د بهرنیو چارو وزارت چارسمبالي امیر خان متقي په کابل کې د سعودي عربستان له سفیر سره په لیدنه کې د افغانستان د حج ونډې د زیاتېدا غوښتنه کړې ده.

د بهرنیو چارو وزارت د خبرپاڼې له مخې، په دې کتنه کې، چې د یکشنبې پر ورځ( د مرغومي درویشتمه) ترسره شوه؛ دواړو خواوو د دوه اړخیزو اړیکو د پراختیا، په سعودي عربستان کې میشتو افغانانو ته د قونسلګرۍ خدماتو وړاندې کولو او له شته فرصتونو څخه د ګټې اخیستنې په اړه هم بحث او خبرې وکړې.

امیر خان متقي د افغانستان او سعودي عربستان اړیکې ارزښتناکې او تاریخي وبللې او ټینګار یې وکړ، چې د دواړو هېوادونو ترمنځ د پلاويو تګ راتګ ته باید ډېره پاملرنه وشي.

هغه د سعودي عربستان له حکومت څخه وغوښتل، چې د افغانانو لپاره د حج ونډه زیاته کړي او په سعودي عربستان کې میشتو افغانانو ته د قونسلګرۍ خدماتو په برابرولو کې مرسته وکړي.

د سعودي عربستان سفیر په خپله برخه کې د افغانستان او سعودي عربستان دوه اړخیزې اړیکې تاریخي وبللې او ټینګار یې وکړ، چې هېواد یې غواړي په کابل کې د حضور له لارې په بېلابېلو برخو کې له افغانانو سره مرسته وکړي.

فیصل طلق البقمي دا هم ویلي، چې دواړه هېوادونه کولی شي په بېلابېلو برخو کې کار وکړي او په کابل کې د سعودي عربستان د سفارت د فعالیتونو د بیا پیلولو هدف د ټولو شته ظرفیتونو څخه ګټه اخیستل دي.

د رییس الوزرا اقتصادي مرستیال ویلي، چې د شاوخوا ۳ میلیارډ افغانیو پر ارزښت یې ۱۷ پروژې تصویب کړې او د نهو نورو قراردادونه یې تعدیل کړي دي.

د اقتصادي مرستیالۍ د څرګندونو له مخې؛ په منظور شوو او تعدیل شوو پروژو کې د کابل ولایت په ارغندي کې د ټرانسپورټ د ترمینل جوړول، د هرات ولایت په ګذره ولسوالۍ کې د لاریو د تمځای جوړول، د آقینه-اندخوی او تورغونډۍ د اوسپنې پټلۍ پروژو بیارغونه، په کابل کې د نوري فایبر شبکې پراختیا شامل دي.

د ملي تدارکاتو کمیسیون نوبتي غونډه د رییس الوزرا د اقتصادي مرستیال پر مشرۍ ترسره شوه. په دې غونډه کې، د ۱۷ پروژو قراردادونه منظور شول او نهه نورې پروژې تعدیل شوې؛ ځکه، چې په تدارکاتي پړاوونو کې یې ستونزې موندل شوې وې.

چارواکو ته سپارښتنه وشوه، چې له ټولو معیارونو سره سم دا پروژې بیا داوطلبي ته وړاندې کړي.  همدارنګه مسوولو کمیټو ته دنده وسپارل شوه، چې د څلورو پروژو د قراردادونو د بیو په اړه له ګټونکو شرکتونو سره غونډې وکړي او خپل راپورونه د ملي تدارکاتو کمیسیون مشرتابه ته وسپاري.

د کندهار، هلمند او فراه ولایتونو د ځینو سړکونو جوړول، د کابل او په بېلابېلو ولایتونو کې د برښنا د یو شمېر پروژو د پاتې کارونو بشپړول او د اسلامي امارت لخوا تمویل شوي څو نورې پروژې دي.

دا په داسې حال کې ده، چې د اقتصادي ستونزو د حل یوه لاره د ورته پراختیایي او زیربنایي پروژو عملي کول دي. چارسمبالی حکومت وايي، چې د داسې پروژو پیل کولو ته ژمن دی او غواړي هېواد یوازې له اقتصادي بحران څخه وژغوري.

د بهرنیو چارو وزارت ویلي، چې د بهرنیو چارو وزارت سیاسي مرستیال شېر محمد عباس ستانکزي او د بېلاروس د بهرنیو چارو وزارت لومړي مرستیال لوکا شیویچ د اقتصادي او سیاسي مشترکاتو او نورو دوه اړخیزو همکاریو په اړه خبرې کړې دي.

لوکا سیویچ د خپل حکومت هوډ څرګند کړ، چې غواړي له افغانستان سره په بېلابېلو برخو کې د همکاریو بنسټ کېدي. شېر محمد عباس ستانکزي کابل ته د نوموړي سفر د اوږدمهاله همکاریو لپاره یو ښه پیل وباله.

دغه راز د افغانستان د صنعت او سوداګرۍ وزارت چارسمبالي د بېلاروس د صنعت له مرستیال کازینتاسو اندرو د څرګندونو له مخې ویلي، چې هېواد یې غواړي له افغانستان سره سوداګرۍ ته پراختیا ورکړي.

د صنعت او سوداګرۍ وزارت په دې خبرو اترو کې د متوازنې سوداګرۍ پر اړتیا ټینګار کړی دی.

د دې وزارت د خبرپاڼې له مخې؛ د دې ناستې په بهیرکې دا هوکړه هم وشوه، چې د دواړو خواوو ترمنځ به د "سوداګریزو او اقتصادي اړیکو پراخولو" لپاره ګډ نندارتونونه او سوداګریزې ناستې ترسره شي.