چین د دوشنبې پر ورځ د کابل په مرکزي برخه کې پر یوه افغان – چینايي رسټورانټ خونړۍ چاودنه وغندله، چې له کبله یې لږ تر لږه د یوه چینایي پر ګډون اووه کسان له خواږه ژوندانه بې برخې کړل او ۱۳ نور ټپیان شول.

د سې‌شنبې پر ورځ (داعش خراسان (ISIS-Kد دې برید مسوولیت ومانه او څرګندوي، چې یو ځانمرګي بریدګر خپل چاودېدونکي توکي والوزول.

چاودنه د دوشنبې پر ورځ مازیګر مهال په «چینایي نوډل» نومي ګډ افغان – چینايي رسټورانټ کې، چې د کابل د شهرنو په اړوند سیمه کې یې چینایي مسلمانانو ته خواړه برابرول؛ رامنځته شوه.

د کابل پولیسو ویلي، چې چاودنه د رسټورانټ پخلنځي ته نږدې وشوه، چې له کبله یې یو چینايي وګړي او شپږ افغانانو ژوند له لاسه ورکړ او یو شمېر نور ټپیان شول.

د چین بهرنیو چارو وزارت ویاند ګیوو جیاکون د یوې منظمې خبري ناستې پر مهال ویلي، چې چین «د وژل شویو کسانو د له لاسه تلو له کبله ژوره خوایني او د ټپیانو ته د زړه له کومي خواخوږي» څرګندوي.

هغه تائید کړې، چې په دې برید کې یو چینايي وګړی وژل شوی او پېنځه نور چینایان ټپیان شوي دي.

ګیوو وایي: چین له افغان چارواکو سره بېړنۍ اړیکې نیولي او ترې یې غوښتي؛ د ټپیانو د درملنې لپاره هر ډول ممکنه هڅې وکړي، د چینايي وګړو، پروژو او بنسټونو امنیت ډاډمن کړي، پېښه بشپړه وڅېړي او عاملین یې ژر تر ژره د عدالت منګولو ته وسپاري.

هغه وایي، چې په افغانستان کې د چین سفارت چارواکو په روغتون کې له ټپیانو لیدلنه کړې ده.

دې چاودنې د افغانستان د پخواني حکومت د سیاسي څېرو سخت غبرګونونه هم راپارولي دي.

د افغانستان پخواني ولسمشر حامد کرزي دا برید یو جنایي او د بشریت ضد عمل وباله او څرګندوي، چې دا له اسلامي ارزښتونو او افغاني دودونو سره په ټکر کې دی.

هغه د قربانیانو له کورنیو سره خواخوږي څرګنده کړه او ټینګار یې وکړ، چې دا ډول تاوتریخوالی په هېواد کې سوله او ثبات زیانمنوي.

همداراز د ملي پخلاینې عالي شورا پخواني مشر ډاکټر عبدالله عبدالله هم دا چاودنه غندلې ده.

هغه په ایکس پاڼه کې دا برید د اسلام، انسانیت او د افغان ولس د ارادې پر ضد یو غیرانساني عمل وباله او د وژل شویو کسانو له کورنیو سره یې خپله خواخوږي او خواشیني څرګنده کړې ده.

دغه راز چین یو ځل بیا ټینګار کړی، چې د ترهګرۍ له ټولو بڼو سره کلک مخالفت لري او د افغانستان او سیمې له هېوادونو سره د ترهګریزو او تاوتریخجنو فعالیتونو پر ضد له ګډې مبارزې ملاتړ کوي.

د چین بهرنیو چارو وزارت یو ځل بیا چینايي وګړو ته سپارښتنه کړې، چې په نږدې راتلونکي کې افغانستان ته له سفر څخه ډډه وکړي. له هغو چینايي وګړو او شرکتونو، چې دا مهال په افغانستان کې حضور لري؛ وغوښتل، چې اضافي امنیتي تدابیر ونیسي او له لوړ خطر لرونکو سیمو ژر تر ژره ووځي.

افغان چارواکو ویلي، چې د دې برید په اړه څېړنې اوس هم روانې دي.

ملي دفاع وزارت خبر ورکړی، چې د ۲۰۱ خالد بن ولید رض قول اردو ځواکونو په یو لړ ځانګړو عملیاتو کې ګڼ‌شمېر وسلې او مهمات نیول شوي دي.

د ملي دفاع وزرارت د څرګندونو له مخې؛ دغه وسلې او مهمات د لغمان ولایت د علیشنګ ولسوالۍ د میل درې په اړوند سیمه کې کشف او وموندل شوې.

یاد وزارت زیاته کړې؛ په یادو وسلو او مهماتو کې ۲۲۶ بکسې د دهشکې، زیکو-۱، ام-۲۴۰ او ام -۱۶ مرمۍ او ګڼ‌شمېر بېلابېلې وسلې او پوځي تجهیزات تر لاسه شوي دي.

داعش خراسان د کابل د شهرنو په ګل‌فروشي سیمه کې پر یوه ګډ افغان او چینايي رسټورانټ د چاودنې د مسوولیت منلو تر څنګ ویلي، چې تر سره شوی برید ځانمرګی و.

دغه پېښه د دوشنبې پر ورځ مازیګر مهال( د مرغومي نهه‌ویشتمه) رامنځته شوې او کابل پولیسو ویلي، چې په دې پېښه کې د یوه مسلمان چینايي په ګډون ۷ کسانو خپل خوږ ژوند له لاسه ورکړی او ۱۳ نور د ښځو او ماشومانو په ګډون ټپيان دي.

داعش خراسان ته نږدې د یوې رسنۍ په خپره شوې خبرپانه کې راغلي: د دوی یوه ځانمرګي بریدګر د کابل په شهرنو سیمه کې د چینایانو یوه رستورانټ ته له ننوتلو وروسته؛ پر چینایي وګړو او امنیتي ساتونکو خپلو چاودېدونکو توکو ته چاودنه ورکړې ده.

د داعش خراسان څانګې دا ادعا هم کړې، چې په دې برید کې یو شمېر چینایان، ولسي وګړي او همداراز هغه ځواکونه، چې په یاده سیمه کې یې د امنیت ساتنې مسوولیت درلود؛ له مرګ او ژوبلې سره مخ کړي دي.

دغه راز دوی له سند وړاندې کولو پرته د مرګ او ژوبلې شمېر ۲۵ کسان ګنلي او د چینايي وګړو د پر نښه کولو لامل یې «له اویغور مسلمانانو سره د چین چلند» بللی دی.

کابل پولیسو ویلي؛ په دې چاودنه کې د چینايي مسلمانانو رسټورانټ پر نښه شوی او وژل شوی چینایي ایوب نومی یو مسلمان او د سینګیانګ اوسېدونکی و.

دغه ګډ رسټوراتنټ  Chinese Noodle نومېږي، چې د يوه چينايي سینکیانګي مسلمان( عبدالمجید او د ده د مېرمنې) او يوه افغان( عبدالجبار محمود ) له لوري په ګډه چلېده او دلته به د چينايي مسلمانانو لپاره خواړه تيارېدل او پلورل کېدل.

د یادونې ده، چې دې خونړۍ پېښې پر مرګ او ژوبلې سربېره د هوټل شاوخوا کورونو او دوکانونو ته هم مالي زیانونه اړولي دي.