افغان بېسیم مخابراتي شرکت د ځانګړیو انتنونو له نصبولو سره د سپین بولدک او تورخم په بندرونو کې له پاکستان څخه راستنیدونکیو افغانانو ته وړیا مخابراتي او انترنیتي خدمات وړاندې کوي.

افغان مهاجرو کلونه کلونه په پاکستان کې د ژوند کولو لپاره سخت کار وکړ؛ خو دا ټول یې یو دم له لاسه ورکړل.

دغه افغان کډوال، چې د پاکستان د حکومت له‌خوا پر زوره ایستل شوي؛ ټول شته یې په پاکستان کې پاتې دي او د پاکستان د امنیتي ځواکونو له‌خوا د جبري شړلو خورا دردونکې څرګندونې لري.

کله، چې دا کډوال افغانستان ته ننوځي؛ له ټولو لږ اسانتیاوو ته لاسرسی لري؛ د دوی یوه مهمه اړتیا مخابراتي خدماتو ته لاسرسی دی.

افغان بېسیم مخابراتي شرکت دغو مهاجرینو ته وړیا مخابراتي او انترنیتي خدمات وړاندې کړي او مهاجرینو ته وړیا سیم کارتونه وېشي.

د افغان بېسیم مخابراتي شرکت مشر علي الله سروري وايي: مخابراتي خدمتونه چټک فعالول او هېوادوالو ته د وړیا سیم کارتونو برابرول مو د کاري ډلو کار دی. دوی نرینه او ښځو ته د سیم کارتونو په برابرولو کې مرسته کوي.

نوموړي زیاته کړې، چې د مخابراتي خدمتونو تر څنګ بیات بنیاد هم پر سلګونه راستنېدونکیو کورنیو ته خوراکي توکي وېشلي او روغتیايي خدمات وړاندې کوي.

په تورخم کې له کډوالو سره د چلند کمیته د افغان بېسیم مخابراتي شبکې او بیات بنیاد له مرستو مننه وکړه.

په تورخم کې د مهاجرینو د چارو دولتي کمیتې عمومي رییس سید احمد میشمیر وايي: مونږ له افغان شرکت څخه خوښ یوو، چې په حساسو شرایطو کې یې کار کړی او مخابراتي اسانتیاوې یې ورته برابرې کړې دي.

دغه راز هغه کډوال، چې یوازې له پاکستان څخه افغانستان ته راغلي د افغان بېسیم مخابراتي شرکت له خدمتونو خوښي څرګندوي او وايي؛ دې خدمتونو دوی ته توان ورکړی، چې له خپلو خپلوانو سره اړیکه ونیسي.

له پاکستان څخه راستون شوی عبدالمطلب وايي: که مونږ سیم کارت ونه‌لرو؛ خپلوان به مو ورک شي او د سیم کارتونو له لارې مونږ کولی شو خپل خپلوان یو ځل بیا پیدا کړو او په افغانستان کې یې له خپلو خپلوانو سره اړیکه ونیسو. مونږ د دوی له دې کاره مننه کوو.

له پاکستان څخه راستون شوی حبيب الله وايي: مونږ ډېر ښه مشران لرو او له هغه وخته، چې زه دلته راغلم، ماته د افغان بېسيم سيم کارت راکړ شوی دی.

افغان بېسیم مخابراتي شرکت او بیات بنیاد تل په ځانګړیو او بېړنیو حالاتو کې له خلکو سره مرستې ته ورغلي او د مسوولینو د څرګندونو له مخې خدمات به یې روان وي.

دا په داسې حال کې ده، چې هره ورځ له پاکستان څخه د افغان کډوالو د ویستلو بهیر ګړندی کیږي او هره ورځ زرګونه کورنۍ پر زور ایستل کیږي او د هېواد په کمپونو کې نوی ژوند پيلوي.