د لوړو زده‌کړو وزارت په یو بې‌ساري هڅه کې د ټولو دولتي پوهنتونونو او لوړو زده‌کړو بنسټونو د ښوونې او روزنې او ساینس پوهنځیو لپاره د ۲۷۰ میلیون افغانیو پر ارزښت لابراتواري تجهیزات او وسایل وپېرل، چې خپل لابراتوارونه پر عصري او معیاري تجهیزاتو سمبال او فعال کړي.

د دې وزارت د چارواکو د څرګندونو له مخې؛ په پورته ذکر شویو تجهیزاتو کې د ساینسي تجربو لپاره لوی او کوچني ماشینونه او کیمیاوي مواد شامل دي، چې ژر تر ژره به د کارولو لپاره پورته ذکر شویو تعلیمي ادارو ته وسپارل شي او په دې توګه به د یادو تعلیمي ادارو لابراتوارونه د زده‌کړیالانو د عملي کار لپاره فعال شي.

د همدې موخې لپاره د لوړو زده‌کړو وزارت څه وخت مخکې د دې وزارت په مرکز کې یوه اووه ورځنۍ غونډه جوړه کړه، چې موخه یې د تعلیمي موسسو د ښوونې او روزنې او ساینس پوهنځیو د لابراتوارونو جوړول او تجهیز کول دي، چې لابراتواري اړتیاوې یې په سمه توګه پرګوته او د دغو څانګو لابراتوارونه فعال شي، چې له نېکه مرغه د لوړو زده‌کړو وزارت د هڅو پر مرسته دا وسایل وپېرودل شول.

د یادونې ده، چې د اسلامي امارت له بیا واک ته رسیدو وروسته؛ د لوړو زده‌کړو وزارت د هېواد د تعلیمي بنسټونو د لابراتوارونو تجهیز ته ځانګړې پاملرنه وکړه او د زده‌کړیالانو اړتیاوو ته پر پاملرنه یې د عملي کار د ترسره کولو لپاره اړینې اسانتیاوې برابرې کړې.

د امریکا د منتخب ولسمشر ډونالډ ټرمپ د ملي امنیت سلاکار وايي، د امریکا په راتلونکي حکومت کې به امریکایي ځواکونه افغانستان ته بیا ستانه نشي.

د امریکا د منتخب ولسمشر ډونالډ ټرمپ د ملي امنیت سلاکار مایک والټز ویلي، چې امریکا نه غواړي بېرته کندهار ته ستنه شي او جګړه وکړي؛ خو پر امریکا د بل برید انتظار نشي کولی.

واشنګټن پوسټ راپور ورکړی، چې افغانستان د مایک والټز لپاره خورا مهم دی.

واشنګټن پوسټ ورځپاڼې په یوه نوې تحلیلي لیکنه کې د افغانستان په اړه د منتخب ولسمشر ډونالډ ټرمپ د ملي امنیت سلاکار مایک والټرز ویناوې او دریځونه څېړلي دي.

ورځپاڼې ویلي، د ملي امنیت سلاکار باور لري، چې د امریکا نوی حکومت به افغانستان ته ډېره پاملرنه وکړي او د ترهګرو ګواښونو پر وړاندې به مبارزه ګړندۍ کړي.

مایک والټرزوایي: د ټرمپ حکومت به د استخباراتي ټولنې او د ترهګرۍ ضد هڅو ته نږدې کتنه وکړي، او د امریکا سترګې او غوږونه به خلاص وي، چې مونږ بیا د نړۍ له دې برخې څخه زیانمن نشو. زه دا کندهار ته د ستنېدو او هلته د بیا جګړې په توګه نه تعبیروم. زه دا دریځ پدې معنا تعبیروم، چې مونږ نشو کولی پر کنساس ښار د برید انتظار وکړو.

د واشنګټن پوسټ د راپور له مخې، دغه تجربه لرونکي سرتېري مخکې خبرداری ورکړی و، چې له افغانستان څخه د امریکا ملي امنیت ته ګواښونه راپورته کېږي او امریکا به یوه ورځ مجبوره شي، چې هلته ځواکونه واستوي.

د راپورونو له مخې د ډونالډ ټرمپ د ملي امنیت سلاکار له افغانستان څخه د بشپړو ځواکونو د وتلو مخالفت و. هغه اوس د دې له مشخص کولو ډډه کړې، چې د ټرمپ په دوره کې د افغانستان په اړه د امریکا پالیسي څنګه بدله شوې؛ خو ټینګار کوي، چې امریکا باید د افغانستان له دننه څخه د استخباراتو راټولولو وړتیا ښه کړي.

اسلامي امارت دا ډول څرګندونې پر ځلونو له حقیقت څخه لرې بللي او ویلي یې دي، چې په افغانستان کې هیڅ فرد یا ډله د ترهګریزو فعالیتونو د ترسره کولو اجازه نلري.

د فیلیپین په پلازمېنه مانیلا کې د امریکا سفارت د یکشنبې په ورځ اعلان وکړ، چې نږدې ۲۰۰ افغانان له هغې وروسته، چې د مانیلا او واشنګټن ترمنځ د یوې هوکړې په توګه په فیلیپین کې د دوی د ځانګړې کډوالۍ ویزې پروسس شوې؛ امریکا ته لېږدول شوي دي.

د سفارت ویاندې کنیشکا ګانګوپادهای ویلي، افغانان تېره اوونۍ په امریکا کې د بیا میشتېدنې لپاره د غوښتنلیک بهیر بشپړولو وروسته په څو ډلو کې سوداګریزو الوتنو له فیلیپین څخه ولېږدول.

د سفارت په اعلامیه کې "د فیلیپین له حکومت څخه د دې مرستې ستاینه شوې ده."

دا افغانان، چې ډېری ماشومان هم په کې ول؛ د جنورۍ پر شپږمه فیلیپین ته ورسېدل. د دوی د شمېر او ځایونو جزئیات د امریکا او فیلیپین چارواکو لخوا پټ ساتل شوي دي. واشنګټن په فیلیپین کې د دوی د پاتې کېدو لګښت ورکړ.

د اسوشیټیډ پریس د څرګندونو له مخې؛ هغه افغانان، چې په افغانستان کې یې د امریکا د حکومت لپاره کار کاوه یا د امریکا د مهاجرت د ځانګړو ویزو مستحق ول، هغه وخت پاتې شول کله، چې د امریکا او ناټو ځواکونه له ۲۰ کلنې جګړې وروسته د ۲۰۲۱ کال په اګست کې له افغانستان څخه ووتل.

د فیلیپین چارواکو ویلي، چې د امریکا تلونکي ولسمشر جو بایډن امریکا ته د خپل سفر په جریان کې د فیلیپین له مشر فرډینند مارکوس جونیئر سره د افغانانو د بیا مېشتېدنې پر مسله خبرې کړې دي.

په جولای کې فیلیپین هوکړه وکړه، چې په لنډمهاله توګه د افغانانو لپاره د یو مرکز کوربتوب وکړي.

په همدې حال کې د پاکستان د بهرنیو چارو وزیر محمد اسحاق ډار د شنبې پر ورځ درېیمو هېوادونو ته د افغان کډوالو د لیږد په اړه د مسلو په اړه یوه غونډه وکړه. دا غونډه په داسې حال کې ترسره شوه، چې له پاکستان څخه د افغان کډوالو د تفتیش، توقیف او ایستلو پروسه ګړندۍ شوې ده.

پاکستانيو رسنیو راپور ورکړی، چې د پاکستان د بهرنیو چارو وزیر او مرستیال لومړي وزیر محمد اسحاق ډار د شنبې پر ورځ یوه غونډه وکړه، چې په کې درېیمو هېوادونو ته د افغانانو د کډوالۍ پر اړوند مسلو تمرکز وشو. په دې غونډه کې، د افغان کډوالو د لیږد لپاره د حل‌لارو او هغو ننګونو په اړه بحث او بیاکتنه وشوه، چې دوی ورسره مخ دي.