تازه خبرونه
اسلامي هېوادونه دې د نجونو د زدهکړو په اړه کندهار ته د عالمانو یو پلاوی واستوي
د نړیوالې پوهنې په چارو کې د ملګرو ملتونو ځانګړي استازي ګوردن براون له لويو اسلامي هېوادونو غوښتي، چې د افغانستان سویل کندهار ښار ته، چې په کې د اسلامي امارت مشرتابه مولوي هبةالله اخوندزاده ژوند کوي؛ د عالمانو يو پلاوى واستوي او د پوهنې د بنديز او د نجونو او ښځو د کار موضوع، چې په قرآن او اسلام کې هیڅ بنسټ نهلري ورسره راپورته کړي.
د اسوشیتید پرس د راپور له مخې؛ ګوردن براون د سې شنبې پر ورځ پر کابل د اسلامي امارت د واکمنۍ د دوهیمې کلیزې په مناسبت د ملګرو ملتونو په یوه مجازي خبري کنفرانس کې ویلي، چې: د جنایي جرمونو نړیواله محکمه باید د نجونو د تعلیم او کارموندنې مخنیوی د بشریت ضد جنایت په توګه وپېژني او د دې هدف لپاره دې پلټنې وکړي او مسوول کسان باید محکمې ته راکاږل شي.
د بريتانيا پخواني لومړي وزير براون دا هم ويلي، چې د جرمونو د نړيوالې محکمې مشر کريم خان ته يې خپل لیکلی اند لېږلی، چې په کې راغلي: پر زدهکړو او کار بنديز جنسي تبعيض دی، چې بايد د بشريت ضد جرم وګڼل شي او په کې ښکېل کسان دې پر نړیواله کچه محاکمه شي.
هغه په دې باور دی، چې په کابل کې ځیني طالب چارواکي ښوونځیو ته د نجونو د تګ ملاتړ کوي؛ خو ځینې نور بیا ورسره مخالفت لري.
هغه زیاته کړې: زه باور لرم، چې د کندهار دیني عالمان د دې پر وړاندې ولاړ دي او په دې اړه یې د لارښوونو صادرول هم روان ساتلي دي.
اسوشیتید پرس څرګنده کړې، چې د اسلامي امارت ویاند ذبیح الله مجاهد د دوشنبې پر ورځ ناوخته په کابل کې له دې خبري سرچینې سره په مرکه کې د نجونو او ښځو د بندیزونو په اړه پوښتنې رد کړې او څرګندوي، چې وضعیت به همداسې پاتې وي. هغه دا هم ویلي، چې اسلامي امارت په افغانستان کې خپله واکمني ټینګه ګڼي؛ ځکه، چې خپل مشروعیت د اسلامي احکامو له مخې ترلاسه کوي او له کوم لوی ګواښ سره مخ نهدی.
براون زیاته کړې؛ اسلامي امارت ته باید وویل شي، چې که نجونو ته د منځنیو، ثانوي ښوونځیو او پوهنتونونو اجازه ورکړ شي؛ له افغانستان سره پوهنیزې مرستې، چې د بندیزونو له اعلان وروسته پرې شوې وې، بېرته پیل شي.
هغه همدارنګه د ښځو او نجونو له حقونو څخه د سرغړونو د څارنې او په محدودیتونو کې د ښکېلو کسانو پر وړاندې د بنديزونو او د ښځو او نجونو د حقونو د دفاع لپاره د اړوند بنديانو د خلاصون غوښتنه وکړه.
براون څرګنده کړې، چې ملګري ملتونه او نورې ټولنې د نجونو لپاره د آنلاین زدهکړې ملاتړ کوي او د پټو ښوونځیو او همدارنګه د هغو افغان نجونو لپاره، چې هېواد پریښودو ته اړ شوي او ښوونځيو ته د تګ لپاره مرستې ته اړتیا لري؛ له زدهکړو ملاتړ کوي.
هغه ويلي: نړيواله ټولنه بايد وښيي، چې د افغان دولت له بنديزونو سره سره، د افغانستان خلکو ته ښوونه او روزنه وررسولی شي.
نوموړي زیاته کړې؛ يو شمېر موسسو له پټو ښوونځيو ملاتړکوي او په دې وروستيو اوونيو کې د ګرځند ( موبايلونو ) له لارې، چې په افغانستان کې پوره عام دي؛ د پروګرام او نصاب د وړاندې کولو لپاره نوی نوښت پر لار اچولی دی.
هغه ویلي، چې په تېرو شل کلونو کې، چې اسلامي امارت له واکه وتلی و، شپږ میلیون نجونو زدهکړې وکړې؛ داکترانې، وکیلانې، قاضیانې، د پارلمان غړې او د کابینې وزیرانې شوې وې.
د ملګرو ملتونو دغه چارواکي دا هم ویلي، چې نن ۲.۵ میلیون نجونې له زدهکړو بې برخې دي او په راتلونکیو څو کلونو کې به ۳ میلیون نورې نجونې لومړنۍ زدهکړې پای ته ورسوي.
هغه وایي: له دې کبله، مونږ د بشپړ یو نسل وړتیا له لاسه ورکوو.
براون پر ګام پورته کولو او نړیوال فشار ټینګار څرګندوي او وایي؛ نه یوازې پرخوله، بلکې په عمل کې باید د ښځو او نجونو حقونه ته اسلامي امارت وهڅول شي، چې له اړوند حقونو بېرته برخمنې شي.
دغه راز وایي؛ مونږ په تېرو دوه کلونو کې کافي کار نهدی کړی؛ زه نه غواړم یو بل کال هم دې دوه کلونو ته ورته تېر شي او په افغانستان کې نجونې او ښځې د بې ځواکۍ احساس وکړي؛ ځکه، نو د دوی د ملاتړ لپاره باید ګامونه پورته او پوره عملي کار وشي.
تازه خبرونه
اسلامي امارت به نړیوالو فشارونو ته تسلیم نشي – مولوي عبدالکبیر
د ریاست الوزراء سیاسي مرستیال مولوي عبدالکبیر د سې شنبې پر ورځ (د غویی یوولسمه) د کابل پولیتخنیک د زدهکړیالانو د فراغت په مراسمو کې څرګنده کړې، چې اسلامي امارت به نړیوالو فشارونو ته تسلیم نشي او نه به د هیچا پر فرمایش کار وکړي.
د کابل پولیتخنیک پوهنتون د زدهکړیالانو د فراغت مراسم د اسلامي امارت د چارواکو په حضور کې ترسره شول؛ خو ډېر پر سیاسي خبرو راڅرخېدل.
نوموړي په دې مراسمو کې زیاته کړې، چې د سیمې ټرانزیټ له افغانستان پرته ناشوني دی او چارسمبالی حکومت ترې ګټه پورته کوي.
د اسلامي امارت دغه لوړپوړي چارواکي ویلي، چې چارسمبالی حکومت له یوې خوا د پروژو پر پلي کېدا او له بلې خوا د کانونو پر استخراج کار کوي.
هغه دغه راز هېواد ته د مهاجرینو د راستنېدو لپاره د شرایطو پر برابرولو هم ټینګار وکړ.
د امربالمعروف او نهی عن المنکر او شکایتونو اورېدو وزارت چارسمبالي محمد خالد حنفي ویلي، اسلامي امارت په هېواد کې د عصري علومو د پراختیا مخالف ندی او غربي هېوادونه د اسلامي امارت پر خلاف په دې اړه منفي تبلیغات کوي.
د لوړو زدهکړو وزارت چارسمبالي ندا محمد ندیم ټینګار کوي، چې اسلامي امارت د جګړې په ډګر کې بریالی شوی؛ د اقتصاد، روغتیا او پوهنې په ډګرونو کې به هم بریاوې ترلاسه کړي.
له بلېخوا د لوړو زدهکړو وزارت یو شمېر نورو چارواکو ويلي؛ دغه وزارت هڅه کوي، چې د علمي او تحصیلي پراختیا په برخه کې پرمختګ وکړي او له نړیوالو معیارونو سره برابر شي.
د کابل پولیتخنیک پوهنتون د فراغت له دې پړاو څخه د ۱۷ څانګو ۵۳۷ زدهکړیالان فارغ شول او د اسلامي امارت د چارواکو لهخوا د فراغت سندونه ورکړ شول.
تازه خبرونه
افغان ـ ترکمن چارواکو په هرات کې د نورالجهاد سب سټیشن چارې وارزولې
د افغانستان برښنا شرکت څرګنده کړې، چې د دې شرکت د رهبرۍ او ترکمن پلاوي ترمنځ د هرات نورالجهاد سب سټېشن د پاتې تخنیکي چارو د ژر بشپړېدو، فعالېدو او پرانیستلو په اړه ګډه ناسته ترسره شوه.
د افغانستان برښنا شرکت عملیاتي رییس عبدالرحمن رحماني په دې ناسته کې ویلي؛ اوسمهال د نورالجهاد سب سټیشن چارې د بشپړېدو په حال کې دي او ټاکل شوې د دواړو لوریو ترمنځ د تخنیکي مسایلو له حل کېدلو وروسته نوموړی سب سټیشن فعال او ګټې اخیستنې ته وسپارل شي.
دغه راز د ترکمنستان نړیوالو پروژو رییس مراد آرتیکوف ویلي؛ د نورالجهاد سب سټیشن چارې د دواړو لوریو ترمنځ په ښې همغږۍ ترسره شوي او ډېر ژر به بشپړې شي.
د آرتیکوف د څرګندونو له مخې؛ ټاکل شوې د تجهیزاتو او نورو تخنیکي مسایلو پروتوکول هم په راتلونکیو ورځو کې تائید او وروستی شي.
ویل کیږي، چې د نوموړې پروژې له پرانیستې سره به هرات ته د ترکمنستان وارداتي برښنا کچه لوړه او زرګونه نوي پېرودونکي د برښنا له انرژۍ څخه برخمن شي.
تازه خبرونه
له ترهګرۍ سره په مبارزه کې له اسلامي امارت سره همکارۍ ته چمتو یوو- ایران
په کابل کې د ایران سفارت د دوشنبې پر ورځ ( د غویی لسمه) د هرات ولایت په یوه جوماتن کې له وسلهوال برید وروسته څرګنده کړې، چې له ترهګرۍ سره په مبارزه کې له اسلامي امارت سره همکارۍ ته چمتو دی.
یاد سفارت دا غبرګون په هرات ولایت کې د شیعهګانو پر جومات له وسلهوال برید وروسته څرګند کړی دی.
دا سفارت دا برید “ترهګریزه پېښه” بولي او په کلکه یې غندلې ده.
د دغه سفارت په خبرپاڼه کې راغلې، چې ايران غواړي د دغه «جرم» عاملين وپېژني او سزا ورکړي.
دغه سفارت زیاته کړې؛ ایران له ترهګرۍ سره د مبارزې په برخه کې له اسلامي امارت سره د همکارۍ د پیاوړتیا لپاره خپل چمتووالی اعلانوي.
د کورنیو چارو وزارت ویاند عبدالمتین قانع ويلي؛ تېره شپه (دوشنبه د ثور لسمه) د هرات ولایت د ګذرې ولسوالۍ په شهرک سیمه کې ناڅرګندو وسلهوال پر لمونځ کوونکیو د کلاشینکوف ډزې کړي، چې ۶ ملکي وګړي یې وژلي او یو بل ټپي دی.
قانع زیاته کړې، چې د دې پېښې جزئیات به وروسته وړاتندې شي.
تر اوسه کومې ډلې یا شخص د دې پېښې مسوولیت پر غاړه ندی اخیستی.
-
تازه خبرونه2 days ago
د بغلان ولایت د غوري سمنټو تولید زیات شوی
-
تازه خبرونه2 days ago
ترکمنستان د ټاپي پروژې بشپړولو ته ژمن دی – امانوف
-
سیمه ییز خبرونه2 days ago
په عراق کې به همجنسبازان پر۱۵ کاله بند شي –پارلمان
-
لوبی2 days ago
په افغانستان اتلانو لیګ کې موج ساحل ۲-۱ سرسبز یاشلر او سورخ پوشان ۶ -۰ میوند مات کړل
-
سیمه ییز خبرونه1 day ago
د دوبۍ واکمن د هوایي ډګر د نوي ټرمینل جوړولو لپاره ۳۵ میلیارډ ډالر تصویب کړل
-
تازه خبرونه2 days ago
له پاکستان څخه دې د افغان کډوالو د جبري ایستلو چټکتیا راکمه شي
-
تازه خبرونه1 day ago
تېر کال د ۳۵ میلیون ډالرو پر ارزښت پراختیايي او بشري پروژې ترسره شوي
-
لوبی21 hours ago
اټک انرژي او موج ساحل د دوشنبې د ورځې لوبې وګټلې