د افغانستان له ۱۵ کلنو ټیټ عمره فوټبال ملي لوبډلې د ۲۰۲۶ فیفا نړیوال جام او فوټبال نندارې د ګروپي پړاو په وروستۍ لوبه کې سوډان ته درې پر یوه ماتې ورکړه او د شپږ لوبډلو تر منځ یې درېیم مقام خپل کړ؛ له دې سره یې د سیالیو درېیمې درجې ته لار وموندله.

دا په دغو سیالیو کې د افغانستان درېیمه بریا ده.

د هېواد تنکیو ملي لوبغاړو له دې مخکې هم سیرالیون او جیبوټي ته ماتې ورکړې وې.

روسیې د ډلې لومړی او ترکیې دوه‌یم مقام خپل کړی دی.

روسیه او ترکیه به پر ترتیب په لومړۍ او دوه‌یمه درجه کې سیالي وکړي؛ خو افغانستان به په درېیمه درجه کې د ټولیز لښتیلیک(جدول) د پنځه‌شپېتم او شپږ‌نوییم مقام تر منځ د ځای خپلولو لپاره ولوبېږي.

د سیالیو راتلونکی پړاو به په حذفي بڼه ترسره شي او ټولې ۱۸۹ ګډونوالې لوبډلې به د خپلو وروستیو مقامونو د ټاکلو لپاره سیالي وکړي. ټاکل شوې، چې دا سیالۍ د اوکټوبر پر دېرشمه پای ته ورسېږي.

آذربایجان د ۲۰۲۶ز.کال فیفا د ۱۵ کلنو ټیټ عمره فوټبال نړیوال جام او نندارې کوربه دی.

د افغانستان اتلانو لیګ روشن د شپږم پړاو په اته‌پنځوسمه لوبه کې آرمان اف‌سي د خراسان فاریاب لوبډلې ته درې پر یو ماتې ورکړه او په دې سیالیو کې یې خپله پنځمه بریا ترلاسه کړه.

دغه لوبه د دوشنبې پر ورځ په کابل کې ترسره شوه.

مالکوم ازیاح شاو د لوبې په نهه‌دېرشمه دقیقه کې د آرمان لومړی ګول وواهه او لوبډله یې مخکې کړه؛ خو د لومړۍ نیمې په اضافي وخت کې نوراحمد د خراسان فاریاب لپاره د مساوي ګول وواهه او لومړۍ نیمه یو پر یو پای ته ورسېده.

د لوبې په څلورپنځوسمه دقیقه کې سلیمان آریا د آرمان دوه‌یم ګول وواهه او لوبډله یې بیا مخکې کړه.

میرآغا شریفي د لوبې پر اویایمه دقیقه کې د آرمان درېیم ګول وواهه او د خپلې لوبډلې بریا یې درې پر یوه کړه.

د خراسان فاریاب لوبډلې په پاتې وخت کې د لوبې پایله بدله نه‌شوه کړی او آرمان اف‌سي د دوه ګولونو پر توپیر بریا خپله کړه او درې امتیازونه یې ترلاسه کړل.

دغه راز آرمان اف‌سي نهه کارنرونه ترلاسه کړل؛ خو خراسان فاریاب څلور کارنرونه درلودل. د خراسان فاریاب لوبغاړو شپږ ژېړ کارتونه او د آرمان لوبغاړو یو ژېړ کارت ترلاسه کړ. په دې لوبه کې کوم لوبغاړي سور کارت ترلاسه نه‌کړ.

د افغانستان اتلانو لیګ روشن د شپږم پړاو سیالۍ د آریانا ټلویزیون له لارې پر ژوندۍ بڼه خپرېږي او د هېواد په ګوټ ګوټ کې د فوټبال مینه‌وال کولی شي دغه سیالۍ وڅاري.