په یمن کې د سعودي عربستان او متحده عربي اماراتو ترمنځ د رامنځته شوي تاوتریخوالي له څارلو وروسته د افغانستان اسلامي امارت څرګنده کړی؛ د دې هېواد د ملي یووالي، سولې او ثبات لپاره د اړوند لوریو هڅې ستایي.

د بهرنیو چارو وزارت نن (پنجشنبه د مرغومي یوولسمه) په یوه خبرپانه کې له ټولو لوریو وغوښتل، چې له هغو کړنو دې ځان وساتي، چې د یمن او سیمې امنیت او ثبات ګواښي.

دې وزارت هیله څرګنده کړې، چې ټول ښکېل لوري؛ په ځانګړي توګه یمن دې د ستونزو د حل لپاره همغږۍ او خبرو ته لومړیتوب ورکړي، چې په دې هېواد کې د بې‌ثباتۍ د رامنځته کېدا مخه ونیول شي.

په دې وروستیو کې د سعودي عربستان پر مشرۍ د ائتلاف ځواکونو د یمن په جنوب کې پر مکلا بندر برید وکړ. ریاض ادعا وکړه؛ په دې برید کې د وسلو یوه ټولګه، چې له متحده عربي اماراتو سره تړاو لري او بېلتون‌پالو ته لېږل کېده؛ پر نښه شوې ده.

له دې برید وروسته متحده عربي اماراتو اعلان وکړ، چې خپل ځواکونه به له یمنه وباسي.

د اسلامي امارت ټرانسپورټ او هوايي چلند وزیر حمیدالله آخوندزاده عمان ته د خپل کاري سفر پر مهال په بېلابېلو لیدنو کې د دغه هېواد د ټرانسپورټ، مخابراتو او معلوماتي ټکنالوژۍ له وزیر سعید بن حمود المعولي او د عمان د ملکي هوايي چلند ادارې له مشر نایف بن علي العمري سره د همکاریو پر پراختیا خبرې کړې دي.

د ټرانسپورټ او هوايي چلند وزارت ویلي، چې د عمان له ټرانسپورټ وزیر سره د لیدنې پر مهال دواړو لوریو د ټرانسپورټي اړیکو پر پراختیا، د ټرانسپورټي خدمتونو په برخه کې د دوه‌اړخیزو همکاریو پر پیاوړتیا او د اړوند تفاهم‌لیکونو پر ارزونه خبرې او اندونه وړاندې کړل.

دغه راز د عمان ملکي هوايي چلند ادارې له مشر سره په لیدنه کې د هوايي ټرافیک پر خدمتونو، کارګو لېږد، هوايي دهلېزونو جوړولو او پراختیا او مسلکي کارکوونکو ظرفیت لوړولو، ګډو همکاریو اړوند موضوعات خبرې وشوې او وڅېړل شول.

ویل کیږي، چې دا لیدنې د سیمه‌ییزو همکاریو د پراختیا، د ټرانزیټ د آسانتیا او د افغانستان د هوايي چلند د سکټور د پیاوړتیا لپاره ځانګړی ارزښت لري.