د اسلامي امارت بهرنیو چارو وزیر امیر خان متقي په کابل کې د پاکستانیو پوځیانو هوايي بریدونه نه یوازې وغندل، بلکې د افغانستان د مشروع دفاع اعلان یې هم وکړ او زیاتوي، چې په دې برید کې له ۴۰۸ څخه ډېر ناروغان وژل شوي او ۲۶۵ نور ټپیان دي.

امیر خان متقي په کابل کې د ډیپلوماټانو او د بېلابېلو بنسټونو له استازو سره په یوه ناسته کې ویلي، چې دا برید د پاکستان د پوځي رژیم له‌خوا د ټولنې پر هغه زیانمنو خلکو تر سره شوی، چې د بشري بنسټونو پر ملاتړ تر درملنې لاندې ول.

هغه دا برید له بشري او اسلامي اصولو ښکاره سرغړونه ګڼلې او د پاکستان پوځي رژیم یې په قصدي ډول د ملکي ودانیزو بنسټونو پر نښه کولو تورن کړ.

د بهرنیو چارو وزیر زیاته کړې؛ دا برید د چین په ګډون د سیمې د هېوادونو د منځګړیتوب له هڅو سره – سره او د افغانستان له‌خوا د نیک‌نیتۍ وروسته تر سره شوی. لکه د روژې په مبارکه میاشت کې د پاکستانيو بندیانو خوشې کول.

دغه راز متقي ویلي، چې له فبرورۍ راپدېخوا د بېلابېلو ولایتونو په ملکي سیمو کې تکراري بریدونو پر ډیپلوماټیکو حل لارو باور له منځه وړی دی.

هغه خبرداری ورکړ، چې که بریدونه روان وساتل شي؛ نو افغان ځواکونه به “متناسب او مشروع” دفاعي اقداماتو ته هم دوام ورکړي.

هغه ټینګار وکړ؛ افغانستان جګړه نه غواړي، خو له خپل ملي حاکمیت او خاورې څخه به دفاع کوي.

هغه همدارنګه له نړیوالې ټولنې؛ په ځانګړي توګه د سیمې له مسلمانو هېوادونو وغوښتل، چې دا برید وغندي او خبرداری یې ورکړ: د پاکستان له‌خوا د تاوتریخوالي دوام سیمه بې‌ثباته کوي او لویې اقتصادي او پرمختیایي پروژې له خطر سره مخ کوي.

په افغانستان کې د ملګرو ملتونو مرستندویه ماموریت ويلي، چې له کابل سره د اسلام‌آباد په روانه شخړه کې د افغانستان ملکي وګړي مرګ او ژوبله ویني.

د یوناما په نننۍ (سې‌شنبه د کب شپږویشتمه) خپره شوې خبرپاڼه کې لیکلي: د نړیوال قانون له مخې، د شخړو ټولې خواوې باید د ناروغانو او ټپیانو، طبي پرسونل، روغتونونو او امبولانسونو درناوی او ساتنه وکړي.

یوناما زیاته کړې؛ دا قوانین په روغتونونو او امبولانسونو هر ډول بریدونه منع کوي.

د یوناما د څرګندونو له مخې؛ د کب له پېنځمې څخه تر پېنځه‌ویشتمې / د فبرورۍ له څلیریشتمې څخه د مارچ تر شپاړلسمې پورې د دښمنیو په پایله کې لږ تر لږه ۷۴ ملکي وګړي وژل شوي او ۲۱۲ نور ټپیان ثبت شوي دي.

ویل کیږي، چې یوناما یو ځل بیا د تاوتریخوالي کمولو او دایمي اوربند غوښتنه کړې او له افغانستان او پاکستان څخه یې وغوښتل؛ د نړیوال قانون له مخې مسوولانه عمل غوره او د ملکي وګړو ساتنې ته پاملرنه  وکړي.

د یادونې ده، چې د دوشنبې پر شپه په کابل کې د روږدو د درملنې پر امید روغتون د پاکستاني پوځي رژیم د ترسره شوي له کبله لږ تر لږه ۴۰۰ کسان شهیدان او شاوخوا ۲۵۰ نور ټپیان شول.