د کورنیو چارو وزارت چارسمبالي سراج الدین حقاني د شنبې پر ورځ د پوځي قطعاتو د وړتیاوو د لوړولو او ښه تجهیز د اړتیا ترڅنګ ټینګار وکړ، چې د هېواد هوايي ځواک د افغانستان اصلي ساتونکی دی.

حقاني د هوايي ځواک او هوايي دفاع له پوهنتون څخه د درې پیلوټانو د فراغت په مراسمو کې د وینا پر مهال ویلي؛ ډېر ژر به اسلامي امارت نړۍ ته ثابته کړي، چې په بېلابېلو برخو کې پر ځان متکي دی.

هغه ویلي: زمونږ هوايي ځواکونه د وطن اصلي ساتونکي دي. نن که نړۍ مونږ د هوايي او ځمکني دفاع پر نلرلو تورنوي او یا یې وړتیا نلرو؛ تاسې په عمل کې ثابته کړه، چې نن مونږ درې کسان د ۳۰۰۰ کسانو برابر ګڼو او ان شاالله په لنډ وخت کې به پر ځان‌بسیا شو.

د پوځ لوی درستیز فصیح الدین فطرت هم د فراغت په مراسمو کې وینا وکړه او په ګاونډ هېوادونو کې یې د افغان پوځي الوتکو پر پرېښودو د امریکا پر پرېکړې سختې نیوکې وکړې، چې د جمهوري حکومت د سقوط پر مهال یې الوتنې وکړې.

فطرت دا ټینګار هم کړی، چې د اسلامي امارت دروازې د پخواني حکومت د امنیتي ځواکونو پر مخ خلاصې دي.

هغه وایي: ځوانانو مو افغانستان خوشې کړ او وتښتېدل او اوس په پرديو هېوادونو کې ژوند کوي. که څه هم دوی هوسا او ډاډه هم وي؛ خو په هغو هېوادونو کې یې دین سمون نه خوري. که دوی واقعاً مسلمانان وي؛ د ګناه احساس کوي؛ نو د اسلامي امارت غېږ ټولو ته خلاصې دي، دوی باید بېرته هېواد ته راستانه شي.

دغه چارواکي خبرداری ورکړ؛ هغه کسان، چې د بهرنیانو پر امر د هېواد امنیتي وضعیت خرابوي، د امنیتي او دفاعي ځواکونو له سخت غبرګون سره به مخ شي.

هغه وایي: کوم حکومت، چې اوس په افغانستان کې حاکم دی؛ خپلواک دی او د افغانستان ټوله خاوره کنټرولوي او بشپړه خپلواکي لري او که څوک وغواړي، چې دلته امنیت ګډوډ کړي، که څه هم هغه افغان وي، که څه هم زمونږ د بدن برخه وي؛ مونږ به یې مخه ونیسو، چې خلک په پوره امن او سوکالۍ کې پاتې شي.

پر درې پیلوټانو سربېره، چې پدې اوونۍ کې فارغ شوي؛ نور ۱۲۰ کسان د هوایی ځواک پوهنتون ته استخدام شوي. دوی به د فراغت لپاره څلور کاله زده‌کړې وکړي.

د کابل ښاروالۍ وياند ويلي، چې د دې ادارې لخوا سږکال په ټول کابل ښار کې دوه ميليون نيالګي او زينتي ګلونه کېنول شوي دي.

د کابل ښاروالۍ ویاند نعمت الله بارکزي نن (پنجشنبه د وږي دوه‌ویشتمه) د یوکلنو لاسته راوړنو د بیانولو په مراسمو کې ویلي: کابل ښاروالۍ دوه کاله مخکې ۲۰۰ زره نیالګي کېنول، تېر کال ۶۰۰ زره نیالګي او سږ کال یې په ټول کابل ښار کې دوه میلیون نیالګي او زینتي ګلان کېنولي دي.

د کابل ښاروالۍ د ښاري خدماتړو او چاپېریال ساتنې رییس محمد خالد سجستاني هم ویلي، چې د کابل ښار څه باندې ۱۲۵ کیلومټره عامه او منځني سړکونه پاخه، پراخه او تیږي لګول شوي دي.

محمد خالد سجستاني زیاته کړې، د ښار د ښکلا لپاره د سړکونو په اوږدو کې پېنځه زره نوي څراغونه لګول شوي او د ښار په بېلابېلو سیمو کې ۹۷۰۰ نور څراغونه رغول شوي دي.

سجستاني څرګنده کړې: په کابل ښار کې نوي سرکونه جوړ شوي او خلک ترې ګټه پورته کوي.

د دې بنسټ د څرګندونو له مخې، دغه راز له کابل ښار څخه څه باندې یو نیم میلیون ټنه کثافات پاک او ځانګړیو ځایونو ته لېږدول شوي دي.

دې ادارې تر اوسه د هوا فلټرونو د نشتوالي له کبله ۶۲۵ لوړې ماڼۍ تړلي او په تېر کال کې د کابل ښاروالۍ عواید ۶ میلیارډ افغانۍ وې.

کابل ښاروال همدا راز زیاته کړې، د سوداګریزو او استوګنې ساحو لپاره تفصیلي پلانونه، وړاندیز شوي پلانونه، د ۲۴۸ ودانیو د جوازونو صادرول او د کابل ښار په ۲۲ ناحیو کې د ۳۰۹۵ ودانیو د سرغړونو مخنیوی د دې ادارې مهمې لاسته راوړنې دي.

له بلې خوا دغه رياست ویلي، چې د نورو موسسو په همکارۍ پر ٢٠٠ پروژو کار کوي، چې د ١٩٠ پروژې کارونه بشپړې شوي دي.

د کابل ښاروالۍ چارواکو د ښاري نظم د رامنځته کولو او د ټرافیکو د بهیر د عادي کولو لپاره د ښار له بېلابېلو برخو څخه ۲۶۰۰ خنډونه راټول کړي دي.

 د کورنيو چارو وزارت چارسمبالي سراج الدين حقاني د ملګرو ملتونو عمومي منشي مرستيال جيل مشاو او په کابل کې د دغه سازمان د امنيت مسووول انډريکا راټواټ سره وکتل.

د کورنیو چارو وزارت په خبرپاڼه کې راغلي، چې په دې ليدنه کې جیل مشاو د ملګرو ملتونو د کارکوونکیو له خوندي امنيت له کبله د مننې تر څنګ ويلي: د اسلامي امارت او ملګرو ملتونو ترمنځ اړيکې پياوړې شوې دي.

هغه له افغانستان سره د مرستو پر دوام هم خبرې کړې دي. ویل کیږي، چې سراج الدین حقاني د ښه راغلاست تر څنګ دغو استازیو ته ډاډ ورکړ، چې په ټول هېواد کې امنيت خوندي دی؛ د ملګرو ملتونو غړي او مرستندویان کولی شي ډاډمنې هڅې ترسره کړي.