د اطلاعاتو او کلتور وزارت نن (سې‌شنبه د کب نولسمه) د یوې غونډې پر مهال له سیاسي کارپوهانو، خبریالانو او رسنیزو چارواکو ستاینه وکړه او څرګندوي، چې خبریالانو او سیاسی شنونکو د خپلو مسوولیتونو په ترسره کولو کې اغېزمنې هڅې ترسره کړې دي.

په دې غونډه کې د اطلاعاتو او کلتور وزیر شېر احمد حقاني، یو شمېر چارواکو، سیاسي شنونکو، رسنیزو چارواکو او خبریالانو ګډون کړی و.

د خبرپاڼې له مخې په دې مراسمو کې د اطلاعاتو او کلتور وزیر ویلي: “د اوسني نظام او امنیت ساتل د ټولنې د هر فرد مسوولیت دی. د جګړې په وخت کې د سیاسي شنونکو او رسنیو دریځ د خلکو د پوهاوي په لوړولو او د خلکو ترمنځ د سیاسي شعور په رامنځته کولو کې اړین رول لوبوي. د افغانستان د خلکو ګټې ګډې دي او د هغوی ساتنه یو ګډ مسوولیت دی. رسنۍ مسوولیت لري، چې په روښانه توګه حقایق څرګند کړي او د هېواد رښتینی او مستند انځور نړۍ ته ورسوي. د افغانستان د خلکو ترمنځ هیڅ راز ژبنۍ، سمتي او قومي برتري نشته؛ ځکه، چې په هېواد کې یووالی او ورورولي حاکمه ده.

د افغانستان اسلامي امارت بهرنیو چارو وزارت د امریکا وروستۍ پرېکړه، چې افغانستان د “ناحقه نیونو ملاتړ کوونکی هېواد” ګڼي؛ د افسوس وړ بولي او ټینګار کوي، چې د خبرو اترو له لارې دې ستونزې حل کړي.

د بهرنیو چارو وزارت د نننۍ (سې‌شنبه د کب نولسمه) خپرې شوې خبرپاڼې له مخې؛ د هیڅ هېواد وګړي په افغانستان کې د معاملې لپاره ندي نیول شوي، بلکې ځینې اشخاص له نافذه قوانینو څخه د سرغړونې پر تور نیول شوي، چې ډېری یې له قانوني پړاوونو وروسته خوشې شوي دي.

د بهرنیو چارو وزارت په خبرپاڼه کې راغلي، چې په تېر کال کې اسلامي امارت د ښه نیت له مخې د ځینو امریکایي وګړو په اړه مثبت ګامونه پورته کړي دي.

په اعلامیه کې د افغانستان او امریکا ترمنځ د خبرو اترو د آسانتیا په برخه کې د قطر رول ته هم نغوته(اشاره) شوې او د ډیپلوماټیکو چینلونو له لارې د اړیکو او د ستونزو د حل پر دوام ټینګار شوی دی.

د باختر خبري سرچینې د څرګندونو له مخې؛ د ننګرهار والي محمد نعیم آخوند د دغو زیانونو د ارزونې لپاره یو پلاوی تورخم ښارګوټي ته استولی، چې د سوداګرو د زیانونو کچه له نږدې وڅېړي او د لازم لاسنیوي لپاره یې پایلې اړوند مسوولانو ته وړاندې کړي.

اړوند پلاوي سیمه له نږدې لېدلې او څرګندوي، چې د پاکستان پوځي رژیم پر ړندو مرمیو په تورخم ښارګوټي کې د یو مارکیټ په ګډون نږدې ۱۵۰ دوکانونه سوځېدلي او توکي یې بشپړ له منځه تللي دي.

زیانمنو سوداګرو ویلي، چې له کلونو راپدېخوا یې راټوله شوې شتمني د پاکستان پوځي رژیم له منځه وړې ده .

ویل کیږي، چې د پاکستان پوځي رژیم په دې ړندو مرمیو کې پر دوکانونو سربېره جوماتونه، تورخم عمري کمپ، ملکي کورونه او ځایونه هم پر نښه شوي، چې له کبله یې یو شمېر وګړو ته مرګ ـ ژوبله اوښتې او ګڼ شمېر نور ځایي اوسېدونکي هم د خپلو مېنو پرېښودو ته اړ شوي دي.