د هرات والي نور‌احمد اسلام‌جار د ملګرو ملتونو له چارواکو سره په یوه غونډه کې له دې ټولنې وغوښتل، چې د خوراکي او اړینو توکو په پېرلو کې د افغانستان کورنیو محصولاتو ته لومړیتوب ورکړي.

د هرات والي د دفتر د رسنیزې خبرپاڼې له مخې؛ اسلام‌جار د ملګرو ملتونو د سر منشي د ځانګړي استازي مرستیال انډریکا راتوته او په افغانستان کې د ملګرو ملتونو د کډوالو عالي کمیشنرۍ د دفتر رییس عرفات جمال سره ولیدل.

د هرات والي کډوالو د راستنېدا په لومړۍ څپه کې د ملګرو ملتونو د ادارو له همکارۍ ستاینه وکړه او ټینګار یې وکړ، چې د کډوالو د نوي څپې په صورت کې سیمه‌ییزه اداره د دوی اړتیاوو ته د رسېدا لپاره چمتو ده.

اسلام‌جار د افغانستان د کرنیزو محصولاتو او صنعتي محصولاتو لپاره د بهرنیو بازارونو موندلو لپاره له نړیوالو ادارو سره د همکارۍ پر اړتیا هم ټینګار وکړ او د بانکي محدودیتونو لرې کولو د ویزې د صادرولو آسانتیا او د خصوصي سکټور او سوداګرو لپاره د انلاین خدماتو غوښتنه وکړه.

ویل کیږي، چې انډریکا راتواټه د هرات والي د نظرونو او وړاندیزونو د هرکلي ترڅنګ ډاډ څرګند کړ؛ ملګري ملتونه به په راتلونکي کې هڅه وکړي، چې له افغان تولیداتو څخه اړین توکي واخلي او په بېلابېلو سکټورونو کې به له سیمه‌ییزې ادارې سره خپله همکاري روانه وساتي.

د تېرې شپې په وروستیو کې د خوست ولايت د عليشېرو ـ تريزيو ولسوالۍ اړوند د صدقو کلي د بدرګې ګورګورې په اړوند سيمه کې د پاکستاني پوځي رژيم له لوري د عامو خلکو پر کورونو او د کوچيانو پر خېمو د توپونو او هاوانونو بريدونه ترسره شوي دي.

د اسلامي امارت د ویاند مرستیال حمد‌الله فطرت د خپرې شوې خبرپاڼې له مخې؛ په دې بريدونو کې د کوچيانو د يوې کورنۍ د يوې ښځينه او يو نرينه، يوې نجلۍ او یو هلک په ګډون ۴ کسان شهيدان شوي او درې نور ماشومان ټپيان دي.

دغه راز د خبرپاڼې له مخې؛ د کـونړ ولايت د منورې ولسوالي پر بېلابېلو سيمو۳۲ مرمۍ لګېدلي، چې زیانونه نلري.

همدارنګه په خبرپاڼه کې راغلي، چې د سرکاڼو ولسوالي پر بېلابېلو کلیو او بانډو؛ ګلاپړۍ، شونکړۍ، ګنجګل، ناوه، څپري او ناوې سیمو۱۱۰ مرمۍ لګېدلي، چې ځاني زیان نلري؛ خو د جعفر نومي کس کور ویجاړ شوی دي.

ویل کیږي، چې د دې ولایت د ناړۍ ولسوالي پر دوکلام، بریکوټ او څونګلي سيمو هم ۶۵ مرمۍ لګېدلي، چې ولسي خلکو ته يې درانده مالي زيانونه اړولي او د خاص کونړ ولسوالۍ پر لکې تیګي، لړم کڅ او شالۍ سیمو۱۴ توپونه لګېدلي، چې مالي او ځاني زيان نلري.

د تاجکستان چارواکو ویلي، چې چین به د تاجکستان او افغانستان ترمنځ د پولې په اوږدو کې ۹ سرحدي ودانیز بنستونه جوړ کړي.

د راپورونو له مخې؛ دا تړون د تاجکستان د استازو جرګې د هېواد د پارلمان په غونډه کې تصویب کړی دی. د دې پروژې له پلي‌کېدا موخه د تاجک سرحدي ځواکونو تخنیکي او تجهیزاتي وړتیاوو پیاوړې کول دي.

د خپرو شویو معلوماتو له مخې؛ دا ودانیز بنسټونه به د څارنې پرمختللي سیسټمونه، مخابراتي تجهیزات او پر انجینرۍ سمبال ودانیز بنسټونه ولري.

ویل کیږي، چې د دې ودانیزو بنسټونو ټوله ساحه شاوخوا ۱۷ زره مربع مټره ده او د پلي کولو لګښت یې نږدې ۴۲۴.۸ میلیون یوان اټکل شوی او لګښت یې د چین حکومت ورکوي.

د تاجکستان د امنیتي چارواکو د څرګندونو له مخې؛ پخوا هم د دواړو هېوادونو ترمنځ د یوې هوکړې له مخې څو نور سرحدي ودانیز بنسټونه جوړ شوي وه.