د افغانستان د ملي امنیت سلاکار د سې شنبې پر ورځ( د غبرګولي ۲۸) له غرمې مخکې د روسیې د اوفا ښار په کوربتوب د اوفا په لسمه امنیتي ناسته کې گأون وکئ او د وینا پر مهال یي ویلي، چې په افغانستان کې هره ورځ لږ تر لږه پنځوس کسان له ترهګرۍ سره په مبارزه کې خپل ژوند له لاسه ورکوي!

د ملي امنیت د خبرپاڼې له مخې؛ په دې ناسته کې د افغانستان د ملي امنیت سلاکار داکتر حمد الله محب دا هم ویلي، چې افغانستان له تروریزم سره په مبارزه کې د لومړي سنګر حیثیت خپل کړی او په وړاندې، یې مبارزه باید زمونږ د کارونو په لومړیتوب کې وي.

په خبرپاڼه کې دا هم راغلي: داکتر محب دغه راز څرګنده کړی، چې ترهګر او د نشه یي توکو قاچاقبران د یوې سیکې دوه مخه دي. تاریاک د ترهګرو د عوایدو اصلي سرچینه ده، چې هر کال ورته میلیاردونه دالر پیدا کوي او له دې پدیېدې سره د مبارزې لپاره عمل، همغږي او یووالي ته اړتیا ده.

هغه دا هم ویلي، چې له مالي جرایمو سره مبارزه زمونږ د هېوادونو د ملي امنیت لپاره خورا کلیدي ارزښت لري. د تورو پیسو د سپینولو، د حوالو له غیر راجسترشويو سیستمونو څخه د پیسو تر لاسه کیدو او له نظارت پرته د خیرات په نوم په سیمه کې د ترهګرو لپاره د مالي سپما ټولولو پر ضد کلکه مبارزه اړینه  ده.
ملي امنیت سلاکار دا ټینګار هم وړاندې کړی، چې د پام وړ یو بل ټکی سرحدي همکاري ده. زمونږ په سیمه کې هره ورځ زرګونه کسان په ناقانونه توګه له پولو اوړي او رااوړي، چې له تروریستانو سره یو ځای، روزنه تر لاسه او زمونږ خلک یې موخه ده. له دې ترکیبي ګواښونو سره د مقابلې لپاره په همهاله توګه د معالوماتو شریکول، سرحدي ځواکونه پر لازمه تکنالوژۍ سمبالول او زمونږ د سیمې د سرحدونو د نظم لپاره ګډې همکارۍ ژوند بښونکې دي.

نوموړي دا هم ویلي؛ سایبري جرمونه د دې جګړې بل مهم عنصر دی، چې زمونږ هېوادونو ته خطر پېښوي. افغانستان چمتو دی، چې په دې برخه کې دوه اړخیزې همکارۍ او سیمه ییز شراکتونه ولري او د هغو مخربو کړیو مخنیوی وکړي، چې له انترنت څخه ناسمه ګټه اخلي او زمونږ په ټولنو کې وېره خپروي‌ او زمونږ د پرمختګ مخه نیسي.

دا په داسې حال کې ده، چې سیمه اونړۍ یو ځل بیا له امنیتي او سیاسي ګواښونو سره مخ شوې ده.