د امریکا استازو جرګې یوه لایحه تصویب کړه، چې له مخې یې له افغانستان سره هر ډول نغدي مرستې باید له نږدې وڅارل شي او کانګرس ته په شفاف ډول راپور ورکړ شي، چې څنګه اسلامي امارت دې مرستو ته لاسرسی ونلري.

د امریکا ولسي جرګې له اسلامي امارت سره د مالي مرستو د بندولو لپاره یوه لایحه تصویب کړه.

د امریکا د ولسي جرګې یوه غړی ويلي، چې د دې لایحې له مخې، افغانستان ته د هر ډول نغدي مرستو پروګرام او د اسلامي امارت د لاسرسي د مخنیوي څرنګوالی به راپور ورکولو ته اړتیا ولري.

 د امریکا د ولسي جرګې غړی ټیم بورجټ ویلي، په لایحه کې د ځانګړې سپما صندوق او د افغانستان بانک څارنه هم شامله ده.

ټیم بورجټ وایي: ” دا لایحه پر درې اصلي مسایلو راڅرخي؛ لومړی، د طالبانو د مالي او مادي ملاتړ مخنیوی؛ دوه‌ییم، د نغدي مرستو پروګرامونو په اړه راپور ورکول او درېیم، د افغانستان د وجهي صندوق او افغانستان بانک په اړه راپور ورکول.”

ولسي جرګې له دې هڅې وروسته، د یوې خبرپاڼې پر خپرولو د یادې جرګې د بهرنیو اړیکو کمیټې د دې لایحې له تصویب هرکلی وکړ.

 په خبرپاڼه کې ویل شوي، چې دا پرېکړه له افغانستان څخه د امریکایي ځواکونو له وتلو وروسته اسلامي امارت ته د میلیونونو ډالرو نغدي مرستې د افشا کولو په غبرګون کې شوې ده.

د دې لایحې له تصویب سره به د امریکا بهرنیو چارو وزارت د داسې پروګرامونو پلي کولو ته اړ وي، چې اسلامي امارت ته د بشري مرستو د رسېدو مخه ونیسي او کانګرس ته راپور ورکړي.

اسلامي امارت د هېوادونو لخوا د بشري مرستو په بهیر کې د لاسوهنې خبره ردوي او وايي، چې دا مرستې به افغانانو ته په عادلانه ډول ووېشل شي.

اسلامي امارت ویاند ذبیح الله مجاهد د بشري مرستو په بهیر کې لاسوهنه ردوي او وايي، چې د مرستو د وېش بهیر د اقتصاد وزارت لخوا له نږدې څارل کېږي.

دغه راز د اقتصاد وزارت مسلکي مرستیال عبداللطیف نظري د دې لایحې تصویب د اسلامي امارت پر وړاندې فشار ګڼي او وايي، چې د امریکا د مرستو بندول به د افغانانو پر اقتصاد اغېز ونکړي؛ ځکه اسلامي امارت غواړي د هېواد اقتصاد له کورنیو سرچینو څخه پر ګټنې له دې حالته را ووځي.

دا پرېکړه په داسې حال کې کیږي، چې د ډونالډ ټرمپ د نوې پرېکړې له کبله له افغانستان سره د امریکا مرستې په جدي توګه کمې شوې دي او په افغانستان کې د امریکا لخوا تمویل شوي بشري فعالیتونه ځنډول شوي او یا په بشپړه توګه درول شوي دي.

د اقتصادي کمیسیون نوبتي غونډه نن د ریاست الوزراء د اقتصادي  مرستیال ملا عبدالغني برادر پر مشرۍ په مرمرین ماڼۍ کې ترسره شوه.

د رییس الوزراء د اقتصادي مرستیالۍ د  رسنیزې خبرپاڼې له مخې؛ د افغانستان اسلامي امارت اقتصادي پالیسي په دې غونډه کې د بحث لپاره وړاندې شوه، چې له هر اړخیزې ارزونې وروسته تصویب او ومنل شوه.

د دې اقتصادي پالیسۍ اند (د اسلامي اقتصادي نظام پر بنسټ پرمختللی او سوکاله افغانستان) دی او اهداف یې (د پانګونې د جذب او پراختیا لپاره د مناسب چاپیریال رامنځته کول، د کورنیو تولیداتو او صادراتو زیاتوالی، د کارموندنې کچه لوړول او د فقر کمول، د اقتصادي ودې پراختیا او دوامداره کول او د اقتصادي ثبات، هوساینې او اسلامي ټولنیز عدالت ډاډمن کول) دي.

دا اقتصادي پالیسي به د هېواد د اقتصادي فعالیتونو په همغږۍ، د سرچینو ښه کارولو او د خصوصي سکټور ملاتړ کې اړین ځای ولري.

همدارنګه په دې غونډه کې د مالیې وزارت ته لارښوونه وشوه، چې د ۱۴۰۴ لمریز لېږدیز مالي کال لپاره د بغلان ولایت د مرکز پلخمري ۱۳ کلیو ته د برښنا شبکې د غځولو لپاره پروژې ته اړینه بودجه ځانګړې کړي او دا پروژه د افغانستان برښنا شرکت لخوا پلي شي.

د غونډې پر مهال د بلخ ولایت د ارشاد، حج او اوقافو وزارت په ځمکه کې د سوداګریز بازار د جوړولو پلان تصویب شو. د دې پلان له مخې، خصوصي سکټور به له ۸۷۸ دوکانونو سره د اته پوړیز سوداګریز بازار د جوړولو لپاره ۷۴۰ میلیون افغانۍ پانګونه وکړي.

دغه راز د سرپل ښاروالۍ په ځمکه کې د سوداګریز بازار د جوړولو پلان هم تصویب شو.

د دې پلان له مخې، خصوصي سکټور به د معیاري سوداګریز بازار د جوړولو لپاره ۹۶ میلیون افغانۍ پانګونه وکړي.

ویل کیږي، چې دا پرېکړې د تصویب لپاره د اسلامي امارت د رهبرۍ دفتر ته واستول شوې.

د افغانستان د صنعت او سوداګرۍ وزارت ويلي، چې له وروستیو سیمه‌ییزو شخړو سره – سره د افغانستان بهرنۍ سوداګري له ستونزې پرته منظمه روانه ده.

د صنعت او سوداګرۍ وزارت په خبرپاڼه کې راغلي، چې په کورني بازار کې له ګاونډ هېوادونو او سیمې سره د توکو واردات، ټرانزیټ او عرضه عادي ده او د اساسي توکو په بیو کې هیڅ غیر معمولي بدلون ندی ثبت شوی.

وزارت د کموالي یا بې ثباتۍ په اړه د رسنیو راپورونه بې اساسه وبلل او ټینګار یې وکړ، چې له مرکزي آسیا څخه د وارداتو لارې پیاوړې شوې دي. همدارنګه، د احتکار او ناوړه ګټه اخیستنې د مخنیوي لپاره جدي اقدامات شوي دي.

د مالیې وزارت د اسرائیل او ایران د جګړې پر درېیمه ورځ اعلان وکړ، چې له ایران سره د افغانستان پولې او ګمرکونه خلاص دي او د دواړو هېوادونو ترمنځ سوداګریزې او ګمرکي اړیکې پرته له کومې ستونزې روانې دي.

دې وزارت دا هم ویلي، چې په سرحدونو کې د افغان سوداګریزو توکو بارولو پروسه روانه ده.

یاد وزارت یوه خبرپاڼه خپره کړه، چې د افغانستان او ایران ترمنځ سرحدي لارې او سرحدونه فعال او پرانیستي دي.

د خبرپاڼې له مخې؛ د فراه ولایت د ابو نصر فراهي لار، د نیمروز لار او د ایران د صامت لار د شنبې پر ورځ په ایران کې د مراسمو له کبله تړل شوې وه؛ خو یوه ورځ وروسته بېرته پرانیستل شوه.

په خبرپاڼه کې راغلي، چې د ایران په بندر عباس کې د افغان سوداګریزو توکو بارولو بهیر هم نورمال او پرته له کومې ستونزې روان دی.

د یادونې ده، چې د اسرائیل او ایران ترمنځ متقابل بریدونه اوس هم روان دي.