لوبی
د کرکت لوبې افغان مینه وال د نړیوال جام په لومړۍ لوبه کې ملي لوبډلې ته د بریا هیله کوي

د افغانستان کرکت ملي لوبډلې مینه والو د شل آوریز نړیوال جام په سیالیو کې، چې ټاکل شوې د شنبې په ورځ( د تلې ۳۰ / د اوکتوبر ۲۲) د ماسپښین ۳ بجې د انګلستان پر وړاندې ترسره شي؛ د کرکت ملي لوبډلې ته د بریا هیله کړې.
د افغانستان د کرکت ملي لوبډلې تر اوسه د شل آوریز نړیوال جام په ۴ پړاوونو کې ګډون کړی او ځینو پیاوړیو لوبډلو ته یې ماتې ورکړې؛ خو تر اوسه د دغه ډول سیالیو نیمه پایلوبې ته رسېدلی ندی.
د افغانستان کرکت ملي لوبډلې یو مینه وال ويلي: هیله من یم، چې د افغانستان د کرکت ملي لوبډله د نړیوال جام په دې پړاو کې ښه وځلیږي او د افغانستان لپاره ښې لاسته راوړنې ولري.
د افغانستان کرکت ملي لوبډله به د شل آوریز نړیوال جام په دولسم پړاو کې له انګلستان، نیوزیلیند، ایرلیند، سریلانکا او آسترالیا سره مخ شي. دې لوبډلې د نړیوال جام سیالیو په تېر پړاو کې دې مقام ته د غوراوي ۱۲ پړاو ته لار موندلې وه.
افغانستان د شل آوریز نړیوال جام سیالیو له پیل مخکې د بنګله دېش او پاکستان پر وړاندې دوه روزنیزې( تمریناتي) لوبې کړي دي؛ د کرکت ملي لوبډلې بنګله دېش ته په ۶۹ منډو ماتې ورکړه او د پاکستان پر وړاندې یې ۱۵۴ منډې ترسره کړې، خو د باران له کبله له پاکستان سره دا لوبه بې پایلې اعلان او لغو شوه.
د افغانستان کرکت ملي لوبډلې توپ وهونکي رحمان الله ګربز، چې له پاکستان سره په روزنیزه لوبه کې ټپي شوی و؛ د افغان کرکت مینه والو اندېښنې یې راوپارولې؛ خو ګربز څرګنده کړې، چې: اوس روغ شوی او د انګلستان پر وړاندې په لوبه کې به ولوبیږي.
ګربز وایي: زه ټولو مینه والو ته ډاډ ورکوم، چې زه د راتلونکیو سیالیو لپاره بشپړ چمتو یم.
محمد نبي او راشد خان هم هغه دوه لوبغاړي دي، چې په توپ وهنه او توپ اچونه کې ښه مهارت لري.
د انګلستان د کرکت ملي لوبډلې لوبډلمشر جو بتلر د راشد خان په اړه ویلي: هره هغه لوبډله، چې راشد خان ولري؛ په رښتیا پیاوړې ده. شل آوریزه کرکت لوبه یوه له هغو لوبو څخه ده، چې یوازې یو کس کولی شي لوبډله وګټي.
د افغانستان او انګلستان ترمنځ لوبه به د افغانستان پر وخت د شنبې پر ورځ د ماسپښین په ۳:۳۰ بجو پیل شي او د نورو شل آوریزو سیالیو په څېر به له آریانا تلویزیون څخه په ژوندۍ بڼه خپره شي.
لوبی
د چين اسیايي سیالیو لپاره د نرینهوو افغان کرکت لوبډله په ډاګه شوه

د افغانستان کرکت بورد د لوبغاړو غوراوي کمیتې؛ د نونسم پړاو اسیايي سیالیو لپاره د ګلبدین نایب پر مشرۍ د افغان ابدالیان لوبډلې او احتیاطي غړیو نوملړ اعلان کړ.
د افغانستان کرکت بورد د مهالوېش له مخې؛ به دغه سیالۍ د تلې پر ۵ / د سپتمبر پر ۲۷مه نېټه پیل شي، چې د تلې تر ۱۵ / د اکتوبر تر اوومې نېټې پورې به د چین په هانګجو ښار کې ترسره شي.
د افغانستان کرکت بورد ویلي؛ د ملي لوبډلې پیاوړی لوبغاړی ګلبدین نایب د دغې لوبډلې مشر ټاکل شوی، چې په کې محمد شهزاد، کریم جنت، صدیق الله اتل، فرید احمد ملک، قیس احمد او افسر ځاځی، چې له دې وړاندې یې د افغانستان په ګټه نړیوال کرکت کړی، راغلي دي.
دغه راز په دغه لوبډله کې نورعلي ځدراڼ، زبید اکبري، شرف الدین اشرف، سید احمد شېرزاد او شاهدالله کمال، چې د روان کال په جولای کې د اسیایي ایمرجېنګ سیالیو د افغان ابدالیان لوبډلې غړي وه؛ هم شتون ولري.
د دوی ترڅنګ د افغانستان له نولس کلنو کم عمره کرکت ملي لوبډلې ځوان تکړه توپوهونکی وفي الله تره خېل هم، چې د روان کال په مارچ او اپرېل میاشتو کې یې د افغانستان پر کوربهتوب د سریلانکا او بنګله دېش له نولس کلنو کم عمره لوبډلو پر وړاندې په درې اړخیزه لوبلړ کې ولوبېد، په دغه لوبډله کې شامل شوی دی.
د دغو سیالیو د اصولو له مخې به افغان ابدالیان لوبډله وار له مخه په کوارتر فاینل پړاو کې شتون ولري، چې د تلې پر ۱۱ او ۱۲ / د اکتوبر پر درېیمه او څلورمه نېټه به ترسره شي. دغه راز به د دغو سیالیو نیمه پایلوبې د تلې پر ۱۴ / د اکټوبر پر شپږمه او پایلوبه به یې د تلې پر ۱۵ / د اکتوبر پر اوومه نېټه ترسره شي.
دغه راز به د درېیم مقام لپاره سیالۍ، چې د برونز مدال د ترلاسه کولو لپاره ترسره کېږي؛ پر همدې اوومه نېټه په هانګجو ښار کې وشي.
د اسیايي سیالیو لپاره د افغان ابدالیان لوبډلې بشپړ نوملړ:
ګلبدین نایب لوبډلمشر، محمد شهزاد مرستیال لوبډلمشر او ویکت ساتونکی، صدیق الله اتل، زبید اکبري، نورعلي ځدراڼ، شاهدالله کمال، افسر ځاځی، وفي الله تره خېل، کریم جنت، شرف الدین اشرف، فرید احمد ملک، نجات مسعود، سید احمد شېرزاد، قیس احمد او ظاهر خان.
دغه راز ننګیال خروټی، محمد ابراهیم عبدالرحیمزی او الله نور ناصري د یادو سیالیو لپاره د احتیاطي لوبغاړو په توګه غوره شوي دي.
د افغانستان کرکټ بورد د لوبغاړو د غوراوي کمیتې مشر په دې اړه څرګنده کړې: مونږ هڅه کوو؛ افغان ابدالیان لوبډلې ته نورې زیاتې نړیوالې سیالۍ او سفرونه برابر کړو، چې دغه لوبغاړي په نړیواله کچه ډېر ولوبېږي. د روان کال اسیايي سیالۍ هم د یادو لوبغاړو لپاره یوه بهترینه موقع ده، چې په نړیواله کچه خپلې وړتیاوې نندارې ته وړاندې کړي. دا، چې د ۲۰۲۴ ز. کال شل اوریز نړیوال جام سیالۍ هم په راتلونکي کال کې ترسره کېږي؛ نو مونږ هڅه کوو، چې د یادو سیالیو لپاره هم ښه لوبډله غوره او ډېرې سیالۍ ورته برابرې او یادو سترو سیالیو ته پوره چمتو شي.
لوبی
د احمدشاه ابدالي فرست کلاس سیالیو پایلوبه میوند اتلانو وګټله

د احمدشاه ابدالي فرست کلاس سیالیو په پای لوبه کې د سې شنبې پر ورځ میوند چمپینز، هندوکش سترایکرز لوبډلې ته د اووه ویکتو پر توپیر ماتې ورکړه او د اړوند لوبو اتلولي یې خپله کړه.
د هندوکش بریدکوونکې لوبډلې زړهراکښونکې توپوهنه وکړه، چې په کې افتاب عالم (۸۳)، دروېش رسولي (۸۰) او شبیر نوري (۶۵) منډې جوړې کړې.
د میوند توپاچوونکیو وکولی شول، چې هندوکش په ۳۳۴ منډو کې ودراوي؛ مجیب ځدراڼ درې ویکتې واخیستې.
میوند په ځواب کې ۳۶۶ منډې جوړې کړې. د دوی د پاڼۍ ځانګړتیا د عمران غوره سلیزه وه؛ اعجاز احمد احمدزي او لوبډلمشر ناصر جمال ترې ښه ملاتړ وکړ او پر ترتیب یې ۷۰ او ۶۷ منډې جوړې کړې.
د میوند اتلانو په دوهیمه پاڼۍ کې د هندوکش بریدکوونکې لوبډله یوازې په ۸۷ منډو وسوځیده؛ نسیم منګل پېنځه لوبغاړي وسوځول او بیا دوی د ۵۶ منډو هدف وټاکه او لوبه یې وګټله.
د نسیم منګل ته د غوره توپاچونې له کبله د لوبې د غوره لوبغاړي جایزه ورکړ شوه.
لوبی
افغانستان به د ۲۰۲۳ کال د چین آسیايي لوبو ته له ۱۰۰ ډېر لوبغاړي ولېږي

ټاکل شوې، چې د ۲۰۲۳ ز. کال آسیايي لوبې شنبې پر ورځ ( د تلې پر لومړۍ / د سپتمبر پر ۲۳ ) د چین په هانګجو ښار کې د ۴۵ هېوادونو په ګډون پر رسمي بڼه پرانستل شي.
دا لوبې به د تلې تر ۱۶ / د اکتوبر تر ۸ روانې وي، چې په ۵۶ ځایونو کې به ۶۱ سپورتي څانګې ۴۰ لوبې تر سره کړي.
دا لوبې په لومړیو کې ټاکل شوې وې، چې تېر کال ترسره شي؛ خو د کرونا ویروس له کبله وځنډول شوې.
د افغانستان د بدني روزنې او سپورت عمومي ریاست د سې شنبې پر ورځ څرګنده کړې، چې د هېواد د سوکوهنې، ډګرنۍ منډې، کورش، وزن پورته کولو او غېږنیونې لوبغاړي په اسیايي لوبو کې د ګډون لپاره له کابل څخه د چین هانګجو ښار ته روان شول.
په پام کې ده، چې نور لوبغاړي به د چارشنبې پر ورځ په هانګجو ښار کې د آسیايي لوبو لپاره له کابله د چین پر لوري روان شي.
کوربه هېواد چين به د تر ټولو بريالي هېواد په توګه دغه لوبې پيل کړي؛ ځکه د آسيايي لوبو په تاريخ کې يې ۳۱۸۷ مدالونه ګټلي، چې ۱۴۷۳ يې د سرو زرو دي.
د روانې میاشتې په پیل کې رویترز څرګنده کړې وه، چې د ښځو د والیبال لوبډلې په ګډون به ۱۷ افغان ښځینه لوبغاړې، چې په نورو هېوادونو کې ژوند کوي هم برخه واخلي؛ خو اسلامي امارت هغه مهال دا راپورونه رد کړل او ویلي یې ول، چې له افغانستان څخه به ټول نرینه افغان لوبغاړي واستول شي.
د افغانستان اسلامي امارت په تېرو دوه کلونو کې د سپورت په ګډون پر ښځو او نجونو سخت بندیزونه لګولي دي.
د افغانستان د بدني روزنې او سپورت عمومي ریاست لهخوا په یوه تازه خپره شوې خبرپاڼه کې څرګنده شوې، چې د هانګجو په اسیايي لوبو کې به د ووشو، فوتبال، والیبال او کرکت په ګډون ۱۷ ورزشي لوبډلې ګډون وکړي.
افغانستان به هانګجو ته د ۱۰۳ لوبغاړو او ۲۳ روزونکیو په ګډون ټولټال ۱۷ لوبډلې واستوي.
ټاکل شوې، چې د نرینهوو ۲۰ اوریزې سیالۍ د تلې له ۵ / د سپتمبر له ۲۷ څخه د تلې تر ۱۶ / د اکتوبر تر۸ پورې ترسره شي. د ژي جیانګ تکنالوژي پوهنتون پینګ فنګ کرکت لوبغالی د ټولو سیالیو کوربه لوبغالی دی.
هند، پاکستان، سریلانکا او بنګله دیش له دې مخکې د ۲۰۲۳ ز. کال د ۲۰ اوریزو نړیوالو لوبو د درجه بندۍ پربنسټ د دې لوبو دوهیم فاینل پړاو ته رسیدلي. په داسې حال کې، چې افغانستان به د ICC د بشپړ غړي په توګه یوازې د نرینهوو په سیالیو کې برخه واخلي. د منګولیا پر وړاندې بریا به د لوبډلې لپاره اتم غوره ځای خپل کړي.
پر ۲۰۱۰ ز. کال د چین په ګوانګجو کې د کرکت له پیل وروسته، دغه سپورت په ۲۰۱۴ کال کې د سویلي کوریا په انچیون ښار کې ترسره شو. د اندونیزیا په جاکارتا کې د ۲۰۱۸ کال لوبې، چې د آسیايي لوبو مخکینۍ بڼه وه، کرکت په کې نهو.
په انچیون کې سریلانکا، افغانستان او بنګله دېش د نرینه وو په سیالیو کې مدالونه وګټل.
په ۲۰۲۳ آسیا سیالیو کې د هند، پاکستان، سریلانکا، بنګله دېش، افغانستان، نیپال، منګولیا، جاپان، کمبودیا، مالیزیا، سنګاپور، مالدیف، هانګ کانګ، تایلند، بحرین کرکت لوبډلې برخه اخلي.
له بده مرغه د افغانستان فوتبال ملي لوبډله د مالي بحران له کبله له لوبو وتلې ده.
-
نړۍ5 days ago
ترکیه کولی شي د اړتیا په صورت کې ځان له اروپايي ټولنې بېله کړي – اردوغان
-
تازه خبرونه4 days ago
په پاکستان کې د ډبرو سکرو د یوه افغان کارګر سر پرې شوی مړی موندل شوی
-
لوبی4 days ago
هند د اسیا کرکت جام اتلولي وګټله
-
لوبی4 days ago
د کرکت نړیوال جام په درشل کې د درجه بندۍ د لومړي مقام خپلولو لپاره تودې هڅې روانې دي
-
تازه خبرونه4 days ago
د پاکستان او افغانستان ترمنځ دې ګډ کمیسیون جوړ شي – مولانا فضل الرحمن
-
لوبی2 days ago
افغانستان به د ۲۰۲۳ کال د چین آسیايي لوبو ته له ۱۰۰ ډېر لوبغاړي ولېږي
-
تازه خبرونه2 days ago
په پاکستان کې د افغانستان سفارت کډوالو ته د پاسپورتونو د وېش لړۍ پیل کړه
-
سوداگري2 days ago
د افغانستان او جنوبي آسیا د ترانسپورتي لارو پراختیا ته چمتووالی لرو – روسیه