښار د پولیسو پر مرکز په وسلوال برید کې څلور کسان وژل شوي

د راپورونو له مخې؛ د پاکستان په کراچۍ ښار کې تېره ورځ د پولیسو پر مرکز په برید کې څلور تنه وژل شوي دي.
د فرانسې خبري آژانس د راپور له مخې: د بریدګرو یوې ډلې د کراچۍ د پولیسو پر مرکزي دفتر وسلوالو ډله ییز برید کړی، چې څو ګړۍ روان و. په دغه برید کې درې بریدګر وژل شوي؛ دوه یې د ډزو په پایله کې وژل شوي او پر یو یې خپل ماین چاودېدلی دی.
د پاکستان د کورنیو چارو وزیر رانا ثناءالله سما تلویزیوني چینل ته ویلي، بریدګر د پولیسو د مرکز پردروازه توغندیز برید وکړ او ودانۍ ته ننوتل او بیا یې د پولیسو د مرکزي دفتر وداني او پر چت یې پوسته ونیوله.
په سیمه کې د ساعتونو لپاره د ډزو او لاسي بمونو د چاودنو غږونه اوریدل کیدل.
تحریک طالبان پاکستان د دغه برید مسوولیت منلی او د نورو بریدونو خبرداری یې هم ورکړی دی.
د دوی د اعلامیې له مخې، چې نن شنبه خپره شوې؛ له پولیسو یې غوښتي، چې د پوځ پر وړاندې له خپلې جګړې لرې پاتې شي.
په خبرپاڼه کې دا هم راغلي: مونږ یو ځل بیا امنیتي ادارو ته خبرداری ورکوو، چې د بې ګناه بندیانو په جعلي مقابله کې له شاهدۍ ډډه وکړي، کنه په راتلونکي کې به د بریدونو شدت زیات شي.
د پاکستان لومړي وزیر ټینګار کړی، چې په دغه هېواد کې به روان تاوتریخوالی له منځه یوسي.
شهبازشريف تویت کړی: پاکستان به نه يوازې ترهګري له منځه وړي، بلکې ترهګر به محاکمې ته هم راکاږي.
له دې مخکې د جنورۍ پر ۳۰ د پېښور پر یو جومات ځانمرګی برید شوی و، چې لومړی حکومت د ۱۰۲ کسانو د مړینې او څه دپاسه ۲۰۰ نورو د ټپي کیدو پخلی کړی و؛ خو بیا وروسته پولیسو وویل، چې په دې برید کې ۸۴ کسان وژل شوي، چې زیاتره يې پولیس ول.
سیمه ییز خبرونه
پاکستان د مستونګ په خونړۍ چاودنه کې هندي استخبارات تورن کړل

د شنبې پر ورځ د پاکستان په یوه جومات کې د یوې زورورې چاودنې له کبله د وژل شویو کسانو شمېر ۵۹ ته ورسېد او حکومت د چاودنې پړه د هند پر استخباراتي ادارې اچولې ده.
د رویترز خبري اژانس د راپور له مخې؛ چاودنه د جمعې پر ورځ د بلوچستان ایالت د مستونګ ښار په یوه جومات کې د پولیسو موټر ته نږدې په هغه سیمه کې رامنځته شوې، چې خلک د اسلام د ستر پیغمبر حضرت محمد ص د میلاد د نمانځلو لپاره راټول شوي وه.
پاکستانيو چارواکو پرلهپسې پر هند تور لګولی، چې په پاکستان کې له تاوتریخوالي ملاتړ کوي؛ خو هند تل دا ادعاوې رد کړې دي.
د پاکستان د کورنیو چارو لنډمهالي وزیر سرفراز بګتي د بلوچستان په مرکز کوټه کې رسنیو ته ویلي، ملکي ادارې، پوځي او نورې ټولې ادارې به پر ګډه د مستونګ په ځانمرګي برید کې د ښکېلو عناصرو پر ضد عملیات وکړي.
ده ويلي: په دغه ځانمرګي بريد کې د هند استخباراتي ادارې لاس درلود.
هغه د خپلې دې ادعا جزئیات او شواهد وړاندې نهکړل.
د بلوچستان ایالت د روغتیا ریاست ویاند وسیم بیګ ویلي، د جمعې له ورځې راپدیخوا په روغتون کې اووه نور کسان هم مړه شوي، چې ورسره د مړینې شمېر لوړ شوی او د نورو ټپیانو حالت هم د اندېښنې وړ دی.
د جمعې پر ورځ د خیبر پښتونخوا په شمال کې پر یوه جومات دوهیم برید لږ تر لږه پېنځه کسان ووژل. پولیسو د شنبې پر ورځ وویل چې دوی د ځانمرګي DNA د تحلیل لپاره لېږلې ده.
تر اوسه کومې ډلې د دغو بریدونو مسوولیت نهدی منلی.
د پاکستان په لویدیځو ایالتونو کې د وسلهوالو بریدونو زیاتوالي د جنورۍ د میاشتې پر عامو انتخاباتو چمتووالي سیوری اچولی؛ خو تر اوسه دغو بریدونو زیاتره امنیتي ځواکونه پر نښه کړي دي.
تحریک طالبان پاکستان، چې په ۲۰۰۷ ز.کال کې له رامنځته کېدو راپدیخوا په پاکستان کې د یو شمېر خونړیو بریدونو مسوولیت پر غاړه اخیستی؛ د جمعې د ورځې د چاودنو مسوولیت نهدی منلی.
سیمه ییز خبرونه
امریکا قطر ته د ۶ میلیارد دالرو ایراني پیسو د لېږد اجازه ورکړه

رویترز خبري اژانس راپور ورکړی، چې امریکا له جنوبي کوریا څخه قطر ته د ایران د ۶ میلیارد دالرو د لېږد بندیزونه لرې کړل.
د امریکا د بهرنیو چارو وزیر انتوني بلینکن څرګنده کړې، چې د دې بندیزونو بښل د امریکا د ملي امنیت پر ګټه دی.
په هغو اسنادو کې، چې د امریکا د کانګریس اړوند کمیتې ته استول شوي؛ د امریکا حکومت د لومړي ځل لپاره پر رسمي بڼه د دې هوکړې پربنسټ په دغه هېواد کې د پېنځه ایرانیانو د خوشې کیدو او په بدل کې د ایران له لوري د نیول شویو امریکايي وګړیو د خوشې کیدو یادونه کړې ده.
په دغه اعلاميه کې ويل شوي: د امريکا حکومت هوکړه کړې، چې په امریکا کې بندي پېنځه ایرانیان راخوشې او د ايران له مالي منابعو څخه شپږ میليارد دالره، چې په جنوبي کوريا کې کنګل شوي وه؛ قطر ته انتقال کړي او په دې توګه د هغو امريکايانو د خلاصون زمينه برابره کړي، چې په ايران کې بنديان دي.
د امریکا له نظره، دا لېږد ایران ته ډېره ګټه نه رسوي؛ ځکه، چې دا یوازې د بشري سوداګرۍ لپاره کارول کیدی شي.
د سپینې ماڼۍ ویاند ادرین واتسون د دوشنبې پر ورځ په یوه اعلامیه کې ویلي، چې د امریکا د بهرنیو چارو وزیر د سپتمبر پر اتمه د دې لېږد اجازه ورکړې وه او رسمي خبرتیا یې هم د دوشنبې پر ورځ د امریکا کانګرس ته واستوله.
د ځینو سرچینو د څرګندونو له مخې؛ قطر ته د ۶ میلیارد دالرو ایراني پیسو لېږد به راتلونکې اوونۍ پیل شي.
د اعلامیې له مخې، د بندیزونو په دې بښنه کې د ایران د تېلو ملي شرکت او د ایران مرکزي بانک او نور مالي بنسټونه شته، چې د کوریا جمهوریت له حسابونو څخه د سویس او جرمني حسابونو ته اړوند کنګل شوې پیسې لېږدول کیږي او بیا له دې حسابونه قطر ته انتقالیږي.
سیمه ییز خبرونه
امریکا، هند، سعودي عربستان او اروپايي ټولنه به د ریلي او بندري تړون مخکتنه وکړي

د سپینې ماڼۍ یوه چارواکي ویلي؛ د شنبې پر ورځ د نوي دیلي د جي – ۲۰ سرمشریزې په څنډه کې له یوه داسې څو ملیتي ریلي او بندري تړون مخکتنه کوي، چې منځنی ختیځ او جنوبي اسیا سره نښلوي.
رویترز راپور ورکړی، چې دا تړون په داسې یوه حساس وخت کې لاسلیک کیږي، چې د امریکا ولسمشر جو بایدن د نړیوالې بېخبنا په اړه د چین د یو کمربند او یوې لارې له فشار سره مقابله کوي او غواړي، چې واشنګتن د پرمختللیو هېوادونو لپاره د یو بدیل ملګري او پانګوونکي په توګه په جي ـ ۲۰ ګروپ کې 20راڅرګند شي.
د امريکا د ملي امنيت مرستيال سلاکار جان فاينر په نوي ديلي کې د دې ټولنې په کلنۍ سرمشريزه کې خبريالانو ته وويل، چې دغه تړون به په سيمه کې د ټيټ او منځني عايد لرونکیو هېوادونو په ګټه وي او په نړيواله سوداګرۍ کې به د منځني ختيځ لپاره مهم رول ولوبوي.
امریکایي چارواکو ویلي، چې له دې کاره یې موخه د اوسپنې پټلۍ له لارې هند د منځني ختیځ له هېوادونو سره نښلول دي. له دې سره د ترانزیت وخت، لګښتونه او د تېلو لګښت کمیږي او له فارس خلیج څخه اروپا ته د انرژۍ او سوداګرۍ په لېږد کې مرسته ده.
فاینر دا هم ویلي، د دې تړون هوکړه لیک به د اروپایي اتحادیې، هند، سعودي عربستان، عربي متحده اماراتو، امریکا او د جي – ۲۰ د نورو ونډوالو ترمنځ لاسلیک شي.
فاینر زیاته کړې: مونږ فکر کوو، چې د دې کلیدي سیمو نښلول یو لوی فرصت دی.
دا هڅه په داسې حال کې رامنځته کیږي، چې امریکا په منځني ختیځ کې یوې پراخې دیپلوماتیکې هوکړې ته د رسېدو لپاره هڅې کوي، چې سعودي عربستان اسرائیل پر رسمیت وپېژني.
فاینر زیاته کړې، چې د امریکا له نظره، دا تړون به په ټوله سیمه کې د تودوخې او په هغو سیمو کې، چې جګړې لیدل کیږي؛ د جنګ په کمولو کې مرسته کوي.
-
لوبی3 days ago
نوین الحق د کرکت له پنځوس اوریزو لوبو ګوښه شو
-
سوداگري4 days ago
د افغانستان او قزاقستان د خصوصي سکتور دوه اړخیزه ناسته ترسره شوه
-
تازه خبرونه3 days ago
په نیمروز ګمرک کې د دوه ټنو ایراني پلاستیکي بوجیو د قاچاق مخه ونیول شوه
-
تازه خبرونه4 days ago
مغرضو کړیو د ملګرو ملتونو ټولنه یرغمل کړې او زمونږ پر ضد کارول کېږي – ذبیح الله مجاهد
-
تازه خبرونه4 days ago
پاکستان له یو میلیون ډېر ناقانونه افغان کډوال وباسي
-
تازه خبرونه3 days ago
د افغانستان د خواړو او درملو ملي ادارې چارسمبالی ایران ته ولاړ
-
نړۍ4 days ago
په عراق کې اورلګېدنې له ۱۰۰ ډېر کسان مړه او ۱۵۰ نور ټپیان کړل
-
تازه خبرونه4 days ago
په افغانستان کې د ښځو له پامه غورزولو د نړیوال تعامل مخه نیولې